ಹೀಗೆ ತಾವು ಚೊಚ್ಚಲ ಸಿನಿಮಾ ನಿರ್ದೇಶನ ಮಾಡಿರುವ ಹಿಂದಿನ ಉದ್ದೇಶವನ್ನು ಬಿಚ್ಚಿಟ್ಟರು ಖ್ಯಾತ ಹಿರಿಯ ಸಾಹಿತಿ, ಮತ್ತು ಪದ್ಮಶ್ರಿ ಪುರಸ್ಕ್ರತ ಡಾ. ದೊಡ್ಡರಂಗೇಗೌಡ. ಮಕ್ಕಳ ಬೆಳವಣಿಗೆಗೆ ಮೊಬೈಲ್ ಹೇಗೆ ಮಾರಕವಾಗುತ್ತಿದೆ ಎಂಬ ವಿಷಯವನ್ನು ಆಯ್ದುಕೊಂಡಿರುವ ಅವರು, ಹಳ್ಳಿಗಾಡಿನ ಮತ್ತು ನಗರ ಪ್ರದೇಶದ ಮಕ್ಕಳ ನಡುವಿನ ವ್ಯತ್ಯಾಸ ಮತ್ತು ಈ ಎರಡೂ ಭಿನ್ನ ಪ್ರಾದೇಶಿಕತೆಯ ಮಕ್ಕಳ ಮನಸ್ಥಿತಿಯನ್ನು ‘ಹಾರುವ ಹಂಸಗಳು’ ಚಿತ್ರದಲ್ಲಿ ಕಟ್ಟಿಕೊಟ್ಟಿದ್ದಾರೆ. ಈ ಸಿನಿಮಾ ಸೃಷ್ಟಿ ಮತ್ತು ಇದರ ಹಿಂದಿನ ಉದ್ದೇಶವನ್ನು ವಿಜಯವಾಣಿಯೊಂದಿಗೆ ಹಂಚಿಕೊಂಡಿದ್ದಾರೆ. ‘ಮೊಬೈಲ್ ಬಂದಿದ್ದೇ ಬಂದಿದ್ದು, ಮಕ್ಕಳು ಬಾವಿಯೊಳಗಿನ ಕಪ್ಪೆಗಳಾಗುತ್ತಿದ್ದಾರೆ. ಲೋಕಜ್ಞಾನ ದೂರದ ವಿಚಾರವಾಯ್ತು, ಪಕ್ಕದಲ್ಲಿ ನಡೆಯುತ್ತಿರುವುದೇ ಗೊತ್ತಾಗುವುದಿಲ್ಲ. ನಮ್ಮ ಕಾಲದ ಬಾಲ್ಯ ಹೀಗಿರಲಿಲ್ಲ. ಇದೆಲ್ಲವನ್ನು ನೋಡಿಯೇ ‘ಆತಂಕ’ ಎಂಬ ನಾಟಕದ ಸ್ಕ್ರಿಪ್ಟ್ ಸಹ ಬರೆದು ಮುಗಿಸಿದ್ದೇನೆ. ಹೀಗೆ ಎಲ್ಲವೂ ನಡೆಯುತ್ತಿದ್ದಾಗಲೇ ವಾಸುಪ್ರಸಾದ್ ಎಂಬುವವರು ಬಂದು, ಮಕ್ಕಳ ಕುರಿತಾಗಿ ಸಿನಿಮಾ ಮಾಡುವ ಬಗ್ಗೆ ಹೇಳಿಕೊಂಡರು. ಕಥೆಯೂ ಸಿದ್ಧವಿತ್ತು, ಹರಕೆ ಹನುಪ್ಪನ ದೇವಸ್ಥಾನದಲ್ಲಿ ಪೂಜೆಯೂ ಆಯಿತು. ಚಿತ್ರೀಕರಣವೂ ಶುರುವಾಗಿ, ಕೇವಲ 15 ದಿನದಲ್ಲಿ ಮದ್ದೂರು ಹತ್ತಿರದ ದೊಡ್ಡ ಅಬ್ಬಲೂರಿನಲ್ಲಿ ಮಾಡಿ ಮುಗಿಸಿದೆವು’ ಎನ್ನುವ ಗೌಡ್ರು, ‘ಹಾರುವ ಹಂಸಗಳು’ ಚಿತ್ರದೊಳಗೇನಿದೆ ಎಂಬುದನ್ನೂ ವಿವರಿಸಿದ್ದಾರೆ.
