ಅಕ್ರಮ ಹಣ ವರ್ಗಾವಣೆ ತಡೆ ಕಾಯ್ದೆಯನ್ನು ಉಲ್ಲಂಘಿಸಿದ್ದಕ್ಕಾಗಿ 5.49 ಕೋಟಿ ರೂ. ದಂಡ ವಿಧಿಸಿರುವ ಮಾರ್ಚ್ 1ರ ಆದೇಶದಲ್ಲಿ ಈ ಅಭಿಪ್ರಾಯವನ್ನು ಅದು ವ್ಯಕ್ತಪಡಿಸಿದೆ. 4 ವರ್ಷಕ್ಕೂ ಹೆಚ್ಚು ಅವಧಿಯ ತನಿಖೆಯಿಂದ ಪೇಟಿಎಂ ವೈಫಲ್ಯ ದೃಢಪಟ್ಟಿದೆ. 2022ರ ಫೆಬ್ರವರಿ 14ರಂದೇ ಈ ಸಂಬಂಧ ಶೋಕಾಸ್ ನೋಟಿಸ್ ಕೂಡ ನೀಡಲಾಗಿತ್ತು. ವಿದೇಶಿ ಸಂಪರ್ಕ ಹೊಂದಿರುವ ಸಂಸ್ಥೆಗಳು ಮತ್ತು ವ್ಯಕ್ತಿಗಳಿಂದ ಪೇಟಿಎಂ ಬ್ಯಾಂಕ್ನಲ್ಲಿ ಗ್ಯಾಂಬ್ಲಿಂಗ್ನಂತಹ ಸಾಕಷ್ಟು ಅಕ್ರಮ ಆರ್ಥಿಕ ಚಟುವಟಿಕೆಗಳು ನಡೆಯುತ್ತಿವೆ; ಅದರಿಂದ ಬಂದ ಹಣವನ್ನು ಇದೇ ಬ್ಯಾಂಕಿನ ಖಾತೆಗಳ ಮೂಲಕ ಹೊರಕ್ಕೆ ಕಳಿಸಲಾಗುತ್ತಿದೆ ಎಂಬ ದೂರುಗಳ ಹಿನ್ನೆಲೆಯಲ್ಲಿ 2020ರಿಂದಲೇ ಕಾನೂನು ಪ್ರಕ್ರಿಯೆ ಆರಂಭವಾಗಿತ್ತು. ನಂತರ ಹೈದರಾಬಾದ್ನ ಸೈಬರ್ ಅಪರಾಧ ಘಟಕವು ತೆಲಂಗಾಣದ ಜೂಜು ನಿಷೇಧ ಕಾಯ್ದೆ ಮತ್ತು ಭಾರತೀಯ ದಂಡಸಂಹಿತೆಯ ವಿವಿಧ ಸೆಕ್ಷನ್ಗಳಡಿ ಎಫ್ಐಆರ್ ದಾಖಲಿಸಿತ್ತು. ಈ ವ್ಯಕ್ತಿಗಳು ನಿಷೇಧಿತ ಡೇಟಿಂಗ್, ಗ್ಯಾಂಬ್ಲಿಂಗ್, ಸ್ಟ್ರೀಮಿಂಗ್ ಸೇವೆಗಳ ಮೂಲಕ ಲಕ್ಷಾಂತರ ಭಾರತೀಯರಿಗೆ ವಂಚನೆ ಮಾಡಿರುವುದು ಮತ್ತು ಹಣವನ್ನು ವಿದೇಶಗಳಿಗೆ ಕಳಿಸಿರುವುದು ತನಿಖೆ ವೇಳೆ ಗೊತ್ತಾಗಿತ್ತು. ಇಂತಹ 34 ಫಲಾನುಭವಿ ಖಾತೆಗಳಿದ್ದರೂ ಬ್ಯಾಂಕ್ ಮೌನ ವಹಿಸಿತ್ತು ಎಂದು ಗುಪ್ತಚರ ಘಟಕ ತನ್ನ ಆದೇಶದಲ್ಲಿ ವಿವರಿಸಿದೆ.
