ಬುಧವಾರದ ಸಮಾವೇಶವನ್ನು ಪ್ರಧಾನಿ ಉದ್ಘಾಟಿಸಲಿದ್ದು, ಅದಕ್ಕೂ ಮುನ್ನ ಸುಜುಕಿ ಮೋಟಾರ್ ಕಾರ್ಪ್, ಮೈಕ್ರೋನ್ ಟೆಕ್ನಾಲಜಿ ಮತ್ತು ಎ.ಪಿ.ಮೊಲ್ಲರ್ ಸಂಸ್ಥೆಗಳ ಉನ್ನತಾಧಿಕಾರಿಗಳನ್ನು ಭೇಟಿಯಾಗಿ, ಉದ್ಯಮದ ಸಮಸ್ಯೆಗಳು, ಹೂಡಿಕೆ ಅವಕಾಶಗಳ ಬಗ್ಗೆ ಮಾತನಾಡಿದ್ದಾರೆ. ಪಿಎಂ ಮೋದಿ ಮತ್ತು ಸುಜುಕಿ ಮೋಟಾರ್ ಕಾರ್ಪೆರೇಷನ್ನ ಅಧ್ಯಕ್ಷ ತೊಶಿಹಿರೊ ಸುಜುಕಿ ನಡುವಿನ ಮಾತುಕತೆ ವೇಳೆ ಭಾರತದಲ್ಲಿ ತಯಾರಿಸಿದ ವಾಹನಗಳನ್ನು ರಫ್ತು ಮಾಡುವ ಮೂಲಕ ಜಾಗತಿಕ ವಾಹನ ಮಾರುಕಟ್ಟೆಯಲ್ಲಿ ಭಾರತವನ್ನು ಪ್ರಬಲ ಸ್ಪರ್ಧಿಯನ್ನಾಗಿಸುವ ಮಾರುತಿ ಸುಜುಕಿಯ ಯೋಜನೆಗಳ ಬಗ್ಗೆ ಚರ್ಚೆ ನಡೆದಿದೆ. ವಾಹನ ಸ್ಕ್ರಾ್ಯಪಿಂಗ್ ಮತ್ತು ವಾಹನ ಮರುಬಳಕೆಗೆ ಸಂಬಂಧಿಸಿದ ಜಾಗತಿಕ ಕ್ರಮಗಳನ್ನು ಭಾರತದಲ್ಲಿ ಅಳವಡಿಸುವ ಬಗ್ಗೆಯೂ ಮಾತುಕತೆಯಾಗಿದೆ ಎಂದು ಪ್ರಧಾನಿ ಕಾರ್ಯಾಲಯ ಮಾಹಿತಿ ಹಂಚಿಕೊಂಡಿದೆ. ಮಾರುತಿ ಸುಜುಕಿ ಗುಜರಾತ್ನಲ್ಲಿ ಎರಡನೇ ಕಾರು ಉತ್ಪಾದನಾ ಘಟಕ ಸ್ಥಾಪಿಸಲಿದ್ದು, ಇದು ದೇಶದಲ್ಲೇ ಸಂಸ್ಥೆಯ ಐದನೇ ಘಟಕವಾಗಲಿದೆ.
