ಗಣರಾಜ್ಯೋತ್ಸವದಲ್ಲಿ ವಂದೇ ಮಾತರಂ ವೈಭವ

ಸ್ವಾತಂತ್ರ್ಯ ಹೋರಾಟಕ್ಕೆ ಸ್ಪೂರ್ತಿ ನೀಡಿದ ವಂದೇ ಮಾತರಂ ಗೀತೆ ರಚನೆಯಾಗಿ 150 ವರ್ಷಗಳಾಗಿದ್ದು, ಈ ಪ್ರಯುಕ್ತ ದೇಶಾದ್ಯಂತ ಪ್ರೇರಣೆ ಹರಡುವ ಕಾರ್ಯಕ್ರಮಗಳನ್ನು ನಡೆಸಲಾಗುತ್ತಿದೆ. ಬಂಕಿಮ್ ಚಂದ್ರ ಚಟ್ಟೋಪಾಧ್ಯಾಯರು ರಚಿಸಿದ ಈ ಅಮರ ಗೀತೆ ದೇಶಾದ್ಯಂತ ಅನುರಣಿಸುತ್ತಿದ್ದು, ಈ ಬಾರಿ 77ನೇ ಗಣರಾಜ್ಯೋತ್ಸವದ ಥೀಮ್ ಕೂಡ ವಂದೇ ಮಾತರಂ ಆಗಿದೆ- ‘ಸ್ವಾತಂತ್ರ್ಯದ ಮಂತ್ರ ವಂದೇ ಮಾತರಂ-ಸಮೃದ್ಧಿಯ ಮಂತ್ರ ಆತ್ಮನಿರ್ಭರ ಭಾರತ’ ಪರಿಕಲ್ಪನೆಯಡಿ ಗಣರಾಜ್ಯೋತ್ಸವದ ಎಲ್ಲ ಕಾರ್ಯಕ್ರಮಗಳನ್ನು ರೂಪಿಸಲಾಗಿದೆ. ವಂದೇ ಮಾತರಂಗೆ ಸಂಬಂಧಿಸಿದ ಅಪೂರ್ವ ಚಿತ್ರಗಳನ್ನು ಕರ್ತವ್ಯಪಥದಲ್ಲಿ ಪ್ರದರ್ಶಿಸಲಾಗಿದೆ. ಪರೇಡ್ ಸುಮಾರು 90 ನಿಮಿಷಗಳ ಕಾಲ ನಡೆಯಲಿದ್ದು, ಸೇನಾ ಶಕ್ತಿ, ಸಾಂಸ್ಕೃತಿಕ ವೈವಿಧ್ಯ ಮತ್ತು ಪ್ರಜಾಪ್ರಭುತ್ವ ಮೌಲ್ಯಗಳನ್ನು ದರ್ಶಿಸಲಿದೆ.

ಈ ಬಾರಿಯ ಗಣರಾಜ್ಯೋತ್ಸವ ಪರೇಡ್​ನಲ್ಲಿ ಸ್ತ್ರೀಶಕ್ತಿ ವಿಜೃಂಭಿಸಲಿದ್ದು, ಭಾರತದಲ್ಲಿನ ಮಹಿಳಾ ಸಬಲೀಕರಣ ಜಗದ ಗಮನ ಸೆಳೆಯಲಿದೆ. ಪರೇಡ್​ನಲ್ಲಿ ನಾರಿ ಶಕ್ತಿಯು, ಸೇನೆಯಲ್ಲಿ ಮಹಿಳೆಯರ ಹೆಚ್ಚುತ್ತಿರುವ ಸಹಭಾಗಿತ್ವ, ನಾಯಕತ್ವ ಮತ್ತು ಸಬಲೀಕರಣವನ್ನು ಗಟ್ಟಿದನಿಯಲ್ಲಿ ಮೊಳಗಿಸಲಿದೆ. ಇದು ಭಾರತದ ಸಶಸ್ತ್ರ ಪಡೆಗಳಲ್ಲಿ ಲಿಂಗ ಸಮಾನತೆಯ ಪ್ರಗತಿಯ ಸಂಕೇತವಾಗಿದೆ.

ಈ ಬಾರಿ ಯುರೋಪಿಯನ್ ಯೂನಿಯನ್​ನ ಪ್ರಮುಖ ನಾಯಕರು ಗಣರಾಜ್ಯೋತ್ಸವ ಸಮಾರಂಭದಲ್ಲಿ ಅತಿಥಿಗಳಾಗಿ ಭಾಗಿಯಾಗಲಿದ್ದಾರೆ. ಯುರೋಪಿಯನ್ ಕಮಿಷನ್ ಅಧ್ಯಕ್ಷೆ ಯುರ್ಸಲಾ ವಾನ್ ಡೆರ್ ಲೇಯೆನ್ ಮತ್ತು ಯುರೋಪಿಯನ್ ಕೌನ್ಸಿಲ್ ಅಧ್ಯಕ್ಷ ಅಂಟೋನಿಯೊ ಕೋಸ್ಟಾ ಅವರು ಗೌರವ ಅತಿಥಿಗಳಾಗಿ ಭಾಗವಹಿಸಲಿದ್ದಾರೆ. ಜನವರಿ 25ರಿಂದ 27ರವರೆಗಿನ ಅವಧಿಯ ಭೇಟಿಯಲ್ಲಿ ಭಾರತದೊಂದಿಗಿನ ವ್ಯಾಪಾರ ಒಪ್ಪಂದಕ್ಕೂ ಅಂಕಿತ ಬೀಳಲಿದೆ.

ರಾಷ್ಟ್ರ ನಿರ್ವಣಕ್ಕೆ ಕೊಡುಗೆ ನೀಡಿದ 10,000 ವಿಶೇಷ ಅತಿಥಿಗಳಿಗೆ ಆಹ್ವಾನ ನೀಡಲಾಗಿದೆ. ಶ್ರಮಿಕ ಕಾರ್ವಿುಕರು, ಆಟೋ ರಿಕ್ಷಾ ಚಾಲಕಿಯರು, ಪೌರ ಕಾರ್ವಿುಕರು, ಆರೋಗ್ಯ ಸೇವೆಗಳ ಮುಂಚೂಣಿ ಕಾರ್ಯಕರ್ತರು, ಸಾಧಕ ಗ್ರಾಮ ಪಂಚಾಯಿತಿಗಳ ಅಧ್ಯಕ್ಷರು, ಸದಸ್ಯರು ಸೇರಿ ತೆರೆಮರೆಯಲ್ಲಿ ಕಾರ್ಯನಿರ್ವಹಿಸುವ ಶ್ರೀಸಾಮಾನ್ಯರು ಪಾಲ್ಗೊಳ್ಳಲಿದ್ದು, ಕರ್ತವ್ಯಪಥದ ಸಂಭ್ರಮಕ್ಕೆ ಸಾರ್ಥಕತೆ ಮೂಡಲಿದೆ. ಕರ್ನಾಟಕದಿಂದಲೂ ಹಲವು ರಂಗಗಳ ತೆರೆಮರೆಯ ಸಾಧಕರು ಕಾರ್ಯಕ್ರಮದಲ್ಲಿ ಪಾಲ್ಗೊಳ್ಳಲಿದ್ದಾರೆ. ಶ್ರೀಸಾಮಾನ್ಯರನ್ನು ಗಣರಾಜ್ಯೋತ್ಸವ ಸಮಾರಂಭ ವೀಕ್ಷಿಸಲು ವಿಶೇಷ ಆಮಂತ್ರಣ ನೀಡುವ ಪದ್ಧತಿ 2022ರಿಂದ ಪ್ರಾರಂಭವಾಗಿದೆ.

ಜಮ್ಮು ಮತ್ತು ಕಾಶ್ಮೀರದ 26 ವರ್ಷದ ಅಸಿಸ್ಟೆಂಟ್ ಕಮಾಂಡಂಟ್ ಸಿಮ್ರನ್ ಬಾಲಾ ಮೊದಲ ಬಾರಿಗೆ ಸಿಆರ್​ಪಿಎಫ್ ಕಂಟಿಂಜೆಂಟ್​ನ ನೇತೃತ್ವ ವಹಿಸಲಿದ್ದಾರೆ. ಪರೇಡ್​ನಲ್ಲಿ 140ಕ್ಕೂ ಹೆಚ್ಚು ಪುರುಷ ಸಿಬ್ಬಂದಿಯನ್ನು ಸಿಮ್ರನ್ ಬಾಲಾ ಕರ್ತವ್ಯಪಥದಲ್ಲಿ ಮುನ್ನಡೆಸಲಿದ್ದಾರೆ. ಇದು ಸಿಆರ್​ಪಿಎಫ್ ಮತ್ತು ಭಾರತದ ಸಶಸ್ತ್ರ ಪಡೆಗಳಲ್ಲಿ ಮಹಿಳಾ ನಾಯಕತ್ವದ ದೊಡ್ಡ ಮೈಲಿಗಲ್ಲು.

ಐಎಎಫ್ ಬ್ಯಾಂಡ್ ಕಂಟಿಂಜೆಂಟ್ ನಲ್ಲಿ 9 ಮಹಿಳಾ ಅಗ್ನಿವೀರರು ಭಾಗವಹಿಸಲಿದ್ದಾರೆ. ಇದು 75 ಸದಸ್ಯರ ಬ್ಯಾಂಡ್ ಆಗಿದ್ದು, ವಾಯು ಸೇನೆಯಲ್ಲಿ ಮಹಿಳಾ ಅಗ್ನಿವೀರರ ಮೊದಲ ಪ್ರದರ್ಶನವಾಗಿದೆ.

ನೌಕಾಪಡೆಯ ಸ್ತಬ್ಧಚಿತ್ರವು ಸಮುದ್ರ ಪರಂಪರೆ, ಆಧುನಿಕ ಶಕ್ತಿ ಮತ್ತು ಮಹಿಳಾ ನಾವಿಕರ ಪಾತ್ರವನ್ನು ಬಿಂಬಿಸಲಿದೆ.

ಸಿಆರ್​ಪಿಎಫ್ ಮತ್ತು ಸಶಸ್ತ್ರ ಗಡಿ ರಕ್ಷಣೆಯ ಮಹಿಳಾ ‘ಡೇರ್ ಡೆವಿಲ್ಸ್’ ತಂಡವು ಎನ್​ಫಿಲ್ಡ್ ಬೈಕ್​ಗಳ ಮೇಲೆ ಸಾಹಸ ಪ್ರದರ್ಶನ ನಡೆಸಲಿದೆ. ಇದಲ್ಲದೆ, ಹಲವು ಮಹಿಳಾ ಅಧಿಕಾರಿಗಳು ವಿವಿಧ ಕಂಟಿಂಜೆಂಟ್​ಗಳು ಮತ್ತು ಟ್ಯಾಬ್ಲೋಗಳ ನೇತೃತ್ವ ವಹಿಸಲಿದ್ದಾರೆ.

ದೆಹಲಿ ಕೆಂಪುಕೋಟೆಯ ಭಾರತ ಪರ್ವದಲ್ಲಿ ಕರ್ನಾಟಕದಿಂದ ಈ ಬಾರಿ ‘ಮಿಲೆಟ್ ಟು ಮೈಕ್ರೋಚಿಪ್’ ಸ್ತಬ್ಧಚಿತ್ರ ಪ್ರದರ್ಶಿತಗೊಳ್ಳಲಿದೆ. ಉದಯಿಸುತ್ತಿರುವ ಸೂರ್ಯ, ದೊಡ್ಡ ಮಡಕೆಗಳಲ್ಲಿ ಪ್ರದರ್ಶಿಸಲಾದ ವಿವಿಧ ಸಿರಿಧಾನ್ಯಗಳು, ಬೆಳೆದ ಫಸಲನ್ನು ಎತ್ತಿ ಹಿಡಿದಿರುವ ರೈತ ಪರಿವಾರದ ಪ್ರತಿಮೆ ಸೇರಿದಂತೆ ವಿಜ್ಞಾನ-ತಂತ್ರಜ್ಞಾನದ ಸಾಧನೆಗಳನ್ನು ಬಿಂಬಿಸುವ ಸಂಗತಿಗಳನ್ನು ಸ್ತಬ್ಧಚಿತ್ರ ಒಳಗೊಂಡಿದೆ. ಕರ್ನಾಟಕ ಕೃಷಿ, ಶಿಕ್ಷಣ, ವಿಜ್ಞಾನ, ಉನ್ನತ ತಂತ್ರಜ್ಞಾನ ಹಾಗೂ ಮೈಕ್ರೋಚಿಪ್​ಗಳ ಉತ್ಪಾದನೆಯಲ್ಲಿ ಸಾಧಿಸಿರುವ ಸಮತೋಲನಯುತ ಪ್ರಗತಿಯನ್ನು ಸ್ತಬ್ಧಚಿತ್ರ ಬಿಂಬಲಿಸಲಿದೆ.

ನಿಯಮ ಬದಲು: ಈ ಹಿಂದೆ ಎಲ್ಲ ರಾಜ್ಯಗಳಿಗೂ ಪಥಸಂಚಲನದಲ್ಲಿ ಪಾಲ್ಗೊಳ್ಳಲು ಅವಕಾಶವಿತ್ತು. ಭದ್ರತೆ ದೃಷ್ಟಿಯಿಂದ ರಕ್ಷಣಾ ಸಚಿವಾಲಯವು ಸ್ತಬ್ಧಚಿತ್ರಗಳ ಸಂಖ್ಯೆಯನ್ನು 2022ನೇ ಸಾಲಿನಿಂದ 15ಕ್ಕೆ ಇಳಿಸಿದೆ. 2024ರಲ್ಲಿ ರಕ್ಷಣಾ ಸಚಿವಾಲಯವು ಎಲ್ಲ ರಾಜ್ಯಗಳಿಗೂ ಗಣರಾಜ್ಯೋತ್ಸವದ ಪರೇಡ್​ನಲ್ಲಿ ಸ್ತಬ್ಧಚಿತ್ರದೊಂದಿಗೆ ಪಾಲ್ಗೊಳ್ಳಲು ಸಮಾನ ಅವಕಾಶ ಕಲ್ಪಿಸಲು ಆವರ್ತನ ಮಾದರಿಯಲ್ಲಿ ಒಂದು ವರ್ಷ ಪಥಸಂಚಲನ ಮತ್ತು ಅದರ ಮುಂದಿನ ವರ್ಷ ಭಾರತ ಪರ್ವದಲ್ಲಿ ಪ್ರದರ್ಶಿಸುವಂತೆ ಎಲ್ಲ ರಾಜ್ಯಗಳೊಂದಿಗೆ ಒಡಂಬಡಿಕೆ ಮಾಡಿ ಕೊಂಡಿದೆ.

ಗಣರಾಜ್ಯೋತ್ಸವ ಸಮಾರಂಭದಲ್ಲಿ ವಿವಿಧ ರಾಜ್ಯಗಳ ಸ್ತಬ್ಧಚಿತ್ರಗಳ ಪ್ರದರ್ಶನ ಆರಂಭವಾಗಿದ್ದು 1953ರ ಜನವರಿ 26ರಿಂದ. ಆಗಿನಿಂದ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ 22ರಿಂದ 30 ಸ್ತಬ್ಧಚಿತ್ರಗಳು ಪ್ರದರ್ಶನಗೊಳ್ಳುತ್ತಿವೆ. 1981ರಿಂದ ಮೂರು ಉತ್ತಮ ಸ್ತಬ್ಧಚಿತ್ರಗಳನ್ನು ಆಯ್ಕೆ ಮಾಡಿ, ಅವುಗಳನ್ನು ಗೌರವಿಸುವ ಸಂಪ್ರದಾಯ ಆರಂಭವಾಯಿತು. ಈ ಬಾರಿ ಸುಮಾರು 30 ಟ್ಯಾಬ್ಲೋಗಳು (tableaux) ಕರ್ತವ್ಯಪಥದಲ್ಲಿ ಸಂಚರಿಸಲಿವೆ. ಇದರಲ್ಲಿ 17 ರಾಜ್ಯಗಳು/ಕೇಂದ್ರಾಡಳಿತ ಪ್ರದೇಶಗಳು ಮತ್ತು 13 ಕೇಂದ್ರ ಸಚಿವಾಲಯಗಳು ಭಾಗವಹಿಸುತ್ತವೆ. ಈ ಸ್ತಬ್ಧಚಿತ್ರಗಳು ಮುಖ್ಯವಾಗಿ ವಂದೇ ಮಾತರಂನ 150 ವರ್ಷಗಳ ಥೀಮ್ ಅನ್ನು ಆಧರಿಸಿ, ಸ್ವಾತಂತ್ರ್ಯದ ಮಂತ್ರ ಮತ್ತು ಸಮೃದ್ಧಿಯ ಮಂತ್ರವನ್ನು ಪ್ರತಿಬಿಂಬಿಸಲಿವೆ. ಭಾರತದ ಸಾಂಸ್ಕೃತಿಕ ಪರಂಪರೆ, ಸ್ವಾವಲಂಬನೆಯ ದಾರಿ, ಸ್ವದೇಶಿ ಉತ್ಪಾದನೆ, ಸ್ವಾತಂತ್ರ್ಯ ಹೋರಾಟ ಮತ್ತು ಆಧುನಿಕ ಪ್ರಗತಿಯನ್ನು ಇವು ದರ್ಶಿಸಲಿವೆ.

ಅಸ್ಸಾಂ: ಟೆರಾಕೋಟಾ ಕ್ರಾಫ್ಟ್ ವಿಲೇಜ್​ನ್ನು ಹೊಂದಿದ್ದು, ಅಸ್ಸಾಂನ ಸಾಂಪ್ರದಾಯಿಕ ಟೆರಾಕೋಟಾ ಕಲೆಯನ್ನು ಎತ್ತಿ ತೋರಿಸುತ್ತದೆ.

ಛತ್ತೀಸ್​ಗಢ: ಸ್ವಾತಂತ್ರ್ಯದ ಮಂತ್ರವನ್ನು ಆಧರಿಸಿ ವಂದೇ ಮಾತರಂ ಗೀತೆಯ ಸಂದೇಶವನ್ನು ನೀಡಲಿದೆ.

ಗುಜರಾತ್: ಸ್ವದೇಶಿ ಚಳವಳಿ ಮತ್ತು ಸ್ವಾವಲಂಬನೆಯ ಮೇಲೆ ಆಧರಿತವಾಗಿದೆ.

ಹಿಮಾಚಲ ಪ್ರದೇಶ: ದೇವಭೂಮಿ ಮತ್ತು ವೀರಭೂಮಿಯಾಗಿ ತನ್ನ ಅಸ್ಮಿತೆಯ ಪರಿಚಯ ಮಾಡಿಕೊಡಲಿದೆ.

ಇತರ ರಾಜ್ಯಗಳು ಸಾಂಸ್ಕೃತಿಕ ಕಲೆ, ಪರಂಪರೆ, ಸ್ಥಳೀಯ ಉತ್ಪನ್ನಗಳು, ಪರಿಸರ ಸಂರಕ್ಷಣೆ ಮತ್ತು ಸ್ವಾತಂತ್ರ್ಯ ಹೋರಾಟದ ಕೊಡುಗೆಗಳನ್ನು ಪ್ರದರ್ಶಿಸಲಿವೆ.

ಸುಮಾರು 2,500 ಕಲಾ ವಿದರು ವಿವಿಧ ರಾಜ್ಯಗಳ ಸಂಸ್ಕೃತಿಯನ್ನು ನೃತ್ಯಗಳ ಮೂಲಕ ಪ್ರದರ್ಶಿಸಲಿದ್ದಾರೆ. ಸೇನೆ, ನೌಕಾಪಡೆ, ವಾಯುಸೇನೆ, ಕೇಂದ್ರ ಸಶಸ್ತ್ರ ಪೊಲೀಸ್ ಪಡೆಗಳ ಮಾರ್ಚಿಂಗ್ ಕಂಟಿಂಜೆಂಟ್​ಗಳು ಸೇರಿದಂತೆ ಸುಮಾರು 6,000 ಸಿಬ್ಬಂದಿ ಭಾಗವಹಿಸಲಿದ್ದಾರೆ.

ಸಂಸ್ಕೃತಿ ಸಚಿವಾಲಯ: ವಂದೇ ಮಾತರಂ ಗೀತೆಯ 150 ವರ್ಷಗಳನ್ನು ಆಚರಿಸುವ ವಿಶೇಷ ಪ್ರದರ್ಶನ, ಅಪೂರ್ವ ಚಿತ್ರಗಳನ್ನು ಐತಿಹಾಸಿಕ ಅಂಶಗಳೊಂದಿಗೆ ವಿವರಿಸಲಿದೆ.

ಪಂಚಾಯತ್ ರಾಜ್ ಸಚಿವಾಲಯ: SVAMITVA (ಗ್ರಾಮೀಣ ಭೂಮಿ ಮಾಲೀಕತ್ವ ಮತ್ತು ಡಿಜಿಟಲ್ ದಾಖಲಾತಿ) ಯೋಜನೆಯ ಮಹತ್ವ ಬಿಂಬಿಸಲಿದೆ.

ನೌಕಾಪಡೆ: 5ನೇ ಶತಮಾನದ ಹಡಗುಗಳು, ಮರಾಠ ನೌಕಾಪಡೆಯ ಗುರಾಬ್ ಹಡಗುಗಳು ಮತ್ತು ಆಧುನಿಕ ಏರ್​ಕ್ರಾಫ್ಟ್ ಕ್ಯಾರಿಯರ್​ಗಳನ್ನು ಒಳಗೊಂಡು ಭಾರತದ ನೌಕಾಪಡೆಯ ಇತಿಹಾಸ ಮತ್ತು ಆಧುನಿಕತೆಯನ್ನು ವಿವರಿಸುತ್ತ, ಶಕ್ತಿಪ್ರದರ್ಶನ ಮಾಡಲಿದೆ.

ಇತರ ಸಚಿವಾಲಯಗಳು ಆತ್ಮನಿರ್ಭರ್ ಭಾರತ್, ರಕ್ಷಣೆ, ವಿಜ್ಞಾನ-ತಂತ್ರಜ್ಞಾನ, ಪರಿಸರ ಮತ್ತು ಆರ್ಥಿಕ ಬೆಳವಣಿಗೆಯನ್ನು ಬಿಂಬಿಸುವ ಸ್ತಬ್ಧಚಿತ್ರಗಳನ್ನು ಪ್ರದರ್ಶಿಸಲಿವೆ. ಈ ಸ್ತಬ್ಧಚಿತ್ರಗಳು ಭಾರತದ ವೈವಿಧ್ಯಮಯ ಸಂಸ್ಕೃತಿ, ಸ್ವಾತಂತ್ರ್ಯದ ಆದರ್ಶಗಳು ಮತ್ತು ಆತ್ಮನಿರ್ಭರ್ ಭಾರತದ ಪ್ರಗತಿಯ ಚಿತ್ರಣವನ್ನು ಜನರಿಗೆ ದೃಶ್ಯರೂಪದಲ್ಲಿ ಕಟ್ಟಿಕೊಡಲಿವೆ. ಪ್ರತಿ ಸ್ತಬ್ಧಚಿತ್ರವೂ ವಿಶೇಷವಾಗಿ ವಿನ್ಯಾಸಗೊಂಡಿದ್ದು, ಸುಮಾರು 90 ನಿಮಿಷಗಳ ಮೆರವಣಿಗೆಯಲ್ಲಿ ಜನರ ಗಮನ ಸೆಳೆಯಲಿವೆ.