ಸಿದ್ಧಾರ್ಥ್​-ಕಿಯಾರಾ ಮದುವೆಗೆ ಬಾಲಿವುಡ್​ನಿಂದ ಇವರಿಬ್ಬರಿಗೆ ಮಾತ್ರ ಆಹ್ವಾನವಂತೆ!

ಮುಂಬೈ: 'ಶೇರ್​ಷಾ' ಜೋಡಿ ಸಿದ್ಧಾರ್ಥ್​ ಮಲ್ಹೋತ್ರಾ ಮತ್ತು ಕಿಯಾರಾ ಅಡ್ವಾಣಿ ಪ್ರೀತಿಸುತ್ತಿರುವುದು, ಮದುವೆಯಾಗುತ್ತಿರುವುದು ಯಾವುದೂ ಬಾಲಿವುಡ್​ ಮಂದಿಗೆ ಹೊಸ ವಿಷಯವಾಗಿ ಉಳಿದಿಲ್ಲ. ಇವೆಲ್ಲವೂ ಹಳೆಯದಾಗಿದ್ದು, ಅವರಿಬ್ಬರ ಮದುವೆ ಯಾವಾಗಿರಬಹುದು ಎಂಬ ಕುತೂಹಲ ಎಲ್ಲರಲ್ಲೂ ಇದೆ. ಆದರೆ, ಸಿದ್ಧಾರ್ಥ್​ ಮತ್ತು ಕಿಯಾರಾ ಮಾತ್ರ ಮದುವೆ ಬಗ್ಗೆ ಯಾವೊಂದು ರಹಸ್ಯವನ್ನೂ ಬಿಟ್ಟುಕೊಡುತ್ತಿಲ್ಲ.

ಇದನ್ನೂ ಓದಿ: ‘ನಿನ್ನನ್ನು ನೋಡಿದ ನಂತರ …’ ಏನಾಯ್ತು ಅಂತ ಹೇಳ್ತಾರೆ ಗಣೇಶ್​

ಸಿದ್ಧಾರ್ಥ್​ ಮಲ್ಹೋತ್ರಾ ಹಾಗೂ ಕಿಯಾರಾ ಅಡ್ವಾನಿ, ಫೆಬ್ರವರಿಯಲ್ಲಿ ಮದುವೆ ಆಗುತ್ತಿದ್ದಾರಂತೆ. ಆದರೆ, ಎಲ್ಲಿ? ಯಾವತ್ತು? ಎಂಬ ಮಾಹಿತಿ ರಹಸ್ಯವಾಗಿಯೇ ಉಳಿದಿದೆ. ಆದರೆ, ಈ ಮಧ್ಯೆ ಈ ಮದುವೆ ಕುರಿತು ಒಂದು ವಿಷಯ ಹೊರಬಿದ್ದಿದೆ. ಅದೇನೆಂದರೆ, ಈ ಮದುವೆ ಬರೀ ಆಪ್ತರಿಗಷ್ಟೇ ಸೀಮಿತವಾಗಿದ್ದು, ಎರಡೂ ಕಡೆಯವರಿಂದ ಸೇರಿ ಕೇವಲ 100 ಮಂದಿ ಮಾತ್ರ ಹಾಜರಿರುತ್ತಾರೆ ಎಂದು ಹೇಳಲಾಗಿದೆ.

ಇನ್ನು, ಈ 100 ಜನರ ಪೈಕಿ ಬಾಲಿವುಡ್​ನಿಂದ ಆಹ್ವಾನವಿರುವುದು ಕೇವಲ ಇಬ್ಬರಿಗೆ ಮಾತ್ರವಂತೆ. ಒಬ್ಬರು ಕರಣ್​ ಜೋಹರ್​ ಆದರೆ, ಇನ್ನೊಬ್ಬರು ನಿರ್ಮಾಪಕಿ ಅಶ್ವಿನಿ ವರ್ಧಿ. ಈ ಇಬ್ಬರನ್ನು ಮಾತ್ರ ಈ ಜೋಡಿ ಮದುವೆಗೆ ಆಹ್ವಾನಿಸಿದೆ ಎಂಬ ಸುದ್ದಿ ಇದೆ. ಬೇರೆ ನಟ-ನಟಿಯರಂತೆ ಸಿದ್ಧಾರ್ಥ್​ ಮತ್ತು ಕಿಯಾರಾ ಸಹ ಮದುವೆಯ ನಂತರ ಬಾಲಿವುಡ್​ ಮಂದಿಗೆ ಆರತಕ್ಷತೆ ಇಟ್ಟುಕೊಂಡಿದ್ದು ಆ ಆರತಕ್ಷತೆಯ ಸ್ಥಳ ಮತ್ತು ದಿನಾಂಕದ ಬಗ್ಗೆಯೂ ಇನ್ನೂ ಮಾಹಿತಿ ಹೊರಬಿದ್ದಿಲ್ಲ.

ಇದನ್ನೂ ಓದಿ: ‘ಬಿಗ್​ ಬಾಸ್​’ ಗೆದ್ದು ಬಂದ ರೂಪೇಶ್​ ಶೆಟ್ಟಿ ಅಭಿನಯದ ಚಿತ್ರವೊಂದು 13ಕ್ಕೆ ಬಿಡುಗಡೆ

ಒಟ್ಟಾರೆ, ಸಿದ್ಧಾರ್ಥ್​ ಮಲ್ಹೋತ್ರಾ ಹಾಗೂ ಕಿಯಾರಾ ಅಡ್ವಾನಿ ಮದುವೆ ಸದ್ಯ ಬಾಲಿವುಡ್​ನಲ್ಲಿ ಸಖತ್​ ಸುದ್ದಿಯಾಗುತ್ತಿದ್ದು, ಈ ಮದುವೆಯ ಬಗ್ಗೆ ಎಕ್ಸ್​ಕ್ಲೂಸಿವ್​ ಮಾಹಿತಿ ಕೊಡುವುದಕ್ಕೆ ಎಲ್ಲರೂ ತುದಿಗಾಲಲ್ಲಿ ನಿಂತಿದ್ದಾರೆ. ಆದರೆ, ಯಾರಿಗೂ ಮಾಹಿತಿ ಸಿಗುತ್ತಿಲ್ಲ ಎನ್ನುವುದು ವಿಶೇಷ.

https://www.vijayavani.net/i-will-not-live-beyond-50-when-actor-sanjeev-kumar-predicted-death/