ತಿರುವನಂತಪುರಂ: ಮದುವೆಗೂ ಮುನ್ನ ಅಥವಾ ನಂತರ, ಸಮಯ ಯಾವುದೇ ಇರಲಿ ಇಂದಿನ ದಿನದಲ್ಲಿ ವೆಡ್ಡಿಂಗ್ ಫೋಟೋಶೂಟ್ ನವ ಜೋಡಿಯ ಅವಿಭಾಜ್ಯ ಅಂಗವಾಗಿದೆ. ಬಹುತೇಕ ಜೋಡಿಗಳು ತಮ್ಮ ವೆಡ್ಡಿಂಗ್ ಫೋಟೋಗಳು ತುಂಬಾ ವಿಭಿನ್ನವಾಗಿರಬೇಕೆಂಬ ಕನಸನ್ನೂ ಹೊಂದಿರುತ್ತಾರೆ. ಹೀಗೆ ತಮ್ಮ ಕನಸನ್ನು ನನಸು ಮಾಡಿಕೊಳ್ಳಲು ಮುಂದಾದ ಕೇರಳ ಜೋಡಿ ಇದೀಗ ಟ್ರೋಲಿಗರ ದಾಳಕ್ಕೆ ಸಿಲುಕಿದ್ದಾರೆ.
ಹೌದು, ನವಜೋಡಿ ರಿಶಿ ಕಾರ್ತಿಕೇಯನ್ ಮತ್ತು ಲಕ್ಷ್ಮೀ ಸೆ. 16ರಂದು ಮದುವೆಯಾಗಿದ್ದಾರೆ. ಕರೊನಾ ವೈರಸ್ ಲಾಕ್ಡೌನ್ ಹಿನ್ನೆಲೆಯಲ್ಲಿ ಸರಳವಾಗಿ ವಿವಾಹ ಸಮಾರಂಭ ಜರುಗಿದೆ. ಅಲ್ಲದೆ, ಮದುವೆಗೂ ಮುನ್ನ ಪ್ರಿ ವೆಡ್ಡಿಂಗ್ ಫೋಟೋಶೂಟ್ ಮಾಡಿಸಲು ಸಾಧ್ಯವಾಗಿರಲಿಲ್ಲ. ಇದೀಗ ಬೌಡಿಯರ್ ಸೆಸನ್ಸ್ (ಮಾದಕ ಫೋಟೊಶೂಟ್) ಎಂಬ ವಿಭಿನ್ನ ಕಲ್ಪನೆಯೊಂದಿಗೆ ದಂಪತಿ ಪೋಸ್ಟ್ ವೆಡ್ಡಿಂಗ್ ಫೋಟೋಶೂಟ್ ಮಾಡಿಸಿದ್ದಾರೆ. ಇದರಲ್ಲಿ ದಂಪತಿ ಅರ್ಧಂಬರ್ಧ ಉಡುಪು ಧರಿಸಿ ಕ್ಯಾಮೆರಾಗೆ ಪೋಸ್ ನೀಡಿದ್ದಾರೆ. ಇದೇ ಫೋಟೋಶೂಟ್ ಇದೀಗ ಟ್ರೋಲಿಗರಿಗೆ ಆಹಾರವಾಗಿದೆ.
ತಮ್ಮ ಫೋಟೋಗ್ರಾಫರ್ ಸ್ನೇಹಿತ ಅಖಿಲ್ ಕಾರ್ತಿಕೇಯನ್ ನೆರವಿನಿಂದ ದಂಪತಿ ಕೇರಳದ ಇಡುಕ್ಕಿ ಜಿಲ್ಲೆಯ ವ್ಯಾಗಮೋನ್ ಟೀ ಎಸ್ಟೇಟ್ನಲ್ಲಿ ಸುಂದರ ಫೋಟೊಶೂಟ್ ಮಾಡಿಸಿದ್ದಾರೆ. ಹನಿಮೂನ್ ಹಿನ್ನೆಲೆಯಲ್ಲಿ ದಂಪತಿ ಕಳೆದವಾರ ಇಡುಕ್ಕಿಗೆ ತೆರಳಿದ್ದಾಗ ಅದರ ನಡುವೆಯೇ ಫೋಟೋಶೂಟ್ ನಡೆದಿದೆ.
ಇದನ್ನೂ ಓದಿ: ‘ನೀ ಹುಟ್ಟಿದಾಗ ಕುಣಿದಾಡಿದ್ದೆ ಮಗನೇ’; ಚಿರು ನೆನೆದು ಭಾವುಕ ಪೋಸ್ಟ್ ಹಾಕಿದ ಅರ್ಜುನ್ ಸರ್ಜಾ
ಇದೇ ಖುಷಿಯಲ್ಲೇ ದಂಪತಿ ತಮ್ಮ ಫೇಸ್ಬುಕ್ನಲ್ಲಿ ಫೋಟೋಗಳನ್ನು ಶೇರ್ ಮಾಡುತ್ತಿದ್ದಂತೆ ಸಾಕಷ್ಟು ಅಶ್ಲೀಲ ಕಾಮೆಂಟ್ಗಳು ಹರಿದುಬಂದಿವೆ. ಕೆಲವೇ ಮಂದಿ ದಂಪತಿ ಫೋಟೋಗಳನ್ನು ಮೆಚ್ಚಿಕೊಂಡರೆ, ಬಹುತೇಕರು ಕೆಟ್ಟದ್ದಾಗಿ ಕಾಮೆಂಟ್ ಮಾಡಿದ್ದಾರೆ. ಸಾರ್ವಜನಿಕ ಸ್ಥಳಗಳಲ್ಲಿ ಈ ರೀತಿ ಫೋಟೋಶೂಟ್ ಮಾಡಿಸಲು ನಿಮಗೆ ನಾಚಿಕೆ ಆಗುವುದಿಲ್ಲವೇ? ಎಂಬಿತ್ಯಾದಿ ಟೀಕೆಗಳು ದಂಪತಿ ವಿರುದ್ಧ ಕೇಳಿಬಂದಿವೆ.
ಟ್ರೋಲಿಗರ ಕಾಮೆಂಟ್ ವಿರುದ್ಧ ಸಿಡಿದೆದ್ದ ದಂಪತಿ, ನಮ್ಮ ಫೋಟೋ, ನಮ್ಮಿಷ್ಟ ನೀವ್ಯಾರೂ ಕೇಳುವುದಕ್ಕೆ ಎಂದಿದ್ದಾರೆ. ಈ ರೀತಿ ಫೋಟೋಶೂಟ್ ಮಾಡಿಸಲು ನಮ್ಮ ಮನೆಯವರೇ ನಮ್ಮನ್ನು ವಿರೋಧಿಸಲಿಲ್ಲ ಎಂದು ಸಮರ್ಥನೆಯನ್ನೂ ನೀಡಿದ್ದಾರೆ.
ತುಂಡುಡುಗೆ ಧರಿಸುವುದು ಅಶ್ಲೀಲವೇನು ಅಲ್ಲ. ತುಂಬಾ ಅಸಹ್ಯ ಎನಿಸುವ ಕಾಮೆಂಟ್ಗಳು ಬಂದವು. ಆರಂಭದಲ್ಲಿ ಕೆಲವೊಂದಕ್ಕೆ ಉತ್ತರ ನೀಡಿದೆವು. ಆದರೆ, ರಾಶಿ ರಾಶಿ ಕಾಮೆಂಟ್ಗಳು ಬರಲು ಆರಂಭಿಸಿತು. ಫೋಟೋಗಳು ವೈರಲ್ ಆಗುತ್ತಿದ್ದಂತೆ ಟ್ರೋಲ್ ಮಾಡಲಾರಂಭಿಸಿದರು. ಬಳಿಕ ನಾವು ಗಂಭೀರವಾಗಿ ತೆಗೆದುಕೊಳ್ಳದೇ ಎಲ್ಲವನ್ನು ಕಡೆಗಣಿಸಿದೆವು ಎಂದು ದಂಪತಿ ಟ್ರೋಲಿಗರಿಗೆ ತಿರುಗೇಟು ನೀಡಿದ್ದಾರೆ. (ಏಜೆನ್ಸೀಸ್)
1 ಕೋಟಿ ರೂ. ವಂಚನೆ: ಮಾಜಿ ಸಚಿವರ ಮೊಮ್ಮಗಳ ವಿರುದ್ಧ ಪ್ರಕರಣ ದಾಖಲು..!