ಎಂಸಿಎ ಇನ್ನು ಎರಡು ವರ್ಷದ ಕೋರ್ಸ್​; ಎಇಸಿಟಿಇ ಆದೇಶ; ಹೇಗಿರಲಿದೆ ಪಠ್ಯಕ್ರಮ?

ನವದೆಹಲಿ: ಮಾಸ್ಟರ್​ ಆಫ್​ ಕಂಪ್ಯೂಟರ್​ ಅಪ್ಲಿಕೇಷನ್​ (ಎಂಸಿಎ) ಆಕಾಂಕ್ಷಿಗಳಿಗೆ ತಾಂತ್ರಿಕ ಶಿಕ್ಷಣ ಇಲಾಖೆ ಸಿಹಿ ಸುದ್ದಿಯೊಂದನ್ನು ನೀಡಿದೆ. ಇನ್ನು ಮುಂದೆ ಕೋರ್ಸ್​ ಮೂರು ವರ್ಷದ ಬದಲಾಗಿ ಎರಡು ವರ್ಷದ್ದಾಗಿರಲಿದೆ.

ಕಳೆದ ವರ್ಷವೇ ಈ ನಿರ್ಧಾರ ಕೈಗೊಳ್ಳಲಾಗಿತ್ತು. ಆದರೆ 2020-21ರ ಶೈಕ್ಷಣಿಕ ವರ್ಷದಿಂದ ಜಾರಿಗೆ ಬರಲಿದೆ ಎಂದು ಅಖಿಲ ಭಾರತೀಯ ತಾಂತ್ರಿಕ ಶಿಕ್ಷಣ ಮಂಡಳಿ (ಎಇಸಿಟಿಇ) ತಿಳಿಸಿದೆ. ಆದರೆ ಈಗಾಗಲೇ ವ್ಯಾಸಂಗ ಮಾಡುತ್ತಿರುವ ವಿದ್ಯಾರ್ಥಿಗಳು ಮೂರು ವರ್ಷ ಇದನ್ನು ವ್ಯಾಸಂಗ ಮಾಡಬೇಕಿದೆ.

ಇದನ್ನೂ ಓದಿ; ರೆಕ್ಕೆಗಳಿಲ್ಲ…! ಇದು ಅಪ್ಪಟ ಹಾರುವ ಕಾರು; ಇಸ್ರೇಲ್​ ಕಂಪನಿ ಸಾಧನೆ

ಕಳೆದ ಹಲವು ವರ್ಷಗಳಿಂದ ಇದರ ವ್ಯಾಸಂಗ ಅವಧಿಯನ್ನು ಕಡಿತಗೊಳಿಸುವ ಬಗ್ಗೆ ಚರ್ಚೆಗಳು ನಡೆದಿದ್ದವು. ಜತೆಗೆ, ಇದರ ಜನಪ್ರಿಯತೆ ಕೂಡ ಕುಂದಿತ್ತು. ಹಲವು ಕಾಲೇಜುಗಳಲ್ಲಿ ಎಂಸಿಎ ಕೋರ್ಸ್​ ರದ್ದು ಮಾಡಲಾಗಿತ್ತು. ಈ ಎಲ್ಲ ಕಾರಣಗಳಿಂದಾಗಿ ಕೋರ್ಸ್​ ಅವಧಿಯನ್ನು ಎರಡು ವರ್ಷಕ್ಕೆ ಇಳಿಸಲಾಗಿದೆ.

ಕೋರ್ಸ್​ ಅವಧಿಯನ್ನು ಕಡಿಮೆ ಮಾಡಿದ್ದರೂ, ಪಠ್ಯಕ್ರಮದಲ್ಲಿ ಯಾವುದೇ ಬದಲಾವಣೆ ಇಲ್ಲವೆಂದು ಮಂಡಳಿ ಸ್ಪಷ್ಟಪಡಿಸಿದೆ. ಏಕೆಂದರೆ, ಎಂಸಿಎಗೆ ಲ್ಯಾಟರಲ್​ ಎಂಟ್ರಿ ಕೂಡ ನೀಡಲಾಗುತ್ತದೆ. ಆ ಅಭ್ಯರ್ಥಿಗಳಿಗೆ ತೊಂದರೆಯಾಗದಿರಲು ಪಠ್ಯಕ್ರಮದಲ್ಲಿ ಬದಲಾವಣೆ ಇಲ್ಲವೆಂದು ಹೇಳಿದೆ.

ಇದನ್ನೂ ಓದಿ; ಕರೊನಾ ಕೊನೆಯಾಗೋದು ಹೇಗೆ? ಲಸಿಕೆ ಸಿಗದಿದ್ದರೆ ಬೇರೆ ದಾರಿ ಏನಿದೆ? ಇಲ್ಲಿದೆ ಕುತೂಹಲಕಾರಿ ವಿಚಾರ 

ಎಂಸಿಎಗೆ ಬಿಸಿಎ, ಬಿಎಸ್ಸಿ, ಬಿಕಾಂ, ಬಿಎ ಪದವೀಧರರಿಗೂ ಅವಕಾಶವಿದೆ. ಕನಿಷ್ಠ ಶೇ.50 ಅಂಕಗಳನ್ನು ಪಡೆದಿರಬೇಕು. ಕರ್ನಾಟಕದಲ್ಲಿ ಪಿಜಿಸಿಇಟಿ ಮೂಲಕ ಎಂಸಿಎ ಸೀಟುಗಳ ಹಂಚಿಕೆ ಮಾಡಲಾಗುತ್ತದೆ.

https://www.vijayavani.net/college-university-exams-cancel-punjab-cm-amarinder-singh-announced/