ಈ ಉಪದೇಶವು ಕೌರವರು ಮತ್ತು ಪಾಂಡವರು ಯುದ್ದಕ್ಕೆ ಸಿದ್ಧತೆ ನಡೆಸಿದಾಗ ಕುರುಕ್ಷೇತ್ರ ರಣಕ್ಷೇತ್ರದಲ್ಲಿ ನಡೆದದ್ದು, ಅರ್ಜುನನು ತನ್ನ ಬಂಧುಗಳನ್ನು ವಧಿಸುವ ವಿಷಾದದಿಂದ ಯುದ್ಧ ಮಾಡಲಾಗದೆ ಸಂಕಟಕ್ಕೆ ಒಳಗಾದಾಗ, ಶ್ರೀಕೃಷ್ಣನು ಧರ್ಮ, ಯೋಗ, ಭಕ್ತಿ, ಜ್ಞಾನ ಕರ್ಮ ಮತ್ತು ಮೋಕ್ಷದ ಸಾರವನ್ನು ನೀಡುತ್ತಾನೆ. ಭಗವದ್ಗೀತೆಯ ಪ್ರಾಮುಖ್ಯಮತ್ತು ಮಹತ್ವ: ಇದು ಕೇವಲ ಧಾರ್ವಿುಕ ಗ್ರಂಥವಲ್ಲ, ಮಾನವ ಜೀವನಕ್ಕೆ ಮಾರ್ಗದರ್ಶನ ನೀಡುವ ವಿವಿಧ ಆಯಾಮಗಳ ತತ್ತ್ವ ದರ್ಶನ ಗ್ರಂಥ. ಯೋಗ ಮತ್ತು ಆಧ್ಯಾತ್ಮಿಕತೆಯ ಹಲವು ಮಾರ್ಗಗಳ ಕೈಪಿಡಿ. ಗೀತೆಯ ನೈತಿಕ ತತ್ತ್ವ, ಧರ್ಮ, ಕರ್ತವ್ಯ, ನಿರ್ಭೀತಿಯ ತ್ಯಾಗ ಇತ್ಯಾದಿಗಳನ್ನು ಒತ್ತಿ ಹೇಳುತ್ತದೆ. ಇದು ಯಾವುದೇ ಮತ-ಪಂಥ, ಕಾಲ ಅಥವಾ ಪ್ರದೇಶಕ್ಕೆ ಸೀಮಿತವಲ್ಲ. ಇದು ನೀತಿ ಮತ್ತು ಆಧ್ಯಾತ್ಮಿಕ ತತ್ವಗಳ ಸಾರ ತಿಳಿಸುವ ಸಾರ್ವಕಾಲಿಕ ಗ್ರಂಥ.
