‘ಗುಲ್ಟೂ’ ಚಿತ್ರದ ಮೂಲಕ ನಾಯಕನಾಗಿ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿದ ನವೀನ್ ಶಂಕರ್, ಡೆಬ್ಯೂ ಚಿತ್ರದಲ್ಲೇ ಭರವಸೆ ಮೂಡಿಸಿದ್ದರು. ಆ ಬಳಿಕ ‘ಧರಣಿ ಮಂಡಲ ಮಧ್ಯದೊಳಗೆ’ ಚಿತ್ರದಲ್ಲಿ ನಟಿಸಿದ್ದ ಅವರು, ಸದ್ಯ ನಾಲ್ಕು ಚಿತ್ರಗಳಲ್ಲಿ ಬಿಜಿಯಿದ್ದಾರೆ. ವಿಶೇಷ ಅಂದರೆ ಕಳೆದ ಎರಡು ವರ್ಷಗಳಲ್ಲಿ ಮೂರು ಚಿತ್ರಗಳಿಗಾಗಿ ಮೂರು ಬಾರಿ ತೂಕ ಇಳಿಸಿಕೊಂಡು, ಹೆಚ್ಚಿಸಿಕೊಂಡಿದ್ದಾರೆ. ‘ನಾನು ಮೊದಲಿಂದಲೂ ಸಣ್ಣ ಇದ್ದೆ. ‘ನೋಡಿದವರು ಏನಂತಾರೆ’ ಚಿತ್ರಕ್ಕಾಗಿ ಮತ್ತಷ್ಟು ತೂಕ ಇಳಿಸಿಕೊಳ್ಳಬೇಕಾಯಿತು. ಕೇವಲ 28 ದಿನಗಳಲ್ಲಿ 12 ಕೆಜಿ ತೂಕ ಕಡಿಮೆಯಾಗಬೇಕಿತ್ತು. 64 ಕೆಜಿ ತೂಕವಿದ್ದವನು, 51 ಕೆಜಿಗೆ ಇಳಿಸಿಕೊಂಡೆ. ಬಳಿಕ ‘ಕ್ಷೇತ್ರಪತಿ’ ಚಿತ್ರಕ್ಕಾಗಿ ತೂಕ ಹೆಚ್ಚಿಸಿಕೊಳ್ಳಬೇಕಾಗಿ ಬಂತು. ಆಗ ಮತ್ತೆ 63 ಕೆಜಿವರೆಗೆ ತೂಕ ಹೆಚ್ಚಿಸಿಕೊಂಡೆ. ನಂತರ ಡಾಲಿ ಧನಂಜಯ ಅವರು ನಾಯಕನಾಗಿರುವ ‘ಹೊಯ್ಸಳ’ ಚಿತ್ರಕ್ಕಾಗಿ ಮತ್ತಷ್ಟು ತೂಕ ಹೆಚ್ಚಿಸಿಕೊಳ್ಳಬೇಕಾಯಿತು. ಆಗ 76 ಕೆಜಿವರೆಗೆ ತೂಕ ಹೆಚ್ಚಿಸಿಕೊಂಡೆ. ಹೀಗೆ ಎರಡು ವರ್ಷಗಳಲ್ಲಿ ಮೂರು ಬಾರಿ ತೂಕ ಇಳಿಸಿಕೊಂಡು, ಹೆಚ್ಚಿಸಿಕೊಳ್ಳಬೇಕಾಯಿತು’ ಎಂದು ಮಾಹಿತಿ ಹಂಚಿಕೊಳ್ಳುತ್ತಾರೆ.
