ತುಮಕೂರಿನಲ್ಲಿ ವಂದೇ ಭಾರತ್​ ರೈಲು ನಿಲುಗಡೆ

ತುಮಕೂರು: ವಂದೇ ಭಾರತ್​ ರೈಲು ಇನ್ಮುಂದೆ ತುಮಕೂರಿನಲ್ಲಿ ನಿಲುಗಡೆಯಾಗಲಿದೆ. ಆ.23 ರಂದು ಸಂಜೆ 5.30ಕ್ಕೆ ತುಮಕೂರು ರೈಲ್ವೇ ನಿಲ್ದಾಣದಲ್ಲಿ ರೈಲು ನಿಲುಗಡೆ ಕಾರ್ಯಕ್ರಮ ಇರಲಿದೆ.

ಕೇಂದ್ರ ಜಲಶಕ್ತಿ ಹಾಗೂ ರೈಲ್ವೇ ಖಾತೆ ರಾಜ್ಯ ಸಚಿವ ವಿ.ಸೋಮಣ್ಣ ಅವರು ವಂದೇ ಭಾರತ್​ ರೈಲು ನಿಲುಗಡೆ ನಿಶಾನೆ ತೋರುವರು. ನಗರ ಶಾಸಕ ಜಿ.ಬಿ.ಜ್ಯೋತಿಗಣೇಶ್​ ಮತ್ತಿತರರು ಉಪಸ್ಥಿತರಿರುವರು.

ಧಾರವಾಡದಿಂದ ಬೆಂಗಳೂರು ನಡುವೆ ಸಂಚರಿಸಿರುವ ವಂದೇ ಭಾರತ್​ ರೈಲು ಮಧ್ಯಾಹ್ನ 1.15ಕ್ಕೆ ಹೊರಡಲಿದ್ದು ಸಂಜೆ 7.45ಕ್ಕೆ ಬೆಂಗಳೂರು ತಲುಪಲಿದೆ. ಬೆಂಗಳೂರಿನಿಂದ ಬೆಳಗ್ಗೆ 5.45ಕ್ಕೆ ಹೊರಡಲಿದ್ದು ಮಧ್ಯಾಹ್ನ 12.10ಕ್ಕೆ ಧಾರವಾಡ ತಲುಪಲಿದೆ. 489 ಕಿ.ಮೀ., ದೂರವನ್ನು ಕೇವಲ 6 ಗಂಟೆ 25 ನಿಮಿಷದಲ್ಲಿ ಕ್ರಮಿಸಲಿರುವ ವಂದೇ ಭಾರತ್​ ಬೆಂಗಳೂರು ಬಿಟ್ಟ ನಂತರ ಯಶವಂತಪುರ, ದಾವಣಗೆರೆ, ಹುಬ್ಬಳ್ಳಿ, ಧಾರವಾಡ ಮಾತ್ರ ನಿಲುಗಡೆಯಾಗುತ್ತಿತ್ತು.

ಕೇಂದ್ರ ರೈಲ್ವೆ ರಾಜ್ಯ ಸಚಿವ ವಿ.ಸೋಮಣ್ಣ ಪ್ರತಿನಿಧಿಸುವ ತುಮಕೂರು ಲೋಕಸಭಾ ಕ್ಷೇತ್ರದ ಜಿಲ್ಲಾಕೇಂದ್ರ ತುಮಕೂರಿನಲ್ಲಿ ಇನ್ಮುಂದೆ ವಂದೇ ಭಾರತ್​ ನಿಲುಗಡೆ ಆಗಲಿದೆ.