ರಸ್ತೆಯಲ್ಲಿ ಸ್ಕೂಟರ್​ ನಿಲ್ಲಿಸಿ ನಿದ್ದೆಗೆ ಜಾರಿದ್ದ ಸವಾರನಿಗೆ ಕಾದಿತ್ತು ಶಾಕ್​..!

ಹೈದರಾಬಾದ್​: ರಸ್ತೆಯಲ್ಲಿ ಸ್ಕೂಟರ್​ ಮೇಲೆ ನಿದ್ದೆಗೆ ಜಾರಿದ್ದ ವ್ಯಕ್ತಿಯೊಬ್ಬನ ಸವಿನಿದ್ದೆಗೆ ಪೊಲೀಸರು ಭಂಗ ಉಂಟುಮಾಡಿದ ಘಟನೆ ಹೈದರಾಬಾದಿನ ಮಧುಪುರದಲ್ಲಿ ಮಂಗಳವಾರ (ಅ. 27) ನಡೆದಿದೆ.

ಹೈದರಾಬಾದಿನ ಎಲ್ಲಂಬಂಡ ಏರಿಯಾ ನಿವಾಸಿ ಹಾಗೂ ಆಫೀಸ್​ ಬಾಯ್​ ಆಗಿ ಕೆಲಸ ಮಾಡುವ ಸತ್ಯನಾರಾಯಣ ಎಂಬುವರು ನಡು ರಸ್ತೆಯಲ್ಲೇ ಸ್ಕೂಟರ್ ನಿಲ್ಲಿಸಿ ನಿದ್ದೆಗೆ ಜಾರಿದ್ದರು. ಗಾಚಿಬೌಲಿಯಲ್ಲಿರುವ ಐಸಿಐಸಿಐ ಬ್ಯಾಂಕ್​ನಿಂದ ಆಗಮಿಸುತ್ತಿದ್ದ ಸತ್ಯನಾರಾಯಣ, ಮಾದಕ ಸ್ಥಿತಿಯಲ್ಲಿದ್ದರಿಂದ ಐಕೆಇಎ (IKEA) ಅಂಡರ್​ಪಾಸ್​ ಬಳಿ ರಸ್ತೆ ಮಧ್ಯೆಯೇ ತನ್ನ ಹೋಂಡ ಆ್ಯಕ್ಟೀವಾ ನಿಲ್ಲಿಸಿ ನಿದ್ದೆ ಮಾಡುತ್ತಿದ್ದರು.

ಇದಕ್ಕೂ ಮುನ್ನ ಅಡ್ಡಾದಿಡ್ಡಿಯಾಗಿ ವಾಹನ ಚಲಾಯಿಸಿಕೊಂಡು ಬಂದಿದ್ದನ್ನು ಮಧುಪುರ ಸಂಚಾರಿ ಪೊಲೀಸರು ಸಿಸಿಟಿವಿ ಮೂಲಕ ಗಮನಿಸಿದ್ದರು. ತಕ್ಷಣ ಎಚ್ಚೆತ್ತ ಪೊಲೀಸರು ಸ್ಥಳಕ್ಕೆ ಆಗಮಿಸಿದಾಗ ಸ್ಕೂಟರ್​ ಮೇಲೆ ಮಲಗಿದ್ದ ಸತ್ಯಾನಾರಾಯಣರನ್ನು ಎಚ್ಚರಿಸಿ, ಡ್ರಂಕ್​ ಆ್ಯಂಡ್​ ಡ್ರೈವ್​ ಪರಿಶೀಲಿಸಿದ್ದಾರೆ. ಈ ವೇಳೆ ಅವರ ರಕ್ತದಲ್ಲಿ 334 ಮಿಲಿ ಗ್ರಾಂ ಆಲ್ಕೋಹಾಲ್​ ಇರುವುದು ಪತ್ತೆಯಾಗಿದೆ. ಯಾವುದೇ ದಾಖಲೆಯಿಲ್ಲದೇ ಡ್ರಂಕ್​ ಆ್ಯಂಡ್​ ಡ್ರೈವ್​ ಮಾಡಿದ ಆತನ ವಿರುದ್ಧ ಕೇಸು ದಾಖಲಸಿಕೊಳ್ಳಲಾಗಿದೆ. ವಾಹನ ಮತ್ತು ಸತ್ಯನಾರಾಯಣ ಇಬ್ಬರನ್ನು ಪೊಲೀಸರು ವಶಕ್ಕೆ ಪಡೆದುಕೊಂಡಿದ್ದಾರೆ.

ಇದನ್ನೂ ಓದಿ: ವಿಮಾನದಲ್ಲಿ ಬಂದು ಸರಗಳ್ಳತನ ಮಾಡಿದ್ದವ ಸೇರಿ ಉತ್ತರ ಪ್ರದೇಶದ ಆರು ಆರೋಪಿಗಳ ಬಂಧನ: ಎಸ್ಪಿ ಕೆ.ಎಂ.ಶಾಂತರಾಜು

ಸತ್ಯನಾರಾಯಣ ಅವರು ಸ್ಕೂಟರ್​ ಮೇಲೆ ಮಲಗಿದ್ದ ಫೋಟೋವನ್ನು ಸೈಬರಬಾದ್​ ಸಂಚಾರಿ ಪೊಲೀಸ್​ ತಮ್ಮ ಟ್ವಿಟರ್ ಖಾತೆಯಲ್ಲಿ ಅಪ್​ಲೋಡ್​ ಮಾಡಿದ್ದು, ಸಂಭವನೀಯ ರಸ್ತೆ ಅಪಘಾತಗಳನ್ನು ತಪ್ಪಿಸುವ ಉದ್ದೇಶದಿಂದ ಡ್ರಂಕ್​ ಆ್ಯಂಡ್​ ಡ್ರೈವ್​ ಪ್ರಕರಣ ದಾಖಲಿಸಲಾಗುತ್ತದೆ. ವ್ಯಕ್ತಿಯೊಬ್ಬ ನಡು ರಸ್ತೆಯಲ್ಲಿ ಮಲಗಿರುವುದನ್ನು ಸೈಬರಬಾದ್​ ಟ್ರಾಫಿಕ್​ ಕಮ್ಯಾಂಡ್​ ಮತ್ತು ಕಂಟ್ರೋಲ್​ ಸೆಂಟರ್​ ಸಿಸಿಟಿವಿಯಲ್ಲಿ ಪರಿಶೀಲಿಸಿತು ಮತ್ತು ಮಧುಪುರ ಪೊಲೀಸರಿಗೆ ಎಚ್ಚರಿಸಿತು ಎಂದು ಹೇಳಿದೆ. (ಏಜೆನ್ಸೀಸ್​)

https://www.vijayavani.net/s-house-for-87-rupees/