ರೆಪೊ ದರದಲ್ಲಿ ಬದಲಾವಣೆ ಇಲ್ಲ; ಆರ್​ಬಿಐ ಹಣಕಾಸು ನೀತಿ ಸಮಿತಿ ಸಭೆ ತೀರ್ಮಾನ

ಮುಂಬೈ: ಸತತ 8ನೇ ಸಾರಿಯೂ ರೆಪೊ ದರ ಶೇ. 4 ಮತ್ತು ರಿವರ್ಸ್ ರೆಪೊ ದರವನ್ನು ಶೇ. 3.35 ರಲ್ಲೇ ಮುಂದುವರಿಸಿರುವ ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್​ಬಿಐ), ಮಾರ್ಜಿನಲ್ ಸ್ಟಾ್ಯಂಡಿಂಗ್ ಫೆಸಿಲಿಟಿ (ಎಂಎಸ್​ಎಫ್) ಮತ್ತು ಬ್ಯಾಂಕ್​ಗಳ ಬಡ್ಡಿ ದರವನ್ನು ಶೇ. 4.25ರಲ್ಲೇ ಸ್ಥಿರಗೊಳಿಸಿದೆ. 2021-22ನೇ ಸಾಲಿನ ಹಣದುಬ್ಬರದ ಪ್ರಮಾಣವನ್ನು ಶೇ. 5.3ಕ್ಕೆ ಇಳಿಸಿದೆ. ಒಟ್ಟು ದೇಶೀಯ ಉತ್ಪನ್ನ (ಜಿಡಿಪಿ)ವನ್ನು ಶೇ. 9.5ಕ್ಕೆ ಎತ್ತರಿಸಿದೆ. ತತಕ್ಷಣದ ಪಾವತಿ ಸೇವೆಯ (ಐಎಂಪಿಎಸ್) ಮಿತಿಯನ್ನು 2 ಲಕ್ಷ ರೂಪಾಯಿಂದ 5 ಲಕ್ಷ ರೂಪಾಯಿಗೆ ಹೆಚ್ಚಿಸುವ ಪ್ರಸ್ತಾವ ಮಾಡಿದೆ.

ಆರ್​ಬಿಐ ಗವರ್ನರ್ ಶಕ್ತಿಕಾಂತ ದಾಸ್ ಅಧ್ಯಕ್ಷತೆಯಲ್ಲಿ ಶುಕ್ರವಾರ ಸಂಪನ್ನವಾದ ಹಣಕಾಸು ನೀತಿ ಸಮಿತಿಯ (ಎಂಪಿಸಿ) ಮೂರು ದಿನಗಳ ಸಭೆಯಲ್ಲಿ ಈ ನಿರ್ಧಾರ ಕೈಗೊಳ್ಳಲಾಗಿದೆ. ಕೋವಿಡ್-19 ಸಂಕಷ್ಟದಿಂದ ನಲುಗಿದ್ದ ಆರ್ಥಿಕತೆ ಪೂರ್ಣವಾಗಿ ಚೇತರಿಸಿಕೊಳ್ಳದ ಕಾರಣ ಬಡ್ಡಿ ದರ ಕಡಿತದ ಬಗ್ಗೆ ಆರ್​ಬಿಐ ಮುಕ್ತವಾಗಿದೆ ಎಂದು ಶಕ್ತಿಕಾಂತ ದಾಸ್ ಹೇಳಿದ್ದಾರೆ.

ಹಣದುಬ್ಬರದ ದರ ತುಸು ಇಳಿಕೆ: 2021-22ನೇ ಸಾಲಿಗೆ ಈ ಮೊದಲು ಅಂದಾಜಿಸಿದ್ದ ಶೇ. 5.7ರ ಹಣದುಬ್ಬರ ಪ್ರಮಾಣವನ್ನು ಶೇ. 5.3ಕ್ಕೆ ಆರ್​ಬಿಐ ಇಳಿಸಿದೆ. ಈ ಹಣಕಾಸು ವರ್ಷದ ಮೂರನೇ ತ್ರೖೆಮಾಸಿಕದಲ್ಲಿ ಹಣದುಬ್ಬರ ಪ್ರಮಾಣ ತಗ್ಗುವ ನೀರಿಕ್ಷೆಯನ್ನು ಅದು ವ್ಯಕ್ತಪಡಿಸಿದೆ. ಹಣದುಬ್ಬರ ದರ ಶೇ. 4ರೊಳಗೆ ಇರುವುದು ಉತ್ತಮ ಎಂಬುದು ಆರ್​ಬಿಐ ಸಲಹೆ. ಆದರೆ, ಇತ್ತೀಚಿನ ಅನೇಕ ತಿಂಗಳಿಂದ ಇದು ಆರ್​ಬಿಐ ಸೂಚಿಸಿದ್ದಕ್ಕಿಂತ ಶೇ. 2 ಹೆಚ್ಚಾಗಿಯೇ ಇದೆ.

ಶೇ. 9.5 ಜಿಡಿಪಿ ಬೆಳವಣಿಗೆ: ಒಟ್ಟು ದೇಶೀಯ ಉತ್ಪನ್ನ ದರ (ಜಿಡಿಪಿ)ವನ್ನು ಶೇ. 9.5ಕ್ಕೆ ಆರ್​ಬಿಐ ಎತ್ತರಿಸಿದೆ. 2021-22ನೇ ಸಾಲಿನ ಎರಡನೇ ತ್ರೖೆಮಾಸಿಕದಲ್ಲಿ ಇದು ಶೇ. 7.9ರಷ್ಟು ಇರಲಿದೆ ಎಂದು ಅದು ಹೇಳಿದೆ. ಸೆಪ್ಟೆಂಬರ್​ಗೆ ಕೊನೆಗೊಂಡಿರುವ ಈ ತ್ರೖೆಮಾಸಿಕದ ವರದಿ ಇನ್ನಷ್ಟೆ ಬರಬೇಕಿದೆ. ಕರೊನಾ ಸಾಂಕ್ರಾಮಿಕದ 2ನೇ ಅಲೆ ವೇಳೆ ನೆಲಕಚ್ಚಿದ್ದ ಎಲ್ಲ ವಲಯಗಳು ನಿರಂತರ ಚಟುವಟಿಕೆಯಿಂದ ಕೂಡಿರುವುದರಿಂದ ಜಿಡಿಪಿಯಲ್ಲಿ ಪ್ರಗತಿ ಆಗುತ್ತಿದೆ ಎಂದು ಆರ್​ಬಿಐ ತಿಳಿಸಿದೆ.

ಐಎಂಪಿಎಸ್ ಮಿತಿ ಹೆಚ್ಚಳ: ದಿನದ 24 ತಾಸಿನಲ್ಲೂ ಖಾತೆಯಿಂದ ಖಾತೆಗೆ ಹಣ ವರ್ಗಾಯಿಸುವ ಐಎಂಪಿಎಸ್ ಮಿತಿಯನ್ನು 2 ಲಕ್ಷ ರೂಪಾಯಿಯಿಂದ 5 ಲಕ್ಷ ರೂಪಾಯಿಗೆ ಏರಿಸಲು ಎಂಪಿಸಿ ಸಭೆಯಲ್ಲಿ ಪ್ರಸ್ತಾವ ಮಂಡನೆಯಾಗಿದೆ. ಎಸ್​ಎಂಎಸ್ ಮತ್ತು ಐವಿಆರ್​ಎಸ್ ಮೂಲಕ ಐಎಂಪಿಎಸ್ ಸೇವೆಯನ್ನು ಪಡೆಯಲು ಕನಿಷ್ಠ 5 ಸಾವಿರ ರೂಪಾಯಿಗಳ ವರ್ಗಾವಣೆ ಕಡ್ಡಾಯ ಎಂದು ಆರ್​ಬಿಐ ತಿಳಿಸಿದೆ.

ಪಾಯಿಂಟ್ ಆಫ್ ಸೇಲ್ (ಪಿಒಎಸ್), ಕ್ವಿಕ್ ರೆಸ್ಪಾನ್ಸ್ (ಕ್ಯೂಆರ್) ಕೋಡ್ ಮೂಲಕ ನಡೆಯುವ ಪಾವತಿ ಸ್ವೀಕೃತಿ (ಪಿಎ)ಯ ವ್ಯಾಪಕ ಲಭ್ಯತೆ ಹೆಚ್ಚಿಸಲು ಆರ್​ಬಿಐ ಮುಂದಾಗಿದೆ. ಪಿಎ ಮೂಲಸೌಕರ್ಯದ ಕೊರತೆ ಹೊಂದಿರುವ ಪ್ರದೇಶದಲ್ಲಿ ಜಿಯೋ ಟ್ಯಾಗಿಂಗ್ ತಂತ್ರಜ್ಞಾನದ ಚೌಕಟ್ಟನ್ನು (ಫ್ರೇಮ್ ವರ್ಕ್) ಪರಿಚಯಿಸಲು ಬಯಸಿದೆ.

ಸಭೆಯ ಇತರ ನಿರ್ಧಾರಗಳು

• ಹಣಕಾಸು ವಂಚನೆ ತಡೆಯಲು ‘ರೆಗ್ಯುಲಟರಿ ಸ್ಯಾಂಡ್​ಬಾಕ್ಸ್ ಸ್ಕೀಂ’ ಪರಿಚಯ.
• ಎನ್​ಬಿಎಫ್​ಸಿಗಳಲ್ಲಿ ಗ್ರಾಹಕರ ಕುಂದುಕೊರತೆ ನಿವಾರಿಸಲು ಆಂತರಿಕ ಒಂಬುಡ್ಸ್​ಮನ್ ವ್ಯವಸ್ಥೆ.
• ಜಿಎಸ್​ಎಪಿ ಕಾರ್ಯಕ್ರಮದಲ್ಲಿ ಸರ್ಕಾರಿ ಬಾಂಡ್​ಗಳ ಖರೀದಿ ಸ್ಥಗಿತ.
• ವಿಆರ್​ಆರ್​ಆರ್ 14 ದಿನದ ಹರಾಜು ಪ್ರಕ್ರಿಯೆ ಸ್ಥಗಿತ. ಮುಂದಿನ ಎರಡು ತಿಂಗಳಿಗೆ ಹರಾಜಿನ ಮೊತ್ತ 1ರಿಂದ 2 ಲಕ್ಷ ಕೋಟಿ ರೂ.ಗೆ ನಿಗದಿ.
• ಸಣ್ಣ ಬ್ಯಾಂಕ್​ಗಳ ಎಸ್​ಎಲ್​ಟಿಆರ್​ಒ ಸಾಲ ಯೋಜನೆ ಮೂರು ವರ್ಷ ವಿಸ್ತರಣೆ.

https://www.vijayavani.net/unvaccinated-delhi-government-employees-barred-from-attending-office/

https://www.vijayavani.net/samantha-gave-slapping-reply-to-all-comments/