ಇನ್ನಷ್ಟು ಕೋಟಿ ಬಾಚಿಕೊಂಡ ಪ್ರಿಯಾಂಕಾ ... ಅಮೇಜಾನ್​ ಜತೆಗೆ ಹೊಸ ಡೀಲ್​

ಕಳೆದ ಮೂರು ತಿಂಗಳುಗಳಿಂದ ಅಮೇರಿಕಾದಲ್ಲಿ ಗಂಡನ ಮನೆಯಲ್ಲಿ ಲಾಕ್​ಡೌನ್​ನಲ್ಲಿರುವ ಪ್ರಿಯಾಂಕಾ ಚೋಪ್ರಾ, ಈಗ ಅಮೇಜಾನ್​ ಜತೆಗೆ ಎರಡು ವರ್ಷಗಳ ಮಲ್ಟಿಮಿಲಿಯನ್​ ಡಾಲರ್​ನ ಅಗ್ರೀಮೆಂಟ್​ ಮಾಡಿಕೊಂಡಿದ್ದಾರೆ. ಈ ಅಗ್ರೀಮೆಂಟ್​ ಪ್ರಕಾರ, ಅಮೇಜಾನ್​ಗಾಗಿ ಮುಂದಿನ ಎರಡು ವರ್ಷಗಳಲ್ಲಿ ಒಂದಿಷ್ಟು ಕಾರ್ಯಕ್ರಮಗಳನ್ನು ರೂಪಿಸಿಕೊಡಲಿದ್ದಾರೆ. ಈ ವಿಷಯವನ್ನು ಸ್ವತಃ ಅಮೇಜಾನ್​ ಸ್ಟುಡಿಯೋದ ಮುಖ್ಯಸ್ಥರಾದ ಜೆನ್ನಿಫರ್​ ಸಾಲ್ಕ್​ ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: ಕಿಚ್ಚ ಸುದೀಪ್​ ಫ್ಯಾಂಟಮ್ ಚಿತ್ರಕ್ಕೆ ಸಂಗೀತ ನಿರ್ದೇಶಕರು ಇವರೇ..

ಪ್ರಿಯಾಂಕಾ ಇದೀಗ ಬರೀ ಬಾಲಿವುಡ್​ ನಟಿಯಾಗಷ್ಟೇ ಉಳಿದಿಲ್ಲ. ಹಾಲಿವುಡ್​ನಲ್ಲಿ ಕಾಣಿಸಿಕೊಂಡ ನಂತರ ಜಾಗತಿಕವಾಗಿ ಸಾಕಷ್ಟು ಗುರುತಿಸಿಕೊಂಡಿದ್ದಾರೆ. ಈ ಹಿನ್ನೆಲೆಯಲ್ಲಿ ಅವರು ಜಾಗತಿಕವಾಗಿ ಹಲವು ಸ್ಟುಡಿಯೋಗಳ ಜತೆಗೆ ಕೆಲಸ ಮಾಡುತ್ತಿದ್ದು, ಈ ಪೈಕಿ ಅಮೇಜಾನ್​ ಸ್ಟುಡಿಯೋ ಸಹ ಒಂದಾಗಿದೆ.

ಈ ಕುರಿತು ಸಂದರ್ಶನವೊಂದರಲ್ಲಿ ಮಾತನಾಡಿರುವ ಪ್ರಿಯಾಂಕಾ, ಅಮೇಜಾನ್​ ಸ್ಟುಡಿಯೋ ಜತೆಗೆ ಕಾರ್ಯಕ್ರಮಗಳನ್ನು ಮಾಡಿಕೊಡುವ ಒಪ್ಪಂದ ಮಾಡಿಕೊಂಡಿರುವುದಾಗಿ ಹೇಳಿಕೊಂಡಿದ್ದಾರೆ. 'ಈಗಾಗಲೇ ನನ್ನದೇ ಒಂದು ಪ್ರೊಡಕ್ಷನ್​ ಹೌಸ್​ ಮಾಡಿಕೊಂಡು, ಅದರಡಿ ಸಿನಿಮಾ ಮತ್ತು ಟಿವಿ ಕಾರ್ಯಕ್ರಮಗಳನ್ನು ರೂಪಿಸಿಕೊಂಡು ಬಂದಿದ್ದೇನೆ. ಈಗ ಅಮೇಜಾನ್​ ಜತೆಗೆ ಒಪ್ಪಂದವಾಗಿದೆ. ಹಿಂದಿ ಅಥವಾ ಇಂಗ್ಲೀಷ್​ನಲ್ಲಿ ಕಾರ್ಯಕ್ರಮಗಳನ್ನು ರೂಪಿಸುವುದಕ್ಕೆ ಅವರು ನನಗೆ ಸ್ವಾತಂತ್ರ್ಯ ಕೊಟ್ಟಿದ್ದಾರೆ. ಇದರಿಂದ ಎರಡೂ ಭಾಷೆಗಳಲ್ಲಿ ಜನರಿಗೆ ಇಷ್ಟವಾಗುವ ಕಂಟೆಂಟ್​ ಕೊಡುವುದಕ್ಕೆ ಎದುರು ನೋಡುತ್ತಿದ್ದೇನೆ' ಎಂದು ಪ್ರಿಯಾಂಕಾ ಹೇಳಿಕೊಂಡಿದ್ದಾರೆ.

ಇದನ್ನೂ ಓದಿ: 50 ಸಿಮ್​ಗಳನ್ನು ಬದಲಿಸಿದ್ದರೆ ಸುಶಾಂತ್​ ಸಿಂಗ್​

ದೊಡ್ಡ ಮಟ್ಟದಲ್ಲಿ ನಿರ್ಮಾಣದಲ್ಲಿ ತೊಡಗಿಸಿಕೊಳ್ಳಬೇಕು ಮತ್ತು ಹೊಸ ಪ್ರತಿಭೆಗಳನ್ನು ಪರಿಚಯಿಸಬೇಕು ಎನ್ನುವುದು ಪ್ರಿಯಾಂಕಾ ಅವರ ಕನಸಾಗಿತ್ತಂತೆ. ಅದು ಈ ಒಪ್ಪಂದದ ಮೂಲಕ ಈಡೇರಿದೆ ಎಂದು ಹೇಳಿಕೊಂಡಿರುವ ಅವರು, 'ಒಬ್ಬ ನಟಿಯಾಗಿ ಮತ್ತು ನಿರ್ಮಾಪಕಿಯಾಗಿ, ಹಲವು ಪ್ರತಿಭೆಗಳನ್ನು ಪರಿಚಯಿಸುವ ಆಸೆ ಇತ್ತು. ಜಗತ್ತಿನ ಒಂದಿಷ್ಟು ಪ್ರತಿಭಾವಂತರನ್ನೆಲ್ಲಾ ಸೇರಿಸಿ ಕಾರ್ಯಕ್ರಮ ರೂಪಿಸುವ ಯೋಚನೆ ಇತ್ತು. ನಮ್ಮ ಪರ್ಪಲ್​ ಪೆಬ್ಬಲ್​ ಪಿಕ್ಚರ್ಸ್​ನಿಂದ ಒಂದಿಷ್ಟು ಪ್ರಯತ್ನಗಳಾಗಿವೆಯಾದರೂ, ಮುಂದಿನ ದಿನಗಳಲ್ಲಿ ಈ ನಿಟ್ಟಿನಲ್ಲಿ ಇನ್ನಷ್ಟು ಕೆಲಸ ಮಾಡುವ ಯೋಚನೆ ಇದೆ' ಎಂದು ಪ್ರಿಯಾಂಕಾ ಅಭಿಪ್ರಾಯಪಟ್ಟಿದ್ದಾರೆ.

ಇದಲ್ಲದೆ, ಅಮೇಜಾನ್​ ಜತೆಗೆ ಪ್ರಿಯಾಂಕಾ ಇನ್ನೂ ಮೂರು ಯೋಜನೆಗಳಲ್ಲಿ ಜತೆಯಾಗಿದ್ದಾರೆ. 'ಸಂಗೀತ್​' ಎಂಬ ಸೀರೀಸ್​ನ ಜತೆಗೆ ರಿಚರ್ಡ್​​ ಮ್ಯಾಡನ್​ ಅವರ 'ಸಿಟಾಡೆಲ್​' ಎಂಬ ಶೋನಲ್ಲೂ ಕಾಣಿಸಿಕೊಳ್ಳುತ್ತಿದ್ದಾರೆ. ಇದಲ್ಲದೆ ಅಮೇಜಾನ್​ ಸ್ಟುಡಿಯೋಸ್​ ನಿರ್ಮಿಸುತ್ತಿರುವ ಹೊಸ ಸಿನಿಮಾದಲ್ಲೂ ಅಭಿನಯಿಸುತ್ತಿದ್ದಾರೆ.

https://www.vijayavani.net/danish-sait-to-appear-as-karshan-roy-in-777-charlie-film/