ಸಂಪತ್ತು ಮತ್ತು ಸಚ್ಚಿದಾನಂದ ಸ್ವರೂಪಳಾದ ತ್ರಿಪುರ ಸುಂದರಿ ಸುವರ್ಣ ಕಾಂತಿಯುಕ್ತಳೂ, ಹಿಮಾಲಯದಂತೆ ಶ್ವೇತವರ್ಣದವಳು, ರಥವಾಹಿನಿಯಾಗಿದ್ದಾಳೆ. ಸದಾ ಹಸನ್ಮುಖಿಯು, ವರದ ಮತ್ತು ಅಭಯ ಮುದ್ರೆಗಳಿಂದ ಸುಶೋಭಿತಳಾಗಿದ್ದಾಳೆ. ನಾಲ್ಕು ತೋಳುಗಳಿಂದ ಕೂಡಿದವಳಾಗಿದ್ದು, ಶಕ್ತಿ ಮತ್ತು ಲಯದ ಸಂಕೇತಗಳಿಂದ ತ್ರಿಶೂಲ ಮತ್ತು ಡಮರುಗವನ್ನು ಹಿಡಿದಿದ್ದು, ಇನ್ನೆರಡು ಕೈಗಳಲ್ಲಿ ವರದ ಮತ್ತು ಅಭಯ ಮುದ್ರೆಗಳಲ್ಲಿ ಬ್ರಹ್ಮ ದೇವಾದಿಗಳಿಗೆ ದರ್ಶನವಿತ್ತು ಜಗತ್ತನ್ನು ರಕ್ಷಿಸಲು 16 ವಯಸ್ಸುಳ್ಳ ಕನ್ಯೆಯಾಗಿ ರೂಪಗೊಂಡಳು. ಬಿಳಿ ಹೊಳಪಿನ ನಂದಿಯನ್ನು ಏರಿ ಕನ್ಯೆಯಾಗಿ ದೇವಿಯು ಶಿವನು ವಾಸಿಸುತ್ತಿದ್ದ ಕೈಲಾಸಕ್ಕೆ ತೆರಳಿ ವಿವಾಹವಾಗಿ ಶಿವ-ಶಕ್ತಿ ಐಕ್ಯವಾಗಿ ಗಣಾಧೀಪ ಹಾಗೂ ಕಾರ್ತಿಕೇಯನೊಂದಿಗೆ ಹಾಗೂ ಶಿವಗಣಗಳೊಂದಿಗೆ ನರ್ತಿಸುತ್ತ ಲೋಕಕಲ್ಯಾಣಕ್ಕಾಗಿ ಆಶೀರ್ವದಿಸಿದ ದೇವಿಯ ರೂಪವೇ ತ್ರಿಪುರ ಸುಂದರಿ ಮಹಾಗೌರಿ. ಈಕೆ ಮಾತೃಶಕ್ತಿಯಾಗಿದ್ದು ದುರ್ಗಾ, ಪಾರ್ವತಿ, ಕಾಳಿ ಮತ್ತು ಇತರ ರೂಪಗಳಲ್ಲಿ ಪ್ರತ್ಯಕ್ಷಳಾಗಿ ಜಗತ್ತನ್ನು ಹಾಗೂ ಭಕ್ತರನ್ನು ಕಾಪಾಡುತ್ತಿದ್ದಾಳೆ.
