ಸಾರ್ವತ್ರಿಕ ವರ್ಗ ಸರಾಗ : ಶಾಸಕರ ಒತ್ತಡಕ್ಕೆ ಮಣಿದ ಸಿಎಂ

ಬೆಂಗಳೂರು: ಕರೊನಾ ಸಂಕಷ್ಟದ ಸಂದರ್ಭದಲ್ಲೂ ಶಾಸಕರ ಅಸಮಾಧಾನ, ಒತ್ತಡಕ್ಕೆ ಮಣಿದ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಕೊನೆಗೂ ಸರ್ಕಾರಿ ನೌಕರರ ಸಾರ್ವತ್ರಿಕ ವರ್ಗಾವಣೆಗೆ ಒಪ್ಪಿ ಆದೇಶ ಹೊರಡಿಸಿದ್ದಾರೆ. ಸರ್ಕಾರಿ ನೌಕರರಲ್ಲಿ ಬಿ ಮತ್ತು ಸಿ ವೃಂದದ ಅಧಿಕಾರಿ ಹಾಗೂ ನೌಕರರ ಪೈಕಿ ಶೇ.6ರಷ್ಟು ಜನರನ್ನು ಜು. 10ರೊಳಗೆ ವರ್ಗಾವಣೆ ಮಾಡುವಂತೆ ಶುಕ್ರವಾರ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಹೊರಡಿಸಿರುವ ಆದೇಶದಲ್ಲಿ ತಿಳಿಸಲಾಗಿದೆ. ಆಯಾ ಇಲಾಖೆಗಳ ಸಚಿವರಿಗೇ ವರ್ಗಾವಣೆ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವ ಅಧಿಕಾರ ನೀಡಲಾಗಿದೆ.

ಬೇಡ ಎಂದಿದ್ದ ಸಿಎಂ: ಕರೊನಾ ಸೋಂಕು ರಾಜ್ಯದಲ್ಲಿ ದಿನೇ ದಿನೆ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಈ ವರ್ಷ ಸಾರ್ವತ್ರಿಕ ವರ್ಗಾವಣೆ ನಡೆಸದಿರುವ ತೀರ್ಮಾನಕ್ಕೆ ಮುಖ್ಯಮಂತ್ರಿ ಬಿ.ಎಸ್. ಯಡಿಯೂರಪ್ಪ ಬಂದಿದ್ದರು. ಈ ಸಂಬಂಧ ಕಳೆದ ವಾರವಷ್ಟೇ ಸುತ್ತೋಲೆ ಹೊರಬಿದ್ದಿತ್ತು. ಅನಿವಾರ್ಯ ಸಂದರ್ಭದಲ್ಲಿ ಕರೊನಾ ಕೆಲಸಕ್ಕೆ ತೊಂದರೆಯಾಗದಂತೆ ಮುಖ್ಯಮಂತ್ರಿ ಅನುಮತಿ ಪಡೆದು ವರ್ಗಾವಣೆ ಮಾಡಬಹುದೆಂದೆಂದು ತಿಳಿಸಲಾಗಿತ್ತು. ಶಾಸಕರ ಆಕ್ರೋಶ: ಸರ್ಕಾರ ಯಾವಾಗ ವರ್ಗಾವಣೆ ಬೇಡವೆಂದು ನಿರ್ಧರಿಸಿತೋ ಆಗ ಆಡಳಿತ ಪಕ್ಷದ ಶಾಸಕರೇ ತಿರುಗಿಬಿದ್ದರು. ಕಳೆದ ಕೆಲ ದಿನಗಳ ಹಿಂದೆ ಪಕ್ಷದ ರಾಜ್ಯಾಧ್ಯಕ್ಷ ನಳಿನ್​ಕುಮಾರ್ ಕಟೀಲ್ ಅವರಿಗೆ ಸಲ್ಲಿಸಿದ ದೂರಿನಲ್ಲಿ ನೌಕರರ ಹಾಗೂ ಅಧಿಕಾರಿಗಳ ವರ್ಗಾವಣೆ ವಿಚಾರವೂ ಪ್ರಸ್ತಾಪವಾಗಿತ್ತು. ‘ನಮ್ಮ ಕ್ಷೇತ್ರಗಳಲ್ಲಿ ನಮಗೆ ಬೇಕಾದ ಅಧಿಕಾರಿ ಹಾಗೂ ನೌಕರರು ಇಲ್ಲದಿದ್ದರೆ ಕೆಲಸ ಮಾಡುವುದು ಹೇಗೆ’ ಎಂದು ನೇರವಾಗಿ ಅಸಮಾಧಾನ ತೋಡಿಕೊಂಡಿದ್ದರು. ಶಾಸಕರ ಈ ಆಕ್ರೋಶ ತಣಿಸುವ ಮೂಲಕ ಆಡಳಿತವನ್ನು ಸುಗಮವಾಗಿ ನಡೆಸಬೇಕೆಂಬ ಉದ್ದೇಶದಿಂದಲೆ ಯಡಿಯೂರಪ್ಪ ತಮ್ಮ ನಿಲುವಿನಿಂದ ಹಿಂದೆ ಸರಿದು ಒಂದು ಅವಧಿಗೆ ವರ್ಗಾವಣೆ ಮಾಡುವ ನಿರ್ಧಾರಕ್ಕೆ ಬಂದಿದ್ದಾರೆ. ವರ್ಗಾವಣೆ ಅವಧಿ ಜು.10ಕ್ಕೆ ಮುಕ್ತಾಯವಾಗಲಿದೆ. ಆ ನಂತರ ಎಂದಿನಂತೆ ಮುಖ್ಯಮಂತ್ರಿ ಅನುಮತಿ ಪಡೆದು ಮಾಡಬಹುದಾಗಿದೆ.

2013ರ ಮಾರ್ಗಸೂಚಿ: ಸರ್ಕಾರಿ ನೌಕರರ ವರ್ಗಾವಣೆಗೆ ಸಂಬಂಧಿಸಿದಂತೆ 2013ರಲ್ಲಿ ಹೊರಡಿಸಿದ್ದ ಮಾರ್ಗಸೂಚಿಗಳನ್ವಯ ವರ್ಗಾವಣೆ ಪ್ರಕ್ರಿಯೆಯನ್ನು ಕೈಗೊಳ್ಳಬೇಕಾಗಿದೆ. ಖಾಲಿ ಇರುವ ಹಾಗೂ ಆಡಳಿತಾತ್ಮಕವಾಗಿ ತ್ವರಿತವಾಗಿ ತುಂಬಲೇಬೇಕಾದ ಹುದ್ದೆಗಳಿಗೆ ಹಾಗೂ ಪತಿ-ಪತ್ನಿ ಪ್ರಕರಣಗಳಿಗೆ ಆದ್ಯತೆ, ಪರಸ್ಪರ ವರ್ಗಾವಣೆ, ಅನಾರೋಗ್ಯದಿಂದ ಬಳಲುವ ನೌಕರರಿಗೆ ಅವಕಾಶ ನೀಡುವುದು, ನೌಕರರ ಅವಲಂಬಿತರು ಅನಾರೋಗ್ಯಕ್ಕೆ ಒಳಗಾಗಿದ್ದರೆ, ಸಾರ್ವಜನಿಕವಾಗಿ ದೂರು ಬಂದಿರುವವರು, ಎರಡು ವರ್ಷದಲ್ಲಿ ನಿವೃತ್ತರಾಗು ವವರಿಗೆ ವರ್ಗಾವಣೆಯಲ್ಲಿ ಆದ್ಯತೆ ನೀಡಬೇಕೆಂದು ಮಾರ್ಗಸೂಚಿ ಇದೆ. ಜ್ಯೇಷ್ಠತಾ ಘಟಕದ ಕಾರ್ಯನಿರತ ವೃಂದಬಲದಲ್ಲಿ ಶೇ. 6 ಅಧಿಕಾರಿಗಳು, ನೌಕರರನ್ನು ವರ್ಗಾವಣೆ ಮಾಡಲು ತಿಳಿಸಲಾಗಿದೆ.

ಶಿಕ್ಷಣ ಇಲಾಖೆಯಲ್ಲಿ ಗೊಂದಲ ಶಿಕ್ಷಣ ಹಾಗೂ ಆರೋಗ್ಯ ಇಲಾಖೆ ನೌಕರರ ವರ್ಗಾವಣೆಗೆ ಕೌನ್ಸೆಲಿಂಗ್ ವ್ಯವಸ್ಥೆ ಇದೆ. ಉಳಿದ ಇಲಾಖೆಗಳಲ್ಲೂ ಕೌನ್ಸೆಲಿಂಗ್ ತರಬೇಕೆಂಬ ಉದ್ದೇಶ ಈಡೇರಿಲ್ಲ. ಶಿಕ್ಷಕರ ವರ್ಗಾವಣೆಗೆ ಸಂಬಂಧಿಸಿದಂತೆ ಇದೀಗ ಹೊಸ ಕಾನೂನು ತರಲು ಸರ್ಕಾರ ಮುಂದಾಗಿದೆ. ಇದಕ್ಕೆ ಆಕ್ಷೇಪಣೆಗಳನ್ನು ಸಹ ಕರೆಯಲಾಗಿದೆ. ಆದರೆ ಗೊಂದಲ ಮುಂದುವರಿದಿದೆ.

ಕರೊನಾ ಕೆಲಸಕ್ಕೆ ಅಡ್ಡಿ: ಈ ನಿರ್ಧಾರದಿಂದಾಗಿ ಸರ್ಕಾರದಲ್ಲಿ 15 ದಿನ ವರ್ಗಾವಣೆ ಹೊರತು ಬೇರೆ ಕೆಲಸಗಳೇ ನಡೆಯುವುದಿಲ್ಲ. ಎಲ್ಲ ಇಲಾಖೆಗಳಲ್ಲೂ ವರ್ಗಾವಣೆ ಅಬ್ಬರ ಇದ್ದೇ ಇರುತ್ತದೆ. ಕರೊನಾ ನಿಯಂತ್ರಣದಲ್ಲಿ ದುಡಿಯುತ್ತಿರುವ ಇಲಾಖೆ ಗಳಲ್ಲೂ ವರ್ಗಾವಣೆ ಸದ್ದು ಮಾಡುವುದರಿಂದ ಕೋವಿಡ್ ನಿಯಂತ್ರಣದ ಕೆಲಸಕ್ಕೆ ಅಡ್ಡಿಯಾಗ ಬಹುದೆಂಬ ಆತಂಕ ಮೂಡಿದೆ.

https://www.vijayavani.net/traces-of-coronavirus-found-in-sewage-in-gujarat/