ಹೈದರಾಬಾದ್: ಇತ್ತೀಚಿನ ದಿನಗಳಲ್ಲಿ ಚಿತ್ರ-ವಿಚಿತ್ರ ಕಾರಣಗಳಿಗೆ ಮದುವೆಗಳು ಮುರಿಯುತ್ತಿರುವುದು ವರದಿಯಾಗುತ್ತಿದೆ. ಇದೀಗ ಆ ಸಾಲಿಗೆ ಮತ್ತೊಂದು ಘಟನೆ ಸೇರ್ಪಡೆಯಾಗಿದ್ದು, ಮಟನ್ ಬೋನ್ ಮ್ಯಾರೋ ಐಟಂ ಮಾಡಿಸಲಿಲ್ಲ ಅಂತ ವರನ ಕಡೆಯವರು ಮದುವೆ ಮುರಿದುಕೊಂಡಿರುವ ಪ್ರಸಂಗ ತೆಲಂಗಾಣದಲ್ಲಿ ನಡೆದಿದೆ.
ನಿಜಾಮಾಬಾದ್‌ ಮೂಲದ ವಧು ಮತ್ತು ಜಗತಿಯಾಲ್‌ ಮೂಲದ ವರನ ನಡುವೆ ಕಳೆದ ನವೆಂಬರ್‌ನಲ್ಲಿ ವಧುವಿನ ನಿವಾಸದಲ್ಲಿ ನಿಶ್ಚಿತಾರ್ಥ ನೇರವೇರಿತ್ತು. ಈ ವೇಳೆ ಊಟದ ಮೆನು ವಿಚಾರದಲ್ಲಿ ಎರಡೂ ಕುಟುಂಬಗಳ ನಡುವೆ ಉಂಟಾದ ಮನಸ್ತಾಪಕ್ಕೆ ನಿಶ್ಚಿತಾರ್ಥದಂದೇ ಮದುವೆ ಮುರಿದುಬಿದ್ದಿದೆ.
ವಧುವಿನ ಮನೆಯವರು ತಮ್ಮ ಕುಟುಂಬದ ಸದಸ್ಯರು ಮತ್ತು ವರನ ಸಂಬಂಧಿಕರು ಸೇರಿದಂತೆ ಅತಿಥಿಗಳಿಗೆ ಮಾಂಸಾಹಾರಿ ಮೆನುವನ್ನು ನಿರ್ಧರಿಸಿದ್ದರು. ಆದರೆ, ನಾವು ಹೇಳಿದಂತೆ ಮಟನ್ ಬೋನ್ ಮ್ಯಾರೋವನ್ನು ಬಡಿಸಲಿಲ್ಲ ಅಂತ ಆಕ್ರೋಶಗೊಂಡ ವರನ ಕಡೆಯವರು ಜಗಳ ಮಾಡಿ ಮದುವೆಯನ್ನೇ ರದ್ದು ಮಾಡಿದ್ದಾರೆ. ನಾವು ಊಟದ ಮೆನುವಿನಲ್ಲಿ ಮಟನ್ ಬೋನ್ ಮ್ಯಾರೋ ಸೇರಿಸಲಿಲ್ಲ ಎಂದು ಸ್ಪಷ್ಟನೆ ನೀಡಲು ಪ್ರಯತ್ನಿಸಿದರೂ ವರನ ಕಡೆಯವರು ಒಪ್ಪದೆ ಅಲ್ಲಿಂದ ಹೊರ ನಡೆದರು.
ಈ ವಿವಾದ ಕೊನೆಗೆ ಪೊಲೀಸ್ ಠಾಣೆಯ ಮೆಟ್ಟಿಲು ಸಹ ಏರಿತು. ಸ್ಥಳೀಯ ಪೊಲೀಸ್ ಠಾಣೆಯ ಅಧಿಕಾರಿಗಳು ವರನ ಕಡೆಯವರ ಮನವೊಲಿಸಲು ಪ್ರಯತ್ನಿಸಿದರು, ಆದರೆ ವಧುವಿನ ಕುಟುಂಬವು ಮಟನ್ ಬೋನ್ ಮ್ಯಾರೋ ಬಡಿಸದೆ ಅವಮಾನಿಸಿದ್ದಾರೆ ಎಂದರು. ಅಲ್ಲದೆ, ಊಟದ ಮೆನುವಿನಲ್ಲಿ ಮಟನ್ ಮೂಳೆ ಸೇರಿಸದಿರುವ ಬಗ್ಗೆ ವಧುವಿನ ಕಡೆಯವರು ನಮಗೆ ಮೊದಲೇ ತಿಳಿಸಲಿಲ್ಲ ಎಂದು ಅಸಮಾಧಾನ ಹೊರಹಾಕಿ, ಮದುವೆ ಮಾಡಿಕೊಳ್ಳಲು ಒಪ್ಪಲೇ ಇಲ್ಲ. ಅಂತಿಮವಾಗಿ ಎರಡೂ ಕುಟುಂಬದವರು ಮದುವೆಯನ್ನು ಮುರಿದುಕೊಂಡರು. (ಏಜೆನ್ಸೀಸ್)