ತೆರಿಗೆ ವಂಚಿಸುತ್ತಿದ್ದ ಮೂವರು ಟೆಕ್ಕಿಗಳ ಸೆರೆ

ಬೆಂಗಳೂರು: ಆದಾಯ ತೆರಿಗೆ ವಂಚನೆಗೆ ಸಹಕರಿಸಿದ ಆರೋಪದ ಮೇಲೆ ಇನ್ಪೋಸಿಸ್ ಕಂಪನಿಯ ಮೂವರು ನೌಕರರನ್ನು ಎಲೆಕ್ಟ್ರಾನಿಕ್ಸ್​ಸಿಟಿ ಪೊಲೀಸರು ಬಂಧಿಸಿದ್ದಾರೆ.

ಆಂಧ್ರಪ್ರದೇಶದ ಕಲ್ಯಾಣ್ ಕುಮಾರ್, ಪ್ರಕಾಶ್ ಮತ್ತು ದೇವೇಶ್ವರ್ ರೆಡ್ಡಿ ಬಂಧಿತರು. ಇವರಿಂದ 3 ಲಕ್ಷ ರೂ. ಜಪ್ತಿ ಮಾಡಲಾಗಿದೆ. ಆದಾಯ ತೆರಿಗೆ ಇಲಾಖೆಯಲ್ಲಿ (ಐಟಿ) ತೆರಿಗೆ ಸಂಗ್ರಹದ ಪ್ರಾಜೆಕ್ಟ್ (ಸಿಪಿಸಿ) ವಿಭಾಗದಲ್ಲಿ ಮೂವರು ಕೆಲಸ ಮಾಡುತ್ತಿದ್ದರು. ತೆರಿಗೆ ಪಾವತಿದಾರರಿಂದ ಕಮಿಷನ್ ಪಡೆದು ತೆರಿಗೆ ವಂಚನೆಗೆ ನೆರವಾಗುತ್ತಿದ್ದರು. ಈ ಬಗ್ಗೆ ಐಟಿ ಅಧಿಕಾರಿಗಳು ನೀಡಿದ ದೂರಿನ ಮೇರೆಗೆ ಕ್ರಮ ತೆಗೆದುಕೊಳ್ಳಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ತೆರಿಗೆ ವಸೂಲಿಯ ಸಿಪಿಸಿ ಪ್ರಾಜೆಕ್ಟ್​ಗೆ ಐಟಿ ಇಲಾಖೆಯು ಇನ್ಪೋಸಿಸ್ ನೆರವು ಪಡೆದಿದೆ. ಸಿಪಿಸಿ ಪ್ರಾಜೆಕ್ಟ್​ನಲ್ಲಿ ಕಲ್ಯಾಣ್, ಪ್ರಕಾಶ್ ಮತ್ತು ದೇವೇಶ್ವರ್ ಕೆಲಸ ಮಾಡುತ್ತಿದ್ದರು. ಐಟಿ ರಿಟರ್ನ್ಸ್ ಕುರಿತು ಇಲಾಖೆಗೆ ಜನರು ದಾಖಲೆ ಸಲ್ಲಿಸುತ್ತಾರೆ. ತೆರಿಗೆ ಮರುಪಾವತಿ ಮಾಡಿಕೊಳ್ಳುವವರಿಗೆ 7 ದಿನಗಳಲ್ಲಿ ಹಣ ಪಡೆಯಲು ಅವಕಾಶವಿದೆ.

ಈ ಅವಕಾಶವನ್ನು ಬಳಸಿಕೊಂಡ ಆರೋಪಿಗಳು, ತೆರಿಗೆದಾರರಿಂದ ಹಣ ಪಡೆದು ಸುಳ್ಳು ಮಾಹಿತಿ ನೀಡಿ ಇಲಾಖೆಗೆ ವಂಚಿಸುತ್ತಿದ್ದರು. ಈ ಬಗ್ಗೆ ಅನುಮಾನಗೊಂಡ ಐಟಿ ನಿರ್ದೇಶಕ ಸಿಬಿಚೆನ್ ಮ್ಯಾಥ್ಯೂ, ಇಲಾಖಾ ತನಿಖೆ ನಡೆಸಿದಾಗ ಕಮಿಷನ್ ಪಡೆದು ತೆರಿಗೆ ವಂಚನೆಗೆ ಇವರು ಸಹಕರಿಸಿರುವುದು ಖಚಿತವಾಗಿದೆ. ಈ ವರದಿ ಆಧರಿಸಿ ಎಲೆಕ್ಟ್ರಾನಿಕ್ಸ್​ಸಿಟಿ ಠಾಣೆಗೆ ದೂರು ನೀಡಿದ್ದರು. ವಂಚನೆ (ಐಪಿಸಿ 420) ಸೇರಿ ವಿವಿಧ ಕಾಯ್ದೆಯಡಿ ಪ್ರಕರಣ ದಾಖಲಿಸಿಕೊಂಡ ಪೊಲೀಸರು, ಆರೋಪಿಗಳನ್ನು ಬಂಧಿಸಿ ಜೈಲಿಗೆ ಕಳುಹಿಸಿರುವುದಾಗಿ ಅಧಿಕಾರಿಗಳು ತಿಳಿಸಿದ್ದಾರೆ.

https://www.vijayavani.net/adugodi-grbej-chemical-explosion/