ಮುಖ ದೃಢೀಕರಣ ಮೂಲಕ ಯುಎಎನ್

ನವದೆಹಲಿ: ಕಾರ್ವಿುಕರ ಭವಿಷ್ಯ ನಿಧಿ ಸಂಸ್ಥೆ (ಇಪಿಎಫ್​ಒ) ಚಂದಾದಾರರಾಗುವವರು ಇನ್ನು ಮುಂದೆ ಮುಖ ದೃಢೀಕರಣ (ಫೇಸ್ ಆಥೆಂಟಿಕೇಷನ್) ಮೂಲಕ ತಮ್ಮ ಸಾರ್ವತ್ರಿಕ ಖಾತೆ ಸಂಖ್ಯೆಯನ್ನು (ಯುನಿವರ್ಸಲ್ ಅಕೌಂಟ್ ನಂಬರ್- ಯುಎಎನ್) ಜನರೇಟ್ ಮಾಡಬಹುದು ಎಂದು ಕೇಂದ್ರ ಕಾರ್ವಿುಕ ಸಚಿವ ಮನ್ಸುಖ್ ಮಾಂಡವಿಯಾ ಮಂಗಳವಾರ ತಿಳಿಸಿದ್ದಾರೆ.

ಯುಎಎನ್ ಹಂಚಿಕೆ ಮತ್ತು ಆಕ್ಟಿವೇಶನ್​ಗೆ ಫೇಸ್ ಆಥೆಂಟಿಕೇಷನ್ ಬಳಸಲು ಅನುವಾಗುವಂತೆ ಸುಧಾರಿತ ಡಿಜಿಟಲ್ ಸೇವೆಗಳನ್ನು ಇಪಿಎಫ್​ಒ ಜಾರಿಗೆ ತಂದಿದೆ. ಉಮಂಗ್ ಮೊಬೈಲ್ ಆಪ್​ನಲ್ಲೇ ಸದಸ್ಯರು ಇನ್ನು ಮುಂದೆ ಈ ಸೌಲಭ್ಯ ಬಳಸಿ ಯುಎಎನ್ ಜನರೇಟ್ ಮಾಡಿಕೊಳ್ಳಬಹುದಾಗಿದೆ. ಉದ್ಯೋಗದಾತ ಕಂಪನಿಗಳು ಕೂಡ ಈ ವ್ಯವಸ್ಥೆಯನ್ನು ಬಳಸಬಹುದಾಗಿದೆ. ಕೋಟ್ಯಂತರ ಸದಸ್ಯರಿಗೆ ಸಂಪರ್ಕರಹಿತ, ಸುರಕ್ಷಿತ, ಆಧುನಿಕ ಡಿಜಿಟಲ್ ಸೇವೆ ನೀಡುವಲ್ಲಿ ಇದೊಂದು ಮಹತ್ವದ ಹೆಜ್ಜೆಯಾಗಿದೆ ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದರು.

ಉಮಂಗ್ ಆಪ್ ತೆರೆದು, ಅದರಲ್ಲಿ ಯುಎಎನ್ ಹಂಚಿಕೆಗೆ ನೀಡಿರುವ ಸೂಚನೆಗಳನ್ನು ಪಾಲಿಸಬೇಕು. ಆಧಾರ್ ಆಧರಿತ ಪರಿಶೀಲನೆ ಬಳಿಕ ಯುಎಎನ್ ಜನರೇಟ್ ಆಗುತ್ತದೆ. ಆಧಾರ್ ಡೇಟಾಬೇಸ್​ನಲ್ಲಿ ನಮೂದಿಸಲಾದ ಮೊಬೈಲ್ ಸಂಖ್ಯೆಗೆ ಎಸ್​ಎಂಎಸ್ ಮೂಲಕ ಕಳಿಸಲಾಗುತ್ತದೆ. ನಂತರ ಉದ್ಯೋಗಿಯು ಯುಎಎನ್ ಕಾರ್ಡನ್ನು ಪೋರ್ಟಲ್ ಅಥವಾ ಉಮಂಗ್ ಆಪ್ ಮೂಲಕ ಡೌನ್​ಲೋಡ್ ಮಾಡಿಕೊಳ್ಳಬಹುದು. ಈಗಾಗಲೇ ಯುಎಎನ್ ಇದ್ದು, ಅದನ್ನು ಆಕ್ಟಿವೇಟ್ ಮಾಡಿಕೊಳ್ಳದೇ ಇರುವವರು ಉಮಂಗ್ ಆಪ್ ಮೂಲಕ ಮಾಡಿಕೊಳ್ಳಬಹುದು ಎಂದು ವಿವರಿಸಿದರು.

ಮೊದಲಿನ ಸಾಂಪ್ರದಾಯಿಕ ಪದ್ಧತಿಗಳಿಗಿಂತ ಮುಖ ದೃಢೀಕರಣದಂತಹ ಬಯೋಮೆಟ್ರಿಕ್ ಪದ್ಧತಿಯ ಬಳಕೆ ಹೆಚ್ಚು ಸುರಕ್ಷಿತ ಮಾತ್ರವಲ್ಲದೆ, ಉದ್ಯೋಗದಾತರು ಮತ್ತು ಪ್ರಾದೇಶಿಕ ಕಚೇರಿಯ ಹಸ್ತಕ್ಷೇಪವಿಲ್ಲದೆ ವಿವಿಧ ಸೇವೆಗಳನ್ನು ನೇರವಾಗಿ ಉದ್ಯೋಗಿಯೇ ಪಡೆಯುವುದಕ್ಕೂ ದಾರಿ ಮಾಡಿಕೊಡುತ್ತದೆ. ಮುಂದಿನ ದಿನಗಳಲ್ಲಿ ಪಿಂಚಣಿದಾರರಿಗೆ ಮನೆ ಬಾಗಿಲಿಗೇ ಸೇವೆಗಳನ್ನು ಒದಗಿಸಲು ಅನುವಾಗುವಂತೆ ಡಿಜಿಟಲ್ ತಂತ್ರಜ್ಞಾನವನ್ನು ಅಳವಡಿಸಲಾಗುವುದು ಎಂದು ಸಚಿವರು ಹೇಳಿದರು.

https://www.vijayavani.net/priyansh-arya-creates-a-huge-record-in-ipl-history