ಕರೊನಾ ಸೋಂಕಿನ ಪ್ರಕರಣಗಳು ಇಳಿಮುಖವಾಗುತ್ತವೆ ಎಂಬ ನಿರೀಕ್ಷೆ ಸದ್ಯಕ್ಕಂತೂ ಹುಸಿಯಾಗಿದೆ. ರಾಷ್ಟ್ರದ ಸರಾಸರಿ ನೋಡಿದರೆ ಮರಣಪ್ರಮಾಣ ನಿಯಂತ್ರಣದಲ್ಲಿದೆಯಾದರೂ, ಸೋಂಕಿತರ ಸಂಖ್ಯೆ ಹೆಚ್ಚುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಜನಪ್ರತಿನಿಧಿಗಳು, ಗಣ್ಯರು ಸೋಂಕಿಗೆ ಬಲಿಯಾಗುತ್ತಿರುವುದು ಜನಸಾಮಾನ್ಯರಲ್ಲಿ ಸ್ವಲ್ಪಮಟ್ಟಿನ ಆತಂಕ ಮೂಡಿಸಿದೆ. ಕೆಲ ದಿನಗಳ ಹಿಂದಷ್ಟೇ ರಾಜ್ಯಸಭಾ ಸದಸ್ಯ ಅಶೋಕ್ ಗಸ್ತಿ ಕರೊನಾಗೆ ಬಲಿಯಾದ ಕಹಿಘಟನೆ ಮರೆಯುವ ಮುನ್ನವೇ ಬುಧವಾರ ಕೇಂದ್ರ ರೈಲ್ವೆ ರಾಜ್ಯ ಸಚಿವ ಸುರೇಶ ಅಂಗಡಿ, ಗುರುವಾರ ಬಸವಕಲ್ಯಾಣ ಶಾಸಕ ನಾರಾಯಣ್ ರಾವ್ ನಿಧನದ ಸುದ್ದಿ ಕಳವಳ ಮೂಡಿಸಿದೆ. ಕೆಲ ಜನಪ್ರತಿನಿಧಿಗಳು ಚೇತರಿಸಿಕೊಂಡು, ಆಸ್ಪತ್ರೆಯಿಂದ ಮರಳಿದ ನಿದರ್ಶನಗಳೂ ಇವೆ. ಆದರೆ, ಈ ಕಾಯಿಲೆ ಬಗ್ಗೆ ಭಯ ವ್ಯಾಪಿಸುತ್ತಿರುವುದನ್ನು ಅಲ್ಲಗಳೆಯಲಾಗುವುದಿಲ್ಲ. ಅದರಲ್ಲೂ, ದೇಶದ 7 ರಾಜ್ಯಗಳ 60 ಜಿಲ್ಲೆಗಳಲ್ಲಿ (ಕರ್ನಾಟಕದ 9) ಸೋಂಕು ಪ್ರಕರಣಗಳು ಹೆಚ್ಚುತ್ತಲೇ ಇವೆ. ಹಾಗಂತ, ಭಯಭೀತರಾಗಿ, ಮನೋಬಲ ಕಳೆದುಕೊಂಡರೆ ಅಪಾಯ ಹೆಚ್ಚು. ಸೋಂಕು ಪ್ರಸರಣದ ವೇಗವನ್ನು ತಗ್ಗಿಸುವ, ವೈಯಕ್ತಿಕವಾಗಿಯೂ ಮುನ್ನೆಚ್ಚರಿಕಾ ಕ್ರಮಗಳನ್ನು ಕೈಗೊಳ್ಳುವ ಅಗತ್ಯವಿದೆ.
