ಟ್ರಂಪ್ ಈಗ ಅಧ್ಯಕ್ಷರಾಗಿ ಆಯ್ಕೆಯಾಗಿರುವುದರಿಂದಾಗಿ, ಅವರ ವಿರುದ್ಧ ಇರುವ ಪ್ರಕರಣಗಳಿಗೆ ಸಂಬಂಧಿಸಿ ಕನಿಷ್ಠ ಪಕ್ಷ ನಾಲ್ಕು ವರ್ಷ ಯಾವುದೇ ಬೆಳವಣಿಗೆ ನಡೆಯುವ ಸಾಧ್ಯತೆ ಕಡಿಮೆ. ತಮ್ಮ ವಿರುದ್ಧ ಇರುವ ನಾಲ್ಕು ಪ್ರಕರಣಗಳನ್ನು ಎದುರಿಸುವುದಕ್ಕಾಗಿಯೇ ಟ್ರಂಪ್ ಈ ವರ್ಷ ಬಹುಪಾಲು ಸಮಯ ವಿನಿಯೋಗಿಸಬೇಕಾಗಿ ಬಂತು. 2016ರ ಚುನಾವಣೆ ಸಮಯದಲ್ಲಿ, ನೀಲಿಚಿತ್ರ ನಟಿ ಸ್ಟಾರ್ವಿು ಡೇನಿಯಲ್ಸ್ ಎಂಬಾಕೆಗೆ ಹಷ್ ಮನಿ (ಹೆಸರು ಬಾಯ್ಬಿಡದಿರಲು ನೀಡುವ ಹಣ) ನೀಡಿದ ಪ್ರಕರಣಕ್ಕೆ ಸಂಬಂಧಿಸಿ, ಸುಳ್ಳು ವ್ಯವಹಾರ ದಾಖಲೆ ನೀಡಿದ ಕಾರಣಕ್ಕೆ ಟ್ರಂಪ್ ದೋಷಿ ಎಂದು ನ್ಯೂಯಾರ್ಕ್ ನ್ಯಾಯಾಧೀಶರೊಬ್ಬರು ಮೇ ತಿಂಗಳಲ್ಲಿ ತೀರ್ಪಿತ್ತಿದ್ದು, ಶಿಕ್ಷೆ ಪ್ರಮಾಣ ಪ್ರಕಟಿಸಲು ನವೆಂಬರ್ 26ನ್ನು ನಿಗದಿಪಡಿಸಲಾಗಿದೆ. ಈ ಪ್ರಕರಣದಲ್ಲಿ ನಾಲ್ಕು ವರ್ಷಗಳವರೆಗೆ ಜೈಲು ಶಿಕ್ಷೆ ವಿಧಿಸುವ ಅವಕಾಶವಿದೆ. ಆದರೆ, ಅಧಿಕಾರ ವಹಿಸಿಕೊಳ್ಳುವ ಕಾಲಘಟ್ಟದಲ್ಲಿ ನಿಯೋಜಿತ ಅಧ್ಯಕ್ಷರನ್ನು ಶಿಕ್ಷೆಗೊಳಪಡಿಸುವುದು ಅಮೆರಿಕ ಇತಿಹಾಸದಲ್ಲಿ ಕಂಡುಕೇಳರಿಯದ ವಿದ್ಯಮಾನ. ಹೀಗಾಗಿ ಶಿಕ್ಷೆ ಪ್ರಮಾಣ ಘೋಷಿಸುವುದನ್ನು ಮುಂದೂಡುವಂತೆ ಟ್ರಂಪ್ ಪರ ವಕೀಲರು ನ್ಯಾಯಾಲಯದಲ್ಲಿ ಮನವಿ ಮಾಡುವ ಸಾಧ್ಯತೆ ಇದೆ. ಅಧ್ಯಕ್ಷರಾಗಿ ಫೆಡರಲ್ ಕೇಸುಗಳನ್ನು ರದ್ದುಪಡಿಸುವ ಅಧಿಕಾರ ಇರುತ್ತದಾದರೂ, ಎಲ್ಲ ಪ್ರಕರಣಗಳನ್ನೂ ಹೀಗೆ ಮಾಡಲಾಗದು. ಅಧಿಕಾರದಲ್ಲಿರುವಾಗ ಅಧ್ಯಕ್ಷರಿಗೆ ಕ್ರಿಮಿನಲ್ ಪ್ರಕರಣಗಳ ವಿಚಾರಣೆಯ ಹೊರೆ ಇರಬಾರದು ಎಂಬ ಕಾರಣಕ್ಕೆ, ಟ್ರಂಪ್ ವಿರುದ್ಧದ ಪ್ರಕರಣಗಳ ವಿಚಾರದಲ್ಲಿ ಯಾವುದೇ ಕ್ರಮವಾಗದಂತೆ ತಡೆ ನೀಡಬೇಕೆಂದು ನ್ಯಾಯಾಲಯಕ್ಕೆ ಮನವಿ ಮಾಡುವುದಾಗಿ ಟ್ರಂಪ್ ವಕೀಲರು ಹೇಳಿದ್ದಾರೆ.
