ಮಾಲ್, ಥೇಟರ್ಗಳನ್ನು ತೆರೆಯಬೇಕು ಎಂಬ ಆಗ್ರಹವಿದೆಯಾದರೂ, ಈ ಬಗ್ಗೆ ಕೇಂದ್ರ ಸರ್ಕಾರ ಅಂತಿಮ ತೀರ್ಮಾನ ಕೈಗೊಳ್ಳಲಿರುವುದರಿಂದ, ರಾಜ್ಯ ಕಾದು ನೋಡುವ ತಂತ್ರ ಅನುಸರಿಸಲು ಮುಂದಾಗಿದೆ. ಅದೇನಿದ್ದರೂ, ಜೂನ್ 1ರಿಂದ ಜನಜೀವನ ಮತ್ತಷ್ಟು ಸಹಜತೆಗೆ ಮರಳಲಿದೆ. ಇದೊಂದು ಸಮಾಧಾನದ ವಿಷಯವೇ. ಆದರೆ, ಈ ಸಡಿಲಿಕೆ, ಆರ್ಥಿಕ ಚಟುವಟಿಕೆಗಳ ಪುನರಾರಂಭ ಎಲ್ಲವೂ ಜನರ ಹಿತಕ್ಕಾಗಿ ಎಂಬುದನ್ನು ನೆನಪಿನಲ್ಲಿ ಇಟ್ಟುಕೊಳ್ಳಬೇಕು. ದಿನದಿಂದ ದಿನಕ್ಕೆ ರಾಜ್ಯದಲ್ಲಿ ಕರೊನಾ ಸೋಂಕಿತರ ಪ್ರಕರಣಗಳು ಹೆಚ್ಚುತ್ತಲೇ ಇವೆ. ಇಂಥ ಹೊತ್ತಲ್ಲಿ ದಿಗ್ಬಂಧನ ಬಿಗಿಗೊಳಿಸಬೇಕು ಎಂಬ ಆಗ್ರಹವನ್ನೂ ಕೆಲವರು ಮಾಡುತ್ತಿದ್ದಾರೆ. ಆದರೆ, ಕಠಿಣ ದಿಗ್ಬಂಧನ ಇನ್ನಷ್ಟು ಅವಧಿ ಮುಂದುವರಿಸಿದರೆ ಅದರಿಂದಾಗುವ ಹಾನಿ ಅಪಾರ. ಅದನ್ನು ಗಮನಿಸಿಯೇ ರಾಜ್ಯ ಮತ್ತು ಕೇಂದ್ರ ಸರ್ಕಾರ ಹಲವು ವಲಯಗಳ ಕಾರ್ಯಾಚರಣೆಗೆ ಅನುವು ಮಾಡಿಕೊಟ್ಟಿವೆ. ಅಂದ ಮಾತ್ರಕ್ಕೆ, ಕರೊನಾ ಸೋಂಕಿನ ಅಪಾಯ ಕಡಿಮೆ ಆಗಿದೆ ಅಥವಾ ಅದು ನಿಯಂತ್ರಣಕ್ಕೆ ಬಂದು ಬಿಟ್ಟಿದೆ ಎಂದರ್ಥವಲ್ಲ.
