ಬಿಜೆಪಿ ಸರ್ಕಾರ ಮತ್ತೆ ಅಧಿಕಾರಕ್ಕೆ ಬರುತ್ತಿದ್ದಂತೆ ವಿಜಯನಗರ ಜಿಲ್ಲೆ ಘೋಷಿಸಿ, ಆನಂದ್ ಸಿಂಗ್ ಮೊದಲ ಬೇಡಿಕೆಯನ್ನು ಬಿಎಸ್ವೈ ಈಡೇರಿಸಲು ಸಜ್ಜಾಗಿ ಟಿಪ್ಪಣಿ ಹೊರಡಿಸಿದ್ದರು. ಆದರೆ ಶಾಸಕ ಜಿ.ಸೋಮಶೇಖರರೆಡ್ಡಿ ಸೇರಿ ಬಳ್ಳಾರಿ ಜಿಲ್ಲೆಯ ಸ್ವಪಕ್ಷದ ಅನೇಕ ಮುಖಂಡರು ಪ್ರಬಲ ವಿರೋಧ ವ್ಯಕ್ತಪಡಿಸಿದ ಕಾರಣ ನನೆಗುದಿಗೆ ಬಿದ್ದಿದೆ. ವಿಜಯನಗರ ಜಿಲ್ಲೆ ರಚನೆ, ಹೊಸಪೇಟೆ ಏತ ನೀರಾವರಿ ಯೋಜನೆ ಹಾಗೂ ಜಿಂದಾಲ್ ಕಂಪನಿಗೆ ಭೂಮಿ ಕೊಡಬಾರದು ಎಂಬ ಬೇಡಿಕೆಗಳನ್ನಿಟ್ಟು ಆನಂದ್ ಸಿಂಗ್ ಮೊದಲನೆಯವರಾಗಿ ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು. ಜೆಡಿಎಸ್-ಕಾಂಗ್ರೆಸ್ ಸಮ್ಮಿಶ್ರ ಸರ್ಕಾರದ ಪತನಕ್ಕೆ ಸಿಂಗ್ ರಾಜೀನಾಮೆ ಮುನ್ನುಡಿ ಬರೆದರೆ, 16 ಶಾಸಕರು ರಾಜೀನಾಮೆ ದಾರಿ ಹಿಡಿದರು. ಇದರಿಂದಾಗಿ ಸಂಖ್ಯೆಯಾಟದಲ್ಲಿ ಬಿಜೆಪಿ ಮೇಲುಗೈ ಸಾಧಿಸಿ ಅಧಿಕಾರದ ಗದ್ದುಗೆ ಏರಿತು. ಹೊಸಪೇಟೆ ಏತ ನೀರಾವರಿ ಯೋಜನೆಗೆ ಬಿಎಸ್ವೈ ಈಗಾಗಲೇ ಅನುದಾನ ನೀಡಿದ್ದರೆ, ಇದೀಗ ಹೊಸ ಜಿಲ್ಲೆ ರಚನೆಯತ್ತ ಹೆಜ್ಜೆಯಿಟ್ಟಿದ್ದಾರೆ.
