ಬೇರೆ ವಿಷಯಗಳಲ್ಲಿ ಏನಾದರೂ ಇರಲಿ, ತಾಂತ್ರಿಕ ವಿಷಯಗಳಲ್ಲಿ ‘ವಿಕ್ರಾಂತ್ ರೋಣ’ ಬಹಳ ಅಪ್ಡೇಟ್ ಆಗಿರುವ ಸಿನಿಮಾ. ಛಾಯಾಗ್ರಹಣ, ಗ್ರಾಫಿಕ್ಸ್, ಕಲಾ ನಿರ್ದೇಶನ, ಹಿನ್ನೆಲೆ ಸಂಗೀತ ... ಹೀಗೆ ಹಲವು ವಿಭಾಗಗಳು ಒಂದಕ್ಕೊಂದು ಪೂರಕವಾಗಿ ಕೆಲಸ ಮಾಡಿವೆ. ಕಾಡು ಮತ್ತು ಹಳೆಯ ದೇವಸ್ಥಾನವನ್ನು ಶಿವಕುಮಾರ್ ಕಟ್ಟಿರುವ ರೀತಿ, ಅದನ್ನು ಮಂದಬೆಳಕಿನಲ್ಲಿ ವಿಲಿಯಮ್ ಡೇವಿಡ್ ತೋರಿಸುವ ರೀತಿ ಎಲ್ಲವೂ ಅದ್ಭುತವಾಗಿದೆ. ಇನ್ನು, ಒಂದೇ ಶಾಟ್ನಲ್ಲಿ ಮೂಡಿಬಂದಿರುವ ಕ್ಲೈಮ್ಯಾಕ್ಸ್ ಫೈಟ್ ಚಿತ್ರದ ಇನ್ನೊಂದು ಹೈಲೈಟ್ ಎಂದರೆ ತಪ್ಪಲ್ಲ. ಇಡೀ ಚಿತ್ರದಲ್ಲಿ ಹಲವು ತಂತ್ರಜ್ಞರ ಶ್ರಮ ಎದ್ದು ಕಾಣುತ್ತದೆ. ಅವರೆಲ್ಲರ ಜತೆಗೆ ಕಥೆ ಕಟ್ಟಿಕೊಡುವಲ್ಲಿ ಅನೂಪ್ ಸಹ ಇನ್ನಷ್ಟು ಶ್ರಮ ವಹಿಸಿದ್ದರೆ, ‘ವಿಕ್ರಾಂತ್ ರೋಣ’ ನಿಜಕ್ಕೂ ಪ್ಯಾನ್ ವರ್ಲ್ಡ್ ಸಿನಿಮಾ ಆಗುತ್ತಿತ್ತು. ‘ವಿಕ್ರಾಂತ್ ರೋಣ’, ಸುದೀಪ್ ಪಾಲಿಗೆ ವಿಶೇಷವಾದ ಸಿನಿಮಾ. ಈ ತರಹದ ಬೇರೆ ಪರಿಸರದ ಒಂದು ಚಿತ್ರದಲ್ಲಿ ಅವರು ಈ ಹಿಂದೆ ನಟಿಸಿರಲಿಲ್ಲ. ಹಾಗಾಗಿ, ಇದು ಅವರಿಗೆ ವಿಭಿನ್ನ. ಜಾಕ್ಲೀನ್ಗೆ ಹಾಡು ಬಿಟ್ಟರೆ ಹೆಚ್ಚು ಕೆಲಸವಿಲ್ಲ. ಚಿತ್ರದಲ್ಲಿ ನಿರೂಪ್ ಭಂಡಾರಿ, ನೀತಾ ಅಶೋಕ್, ಮಧುಸೂಧನ್ ರಾವ್ ಸೇರಿದಂತೆ ಹಲವು ಪಾತ್ರಗಳಿದ್ದರೂ, ಯಾರೂ ಹೆಚ್ಚು ಗಮನದಲ್ಲಿ ಉಳಿಯುವುದಿಲ್ಲ.
