ಗ್ರಾಮ ಮಟ್ಟದಿಂದ ಹಿಡಿದು, ತಾಲೂಕು, ಜಿಲ್ಲಾ ಮಟ್ಟದಲ್ಲಿ ಅಲ್ಲಿನ ಬೆಳೆಗಳಿಗೆ ತಕ್ಕಂತೆ ಆಹಾರ ಸಂಸ್ಕರಣಾ ಘಟಕಗಳ ಸ್ಥಾಪನೆ ಮಾಡುವ ಉದ್ದೇಶ ಇದ್ದು, ಇದಕ್ಕಾಗಿ ಸರ್ಕಾರ ಆತ್ಮನಿರ್ಭರ ಯೋಜನೆಯಲ್ಲಿ 10 ಸಾವಿರ ಕೋಟಿ ರೂ. ಮೊತ್ತ ಪಡೆಯಲು ಯೋಜನೆ ರೂಪಿಸುತ್ತಿದೆ. ಮೂಲಸೌಕರ್ಯಕ್ಕೂ ಆದ್ಯತೆ ಸಿಗುತ್ತಿರುವುದು ಸ್ವಾಗತಾರ್ಹ. ಗೋದಾಮು, ಶೀತಲೀಕರಣ ಘಟಕ, ಸಂಸ್ಕರಣಾ ಘಟಕ ಸ್ಥಾಪಿಸುವುದರಿಂದ ಮೌಲ್ಯವರ್ಧನೆ ಮಾಡಲು ಸಹಾಯವಾಗಲಿದೆ. ಆಹಾರ ಸಂಸ್ಕರಣಾ ಘಟಕಗಳ ಸ್ಥಾಪನೆ ಮೂಲಕ 10 ಸಾವಿರ ಜನರಿಗೆ ಕೆಲಸ ಸಿಗುವ ಭರವಸೆ ಇದೆ. ಈ ಯೋಜನೆ ರಾಜ್ಯದಲ್ಲಿನ ಉದ್ಯಮಶೀಲತೆಗೂ ಸವಾಲು ಹೌದೂ, ಅವಕಾಶವೂ ಹೌದು. ಸಾಂಪ್ರದಾಯಿಕ ಮಾದರಿಗಳನ್ನೇ ಬದಿಗಿಟ್ಟು, ಇಂಥ ಹೊಸ ಪ್ರಯೋಗಗಳತ್ತ ಹೊರಳಲು, ಆ ಮೂಲಕ ಕೈಗಾರಿಕಾ ವಲಯವನ್ನು ಮತ್ತೊಂದು ಮಜಲಿಗೆ ಕೊಂಡೊಯ್ಯಲು ಇದು ಉತ್ತಮ ಅವಕಾಶ. ಸರ್ಕಾರದ ಈ ಚಿಂತನೆ ಮತ್ತು ಉತ್ಸಾಹ ಆರಂಭಶೂರತ್ವ ಆಗಬಾರದು. ಮುಖ್ಯವಾಗಿ, ಯೋಜನೆ ಜಾರಿ ಆಗುವಾಗ ಲೋಪಗಳಾಗದಂತೆ ಅಥವಾ ಕೆಲ ಹಿತಾಸಕ್ತಿಗಳ ಪಾಲಾಗದಂತೆ ಎಚ್ಚರ ವಹಿಸಬೇಕು. ಕೃಷಿಕರೂ ಆಹಾರ ಸಂಸ್ಕಾರಣಾ ಘಟಕಗಳ ಸದ್ಬಳಕೆ ಮಾಡಿಕೊಂಡರೆ, ತಾವು ಬೆಳೆಯುವ ಉತ್ಪನ್ನಗಳಿಗೆ ನ್ಯಾಯಯುತ ಬೆಲೆ ಪಡೆಯಬಹದು. ಒಟ್ಟಾರೆ, ಕರೊನಾ ಸಂಕಷ್ಟದ ಸಂದರ್ಭದಲ್ಲಿ ಇಂಥ ಯೋಜನೆಗಳು ಅವಶ್ಯವಾಗಿದ್ದು, ಸಮರ್ಪಕವಾಗಿ, ಪರಿಣಾಮಕಾರಿಯಾಗಿ ಜಾರಿಯಾಗಲಿ.
