ಬೆಂಗಳೂರು: ವಿವಿಧ ಜಿಲ್ಲೆಗಳಲ್ಲಿ ವಾರಾಂತ್ಯ ಕರ್ಫ್ಯೂ ಜಾರಿಯಲ್ಲಿದ್ದು, ಅದನ್ನು ತೆಗೆಯಬೇಕೆಂದು ಸಚಿವರು ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಮೇಲೆ ಒತ್ತಡ ಹೇರಿದ ಪ್ರಸಂಗ ಶನಿವಾರ ಸಂಪುಟ ಸಭೆಯಲ್ಲಿ ನಡೆದಿದೆ. ಇನ್ನೊಂದು ಬಾರಿ ಜಿಲ್ಲೆಗಳಿಂದ ವರದಿ ತರಿಸಿಕೊಂಡು, ತಜ್ಞರ ಜತೆ ಚರ್ಚೆ ಮಾಡಿ ವಾರಾಂತ್ಯ ಕರ್ಫ್ಯೂ ತೆಗೆಯುವ ಬಗ್ಗೆ ತೀರ್ವನಿಸಲು ನಿರ್ಧರಿಸಲಾಯಿತು. ಇನ್ನೊಂದೆರೆಡು ದಿನಗಳಲ್ಲೇ ಈ ಬಗ್ಗೆ ಸಿಎಂ ನಿರ್ಧಾರ ಪ್ರಕಟಿಸುವ ಸಾಧ್ಯತೆ ಇದೆ. ಸಾರ್ವಜನಿಕ ಗಣೇಶೋತ್ಸವ ಆಚರಣೆ ವಿಷಯ ಚರ್ಚೆಗೆ ಬಂದಿತ್ತು. ಕೋವಿಡ್ ಮಾರ್ಗಸೂಚಿ ಪ್ರಕಾರ, ಆಚರಣೆ ಹೇಗೆಂಬ ಪ್ರಶ್ನೆ ಎದುರಾಯಿತು. ಇನ್ನೂ ಕೆಲವು ಜಿಲ್ಲೆಗಳಲ್ಲಿ ನೈಟ್ ಕರ್ಫ್ಯೂ ಇದೆ, ನೂರು ಜನ ಸೇರಬಾರದು ಎಂದು ಮಾರ್ಗಸೂಚಿ ಹೇಳುತ್ತದೆ. ಹೀಗಾಗಿ ಇಡೀ ರಾಜ್ಯಕ್ಕೆ ಒಂದು ಪಾಲಿಸಿ ಪ್ರಕಟಿಸಿಲು ತಜ್ಞರ ಸಮಿತಿ, ಡಿಸಿ-ಎಸ್ಪಿಗಳ ಜತೆ ಚರ್ಚೆ ಮಾಡಿ ತೀರ್ವನಿಸಲು ಸಂಪುಟ ಸಭೆ ಸಿಎಂಗೆ ಅಧಿಕಾರ ನೀಡಿತು. ರಾಜ್ಯದಲ್ಲಿ ಬಂಡವಾಳ ಹೂಡಿಕೆಗಾಗಿ ಸಮಾಲೋಚಕರು, ಚಿಂತಕ ಪಾಲುದಾರರಾಗಿ ಬೋಸ್ಟನ್ ಕನ್ಸೆಲ್ಟಿಂಗ್ ಗ್ರೂಪ್ ಇಂಡಿಯಾ ಸೇವೆ ನೀಡುತ್ತಿದ್ದು, ಅವರಿಗೆ ಮುಂದಿನ 12 ತಿಂಗಳ ಅವಧಿಗೆ ವರ್ಷಕ್ಕೆ 12 ಕೋಟಿಯಂತೆ ವಿಸ್ತರಣೆಗೆ ಸಂಪುಟ ಸಭೆಯಲ್ಲಿ ಅನುಮತಿ ನೀಡಲಾಗಿದೆ.
