ನಟ ನಾಗಾರ್ಜುನ ಪರ ಚಿತ್ರರಂಗ ಏಕೆ ಧ್ವನಿ ಎತ್ತಿಲ್ಲ? ಫ್ಯಾನ್ಸ್​ ಪ್ರಶ್ನೆಗಳಿಗೆ ಇಲ್ಲಿದೆ ಉತ್ತರ

ಹೈದರಾಬಾದ್​: ನಿನ್ನೆ (ಆ.25) ತೆಲುಗು ನಟ ಅಕ್ಕಿನೇನಿ ನಾಗಾರ್ಜುನ ಅವರಿಗೆ ಸಂಬಂಧಿಸಿದ ಮಾದಾಪುರದಲ್ಲಿರುವ ಎನ್​​ ಕನ್ವೆನ್ಷನ್​ ಹಾಲ್​ ಅನ್ನು ಹೈಡ್ರಾ ( ಹೈದ್ರಾಬಾದ್ ಡಿಸಾಸ್ಟರ್ ರೆಸ್ಪಾನ್ಸ್ ಮತ್ತು ಅಸೆಟ್ಸ್ ಮಾನಿಟರಿಂಗ್ ಮತ್ತು ಪ್ರೊಟೆಕ್ಷನ್) ಅಧಿಕಾರಿಗಳು ನೆಲಸಮ ಮಾಡುವ ಮೂಲಕ ನಟನಿಗೆ ಖಡಕ್ ಎಚ್ಚರಿಕೆ ರವಾನಿಸಿದರು. ಈ ಕುರಿತು ಸ್ವತಃ ನಾಗಾರ್ಜುನ ಅವರೇ ತಮ್ಮ ಸಾಮಾಜಿಕ ಜಾಲತಾಣದ ಖಾತೆಯಲ್ಲಿ ಬರೆದು ಬೇಸರ ಹೊರಹಾಕಿದರು. ಸದ್ಯ ಈ ವಿಷಯಕ್ಕೆ ಸಂಬಂಧಿಸಿದಂತೆ ಏಕೆ ಯಾವ ಸೆಲೆಬ್ರಿಟಿಗಳು ಪ್ರತಿಕ್ರಿಯಿಸಿಲ್ಲ? ಒಂದು ಮಾತು ಕೂಡ ವ್ಯಕ್ತಪಡಿಸಿಲ್ಲ? ಇದರ ಹಿಂದೆ ಬೇರೆ ಏನಾದರೂ ಕಾರಣವಿದೆಯೇ ಎಂದು ನೆಟ್ಟಿಗರು ಪ್ರಶ್ನಿಸಿದ್ದಾರೆ.

ಇದನ್ನೂ ಓದಿ: ಕಸ ವಿಲೇವಾರಿ ಸಮಸ್ಯೆ ಬಗೆಹರಿಸಲು ಆಗ್ರಹ

ಅಕ್ರಮವಾಗಿ ಕೆರೆಯನ್ನು ಒತ್ತುವರಿ ಮಾಡಿಕೊಂಡು ಈ ಕನ್ವೆನ್ಷನ್​ ಹಾಲ್​ನ ಕಟ್ಟಲಾಗಿದೆ ಎಂಬ ಕಾರಣದಡಿ ತೆಲಂಗಾಣ ಸಿಎಂ ರೇವಂತ್ ರೆಡ್ಡಿ ಅವರ ಹೈಡ್ರಾ ಪ್ರಾಜೆಕ್ಟ್ ನಿನ್ನೆ​ ಧ್ವಂಸಗೊಳಿಸಿತು. ಹೈಕೋರ್ಟ್​ಗೆ ತೆರಳಿ, ತಕ್ಷಣವೇ ಮಧ್ಯಂತರ ತಡೆಯಾಜ್ಞೆ ತರುವುದರೊಳಗೆ ಕಟ್ಟಡವನ್ನು ಸಂಪೂರ್ಣವಾಗಿ ನೆಲಸಮ ಮಾಡಲಾಗಿತ್ತು. ಇದರಿಂದ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ ನಟ, ಕಾನೂನಿನ ಮುಖಾಂತರ ಮನವಿ ಸಲ್ಲಿಸಲು ಹೋದರೂ ಕೂಡ ಹೀಗಾಗಿದ್ದು ನಿಜಕ್ಕೂ ನೋವು ತಂದಿದೆ ಎಂದರು.

ಇನ್ನು ನಾಗಾರ್ಜುನ ಪರ ಧ್ವನಿ ಎತ್ತಿದ ಫ್ಯಾನ್ಸ್​, ಈ ವಿಷಯದಲ್ಲಿ ಏಕೆ ಒಬ್ಬ ಸ್ಟಾರ್ ನಟ ಕೂಡ ಘಟನೆ ಬಗ್ಗೆ ಪ್ರತಿಕ್ರಿಯೆ ನೀಡಿಲ್ಲ ಎಂದು ಜಾಲತಾಣಗಳಲ್ಲಿ ಪ್ರಶ್ನಿಸಿದ್ದಾರೆ. ಅಸಲಿಗೆ ತೆಲುಗು ಚಿತ್ರರಂಗ ಈ ವಿಚಾರದಲ್ಲಿ ಮೌನ ತಾಳಲು ಇರುವುದು ಒಂದೇ ಒಂದು ಕಾರಣ. ಇದೊಂದು ಖಾಸಗಿ ವಿಷಯವಾದ ಹಿನ್ನೆಲೆ ಯಾರೊಬ್ಬರು ಸಹ ನಟನ ಪರ ಅಥವಾ ವಿರೋಧ ಮಾತನಾಡಲು ಬಯಸಿಲ್ಲ. ಇದು ನಾಗಾರ್ಜುನ ಮತ್ತು ಸರ್ಕಾರದ ನಡುವಿನ ಸಮಸ್ಯೆಯಾಗಿದೆ. ಹೀಗಾಗಿ ಈ ವಿಷಯದಲ್ಲಿ ಯಾರು ತುಟಿಬಿಚ್ಚುವ ಧೈರ್ಯ ಮಾಡಿಲ್ಲ,(ಏಜೆನ್ಸೀಸ್). 

https://www.vijayavani.net/right-to-disconnect-act-protects-employees-from-boss-calls