ಮುಂಬೈ: ಬಾಲಿವುಡ್ ಮಾತ್ರವಲ್ಲದೇ ಹಾಲಿವುಡ್ ಚಿತ್ರಗಳಲ್ಲಿಯೂ ಬ್ಯುಸಿ ಇರುವ ಮಾಜಿ ವಿಶ್ವ ಸುಂದರಿ, ನಟಿ ಪ್ರಿಯಾಂಕಾ ಚೋಪ್ರಾ ಅವರು ಬಣ್ಣದ ಲೋಕಕ್ಕೆ ಕಾಲಿಟ್ಟು 22 ವರ್ಷಗಳು ಕಳೆದಿವೆ. ಅವರ ನಟನೆಯ ಚೊಚ್ಚಲ ಚಿತ್ರ ತಮಿಳನ್ ಇಂದಿಗೆ (ಏಪ್ರಿಲ್ 12) ಬಿಡುಗಡೆಯಾಗಿ 22 ವರ್ಷಗಳು ಕಳೆದಿದ್ದು, ಈ ಬಗ್ಗೆ ನಟಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ.
2002 ಏಪ್ರಿಲ್ 12ರಂದು ಪ್ರಿಯಾಂಕಾ ಚೋಪ್ರಾ ನಟನೆಯ ಚೊಚ್ಚಲ ತಮಿಳು ಚಿತ್ರ ತಮಿಳನ್ ಬಿಡುಗಡೆಯಾಗಿತ್ತು. ಮಜಿತ್ ನಿರ್ದೇಶನದ ಈ ಚಿತ್ರದಲ್ಲಿ ಅವರು ದಳಪತಿ ವಿಜಯ್ಗೆ ಜೋಡಿಯಾಗಿ ನಟಿಸಿದ್ದರು. ಇದಾದ ಬಳಿಕ ಬಾಲಿವುಡ್ ಪ್ರವೇಶಿಸಿದ ನಟಿ ಪ್ರಿಯಾಂಕಾ ಚೋಪ್ರಾ ಆ ನಂತರ ಹಾಲಿವುಡ್ ಚಿತ್ರಗಳಲ್ಲಿ ನಟಿಸಿ ಸೈ ಎನ್ನಿಸಿಕೊಂಡಿದ್ದಾರೆ. ಈ ಕುರಿತು ಸಾಮಾಜಿಕ ಜಾಲತಾಣ ಇನ್ಸ್ಟಾಗ್ರಾಂನಲ್ಲಿ ಸ್ಟೋರಿ ಹಂಚಿಕೊಂಡಿದ್ದಾರೆ.
ಇದನ್ನೂ ಓದಿ: ಸತತ ಸೋಲಿನ ನಡುವೆಯೇ ಆರ್ಸಿಬಿಗೆ ಮತ್ತೊಂದು ಶಾಕ್; ಗಾಯಕ್ಕೆ ತುತ್ತಾದ ಸ್ಟಾರ್ ಆಟಗಾರ
ಕಳೆದ ಕೆಲ ತಿಂಗಳ ಹಿಂದೆ ಸಂದರ್ಶನ ಒಂದರಲ್ಲಿ ಈ ಕುರಿತು ಮಾತನಾಡಿದ್ದ ನಟಿ ಪ್ರಿಯಾಂಕಾ, ವಿಶ್ವಸುಂದರಿ ಸ್ಪರ್ಧೆಯಾದ ಬಳಿಕ ನಾನು ಒಪ್ಪಿಕೊಂಡ ಮೊದಲ ಚಿತ್ರ ತಮಿಳನ್. ಮೊದಲಿಗೆ ಶೂಟಿಂಗ್ ಸೆಟ್ಗೆ ಹೋದಾಗ ನನಗೆ ತುಂಬಾ ಕಷ್ಟವಾಗುತ್ತಿತ್ತು. ನನಗೆ ತಮಿಳು ಹೆಚ್ಚು ತಿಳಿಯದ ಕಾರಣ ಮೊದಲಿಗೆ ನಟಿಸಲು ತುಂಬಾ ಕಷ್ಟಪಡುತ್ತಿದ್ದೆ. ಆ ನಂತರ ಸಹ ನಟ ವಿಜಯ್ ಅವರನ್ನು ನೋಡಿಕೊಂಡು ತುಂಬಾ ಕಲಿತುಕೊಂಡೆ ಅವರು ನನ್ನ ಜೀವನದಲ್ಲಿ ತುಂಬಾ ಪ್ರಭಾವ ಬೀರಿದ್ದಾರೆ ಎಂದು ನಟಿ ಪ್ರಿಯಾಂಕಾ ಚೋಪ್ರಾ ಸಂದರ್ಶನ ಒಂದರಲ್ಲಿ ಹೇಳಿಕೊಂಡಿದ್ದರು.
ಪ್ರಿಯಾಂಕಾ ಚೋಪ್ರಾ ಪ್ರಸ್ತುತ ಹೆಡ್ಸ್ ಆಫ್ ಸ್ಟೇಟ್ ಚಿತ್ರೀಕರಣದಲ್ಲಿ ಬ್ಯುಸಿ ಇದ್ದು, , ನಟ ದಳಪತಿ ವಿಜಯ್ ಗ್ರೇಟೆಸ್ಟ್ ಆಫ್ ಆಲ್ ಟೈಮ್ (GOAT) ಶೂಟಿಂಗ್ನಲ್ಲಿ ಬ್ಯುಸಿ ಇದ್ದಾರೆ.