ಅಗ್ನಿಪಥಕ್ಕೆ ಯುವ ಸಮುದಾಯದ ಸ್ವಾಗತ

ಬೆಂಗಳೂರು: ದೇಶದ ಯುವಜನರಿಗೆ ಸೇನೆಯಲ್ಲಿ ನಾಲ್ಕು ವರ್ಷಗಳ ಕಿರುಅವಧಿಗೆ ಸೇವೆ ಸಲ್ಲಿಸಲು ಅವಕಾಶ ನೀಡುವ ಅಗ್ನಿಪಥ ಯೋಜನೆ ಈಗ ದೇಶಾದ್ಯಂತ ಚರ್ಚೆಯ ವಿಷಯ. ಈ ಯೋಜನೆ ವಿರುದ್ಧ ದೇಶದ ಹಲವೆಡೆ ಪ್ರತಿಭಟನೆ ನಡೆದರೂ, ಮತ್ತೊಂದೆಡೆ ಲಕ್ಷಾಂತರ ಆಕಾಂಕ್ಷಿಗಳು ಉದ್ಯೋಗಕ್ಕೆ ಅರ್ಜಿ ಸಲ್ಲಿಸುತ್ತಿದ್ದಾರೆ. ಪ್ರತಿಪಕ್ಷಗಳು ಈ ಯೋಜನೆಯನ್ನು ತೀವ್ರವಾಗಿ ವಿರೋಧಿಸುತ್ತಿವೆ. ಅಲ್ಪಕಾಲ ಸೇನೆಯಲ್ಲಿ ಕಾರ್ಯನಿರ್ವಹಿಸಿದ ಬಳಿಕ ಅಗ್ನಿವೀರರ ಭವಿಷ್ಯ ಏನು ಎಂಬ ಚಿಂತೆಯೂ ಹಲವರಲ್ಲಿದೆ. ಪ್ರಸ್ತುತ ಯೋಜನೆಗೆ ಅರ್ಹರೆನಿಸಿದ 17ರಿಂದ 23 ವಯೋಮಾನದವರ ಮನಸ್ಸಿನಲ್ಲೇನಿದೆ ಎಂಬುದನ್ನು ಅರಿಯುವ ಪ್ರಯತ್ನವನ್ನು ಕನ್ನಡದ ನಂ.1 ದಿನಪತ್ರಿಕೆ ವಿಜಯವಾಣಿ ವಿಶೇಷ ಸಮೀಕ್ಷೆ ಮೂಲಕ ಮಾಡಿದೆ. ‘ಅಗ್ನಿಪಥ’ ಯೋಜನೆ ಬಗ್ಗೆ ಯುವ ಸಮುದಾಯ ಉತ್ಸುಕರಾಗಿರುವುದು ಸಮೀಕ್ಷೆಯಲ್ಲಿ ಕಂಡುಬಂದಿದೆ. ಇದೇ ವೇಳೆ 4 ವರ್ಷ ಸೈನ್ಯದಲ್ಲಿ ಸೇವೆ ಸಲ್ಲಿಸಿದ ಬಳಿಕ ಭವಿಷ್ಯವೇನು ಎಂಬ ಆತಂಕ ಹಲವರಲ್ಲಿದೆ. ಅಚ್ಚರಿ ಸಂಗತಿ ಎಂದರೆ ಸಮೀಕ್ಷೆಯಲ್ಲಿ ಪಾಲ್ಗೊಂಡ ಶೇ. 64 ವಿದ್ಯಾರ್ಥಿಗಳು ಅರ್ಹತಾ ಪರೀಕ್ಷೆಗಳಲ್ಲಿ ತೇರ್ಗಡೆಯಾದರೆ ಅಗ್ನಿಪಥ ಸೇರಲು ಸಿದ್ಧ ಎಂದು ಹೇಳಿಕೊಂಡಿದ್ದಾರೆ.

ಯುವ ಸಮುದಾಯದಲ್ಲಿ ಹೊಸ ಚಿಂತನೆ: ಅಗ್ನಿಪಥ ಯೋಜನೆ ಯುವ ಸಮುದಾಯದಲ್ಲಿ ಹೊಸ ಚಿಂತನೆ ಒರೆಗೆಹಚ್ಚಿದೆ. ಮನೆ, ಕಾಲೇಜು ಮತ್ತು ಹರಟೆ ಕಟ್ಟೆಗಳಲ್ಲಿ ಯೋಜನೆ ಬಗ್ಗೆ ಯುವ ಸಮುದಾಯ ಚರ್ಚೆ ನಡೆಸಿದ್ದಾರೆ. ಹೆಚ್ಚಿನ ವಿದ್ಯಾರ್ಥಿಗಳು ಅಗ್ನಿವೀರರಾಗಲು ಆಸಕ್ತಿ ಇದೆ ಎಂದು ಹೇಳಿಕೊಂಡಿರುವುದು ಕುತೂಹಲಕಾರಿ. ಇನ್ನೊಂದು ಅಚ್ಚರಿ ಎಂದರೆ ಅರ್ಧದಷ್ಟು ಮಂದಿ ತಾವು ಸೇನೆಯಲ್ಲಿ ನಾಲ್ಕು ವರ್ಷ ಸೇವೆ ಸಲ್ಲಿಸಿ ಬರುವುದಕ್ಕೆ ಸಿದ್ಧ, ಮನೆಯಲ್ಲಿ ಒಪ್ಪುವುದು ಕಷ್ಟ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಈ ಯೋಜನೆ ಪ್ರಕಟಗೊಂಡಾಗ ಅನೇಕರು ಶೈಕ್ಷಣಿಕವಾಗಿ ಮಕ್ಕಳ ಭವಿಷ್ಯ ಕಮರುತ್ತದೆ ಎಂದು ಆತಂಕ ವ್ಯಕ್ತಪಡಿಸಿದ್ದರು. ಪಿಯುಸಿ ಅಥವಾ ಪದವಿ ಹಂತದಲ್ಲಿದ್ದವರು ನಾಲ್ಕು ವರ್ಷದಲ್ಲಿ ಸೈನ್ಯದಲ್ಲಿ ಕೆಲಸ ಮಾಡಲು ಹೊರಟರೆ ಶೈಕ್ಷಣಿಕವಾಗಿ ಹಿನ್ನಡೆಯಾಗುತ್ತದೆ ಎಂಬ ಮಾತುಗಳು ಕೇಳಿಬಂದಿತ್ತು. ಸ್ಪರ್ಧಾತ್ಮಕ ಯುಗದಲ್ಲಿ ಉನ್ನತ ಶಿಕ್ಷಣವೇ ಪ್ರಮುಖ ಪಾತ್ರ ಎಂದು ಪೋಷಕರು ಹೇಳಿಕೊಂಡಿದ್ದರು. ಈ ವಿಚಾರದಲ್ಲಿ ವಿದ್ಯಾರ್ಥಿಗಳ ಮನದಲ್ಲೇನಿದೆ ಎಂದು ತಿಳಿಯುವ ಪ್ರಯತ್ನ ಮಾಡಲಾಗಿತ್ತು. ಶೇ.37ಕ್ಕಿಂತ ಹೆಚ್ಚು ಮಕ್ಕಳಲ್ಲಿ ಶೈಕ್ಷಣಿಕ ಹಿನ್ನಡೆಯಾಗುವ ಆತಂಕವಿದೆ. ಶೈಕ್ಷಣಿಕವಾಗಿ ಹಿನ್ನಡೆ ಏನು ಆಗದು ಎಂದು ಹೇಳುವವರ ಸಂಖ್ಯೆಯೂ ಹೆಚ್ಚಿದೆ.

ಸಮೀಕ್ಷೆ ಹೇಗೆ ನಡೆಯಿತು?: ರಾಜ್ಯಾದ್ಯಂತ ನಮ್ಮ ವರದಿಗಾರರು ಖುದ್ದು ವಿದ್ಯಾರ್ಥಿಗಳ ಬಳಿಗೆ ತೆರಳಿ, ಸಮೀಕ್ಷೆಗೆಂದೇ ಸಿದ್ಧಪಡಿಸಿದ್ದ ತಂತ್ರಾಂಶದ ಮೂಲಕ ಅಭಿಪ್ರಾಯ ಸಂಗ್ರಹಿಸಿದ್ದಾರೆ. ವಿದ್ಯಾರ್ಥಿಗಳೊಂದಿಗೆ ಸಾರ್ವಜನಿಕರಿಂದಲೂ ಕೂಡ ಅಭಿಪ್ರಾಯ ಕಲೆಹಾಕಿದ್ದು, ಒಟ್ಟಾರೆ ಎರಡು ಸಾವಿರ ಮಂದಿಯ ಪ್ರಾತಿನಿಧಿಕ ಅಭಿಪ್ರಾಯವನ್ನು ಸಂಗ್ರಹಿಸಿ ವಿಶ್ಲೇಷಿಸಲಾಗಿದೆ.

ಟೀಕೆಗಳೇನು?: ಈ ಯೋಜನೆಯಿಂದ ನಿರುದ್ಯೋಗಿಗಳ ಸಂಘ ನಿರ್ಮಾಣವಾಗುತ್ತದೆ. ಯುವಕರು ಮಾನಸಿಕವಾಗಿ ಕುಗ್ಗುತ್ತಾರೆ. ಆಸಕ್ತರು ಹೇಗಿದ್ದರೂ ಸೈನ್ಯಕ್ಕೆ ಸೇರುತ್ತಿರುವಾಗ ಅಗ್ನಿವೀರ ಯೋಜನೆ ತರುವ ಅನಿವಾರ್ಯತೆ ಏನಿರಲಿಲ್ಲ, ಸೈನ್ಯವನ್ನು ದುರ್ಬಲಗೊಳಿಸಬಹುದು ಎಂದು ಕೆಲವು ವಿದ್ಯಾರ್ಥಿಗಳು ಅಭಿಪ್ರಾಯ ತಿಳಿಸಿದ್ದಾರೆ.

ರಾಜ್ಯದಲ್ಲಿ ಆಯ್ಕೆ ಯಾವಾಗ?

• ರಾಜ್ಯದಲ್ಲಿ ಮೊದಲ ಹಂತದ ನೇಮಕ ಪ್ರಕ್ರಿಯೆ ಆರಂಭವಾಗಿದ್ದು, ಜುಲೈ 30ರೊಳಗೆ ಹೆಸರು ನೋಂದಾಯಿಸಿಕೊಳ್ಳಬೇಕು. ಆಗಸ್ಟ್ 10ರಂದು ಹಾಸನದಲ್ಲಿ ರ‍್ಯಾಲಿ ನಡೆಯಲಿದೆ.
• ಬೆಂಗಳೂರು ನಗರ, ಬೆಂ.ಗ್ರಾಮಾಂತರ, ತುಮಕೂರು, ಮಂಡ್ಯ, ಮೈಸೂರು, ಬಳ್ಳಾರಿ, ಚಾಮರಾಜನಗರ, ರಾಮನಗರ, ಕೊಡಗು, ಕೋಲಾರ, ಚಿಕ್ಕಬಳ್ಳಾಪುರ, ಹಾಸನ, ಚಿತ್ರದುರ್ಗ, ವಿಜಯನಗರ ಜಿಲ್ಲೆಯವರು ಪಾಲ್ಗೊಳ್ಳಲು ಅವಕಾಶವಿದೆ.
• ಅಗ್ನಿವೀರ ಸಾಮಾನ್ಯ ಕರ್ತವ್ಯ, ಅಗ್ನಿವೀರ್ ತಾಂತ್ರಿಕ, ಅಗ್ನಿವೀರ ಟ್ರೇಡ್ಸ್​ಮನ್, ಅಗ್ನಿವೀರ್ ಕ್ಲರ್ಕ್ ಹಾಗೂ ಸ್ಟೋರ್ ಕೀಪರ್ ಕೆಲಸಗಳಿಗಾಗಿ ಆಯ್ಕೆ ನಡೆಯಲಿದ್ದು, ಶೈಕ್ಷಣಿಕ ಮಾಹಿತಿಯನ್ನು ಸೇನೆಯು ಈಗಾಗಲೆ ಪ್ರಕಟಿಸಿದೆ.
• https://joinindianarmy.nic.in ನಲ್ಲಿ ಮೊದಲು ಹೆಸರು ನೋಂದಣಿ ಮಾಡಿಸ ಬೇಕು. ಆ.1ರ ಬಳಿಕ ಅಡ್ಮಿಟ್ ಕಾರ್ಡ್​ಅನ್ನು ಅಭ್ಯರ್ಥಿಗೆ ಕಳಿಸಲಾಗುತ್ತದೆ. ಪ್ರಿಂಟ್ ಮಾಡಿ ರ್ಯಾಲಿಗೆ ತರುವುದು ಕಡ್ಡಾಯ.
• ರ್ಯಾಲಿಯಲ್ಲಿ ಯಾವೆಲ್ಲ ಪ್ರಮಾಣ ಪತ್ರ ಹಾಜರುಪಡಿಸ ಬೇಕೆಂಬುದನ್ನು ಅಧಿಸೂಚನೆಯಲ್ಲಿ ಪ್ರಕಟಿಸಲಾಗಿದೆ. ಮುಖ್ಯವಾಗಿ ಅಫಿಡೆವಿಟ್ ಕೊಡಬೇಕಾ ಗುತ್ತದೆ. ಕ್ರೀಡಾ ಕ್ಷೇತ್ರದಲ್ಲಿ ಸಾಧನೆ ಮಾಡಿದವರಿಗೆ ಬೋನಸ್ ಅಂಕಗಳು ಕೊಡಲಾಗುತ್ತದೆ.

• ಅಗ್ನಿವೀರರಾಗಿ ಸೇವೆ ಸಲ್ಲಿಸಿ ವಾಪಸಾದ ಬಳಿಕ ನಿರ್ದಿಷ್ಟವಾಗಿ ಉದ್ಯೋಗ ಕೊಡಬೇಕು. ಕೇಂದ್ರ ಅಥವಾ ರಾಜ್ಯ ಸರ್ಕಾರ ಕೂಡಲೇ ಕಾನೂನು ರೂಪಿಸಬೇಕು ಅಥವಾ ಇರುವ ಕಾನೂನಿಗೆ ತಿದ್ದುಪಡಿ ಮಾಡಿ ಮೀಸಲು ಕಲ್ಪಿಸಬೇಕು.
• ಯೋಜನೆ ಬಗ್ಗೆ ಮಾಹಿತಿ ಕೊರತೆ ಇದೆ. ಸರ್ಕಾರ ಮೊದಲು ಅದನ್ನು ತಿಳಿಸಿಕೊಡಬೇಕು. ಪ್ರತಿ ಕಾಲೇಜಲ್ಲೂ ಜಾಗೃತಿ ಕಾರ್ಯಕ್ರಮ ನಡೆಸಲಿ.
• ದೀರ್ಘಕಾಲದ ಸೇನಾ ಸೇವೆಗೆಂದರೆ ಕೆಲವು ಪೋಷಕರು ಹಿಂದೇಟು ಹಾಕುತ್ತಿದ್ದರು, ಆದರೀಗ ದೇಶಸೇವೆಗೆ ಅವಕಾಶ, ಯಾವುದೇ ಕಾರಣಕ್ಕೂ ಯೋಜನೆ ಹಿಂಪಡೆಯಬಾರದು.
• ಅಗ್ನಿವೀರರ ಪೈಕಿ ಶೇ.25ರಷ್ಟು ಜನರನ್ನು ಮಾತ್ರ ಖಾಯಂಗೊಳಿಸುವ ನಿಯಮ ಸಡಿಲಿಸಿ, ಮುಂದುವರಿಯಲು ಆಸಕ್ತರೆಲ್ಲರಿಗೂ ಅವಕಾಶ ಕೊಡಲಿ. ಇಲ್ಲವೇ ಪೊಲೀಸರನ್ನಾಗಿ ನೇಮಿಸಲಿ.
• ಎನ್​ಸಿಸಿ, ಎನ್​ಎಸ್​ಎಸ್ ಮಾದರಿ ಅಗ್ನಿವೀರ ತರಬೇತಿ ಘಟಕಗಳು ಪ್ರತಿ ಕಾಲೇಜಿನಲ್ಲೂ ನಿವೃತ್ತ ಸೈನಿಕರ ನೇತೃತ್ವದಲ್ಲಿ ಆರಂಭವಾಗಲಿ, ಆಸಕ್ತರನ್ನು ತಯಾರಿ ಮಾಡಲು ಅನುವಾಗುತ್ತದೆ.
• ಶೈಕ್ಷಣಿಕವಾಗಿ ಮುಖ್ಯವಾದ ನಾಲ್ಕು ವರ್ಷ ಕಳೆದುಕೊಳ್ಳುವ ಕಾರಣ, ಎರಡು ವರ್ಷದಲ್ಲೇ ಹೊರಬರುವ ಅವಕಾಶವನ್ನೂ ನೀಡಲಿ. ಈ ಬಗ್ಗೆ ಬೇರೆ ದೇಶದ ನಿಯಮ ಅಧ್ಯಯನ ಆಗಲಿ.

https://www.vijayavani.net/tanker-car-accident-two-people-died-at-spot/

https://www.vijayavani.net/sp-warning-to-prostitution-woman/