ಕೇಂದ್ರದಿಂದ ಪ್ರಕಟವಾಗಿಲ್ಲ ಹೊಸ ಮಾರ್ಗಸೂಚಿ; ರಾಜ್ಯದಲ್ಲಿ ಮೇ 19ರವರೆಗೂ ಲಾಕ್​ಡೌನ್ ವಿಸ್ತರಣೆ

ನವದೆಹಲಿ: ಲಾಕ್​ಡೌನ್​ ಮೂರನೇ ಹಂತದ ಅವಧಿ ಮೇ 17ಕ್ಕೆ (ಇಂದು) ಮುಕ್ತಾಯವಾಗಬೇಕಿತ್ತು. ಹಾಗೇ ಮೇ 18ರಿಂದ ಲಾಕ್​ಡೌನ್​ 4.0 ಜಾರಿಯಾಗಲಿದೆ. ಅದು ಹೊಸ ಸ್ವರೂಪ, ನಿಯಮಗಳೊಂದಿಗೆ ಜಾರಿಯಾಗಲಿದೆ

ಎಂದು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರು ಮೇ 12ರಂದು ದೇಶವನ್ನುದ್ದೇಶಿಸಿ ಮಾತನಾಡುವ ಸಂದರ್ಭದಲ್ಲಿ ತಿಳಿಸಿದ್ದರು. ಹಾಗೇ ಲಾಕ್​ಡೌನ್​ ನಾಲ್ಕನೇ ಹಂತದ ಮಾರ್ಗಸೂಚಿಯನ್ನು ಮೇ 17ರೊಳಗೆ ಪ್ರಕಟಿಸುವುದಾಗಿಯೂ ಹೇಳಿದ್ದರು.

ಇದನ್ನೂ ಓದಿ: ನಿಯಂತ್ರಣಕ್ಕೆ ಬಾರದ ಕರೊನಾ: ಮೇ 31ರವರೆಗೆ ಲಾಕ್​ಡೌನ್​ ವಿಸ್ತರಣೆಗೆ ನಿರ್ಧಾರ

ಅದರಂತೆ ಕೇಂದ್ರ ಸರ್ಕಾರ ಮೇ 16ರಂದು ಮಾರ್ಗಸೂಚಿ ಪ್ರಕಟಿಸಬಹುದು ಎಂದು ನಿರೀಕ್ಷಿಸಲಾಗಿತ್ತು. ಆದರೆ ಇಂದು ಕೂಡ ಯಾವುದೇ ಆದೇಶ ಹೊರಬೀಳದ ಕಾರಣ ರಾಜ್ಯ ಸರ್ಕಾರ ಈಗಿರುವ ಲಾಕ್​ಡೌನ್ ಅವಧಿಯನ್ನು ಇನ್ನೆರಡು ದಿನ ಅಂದರೆ ಮೇ 19ರವರೆಗೆ ಮುಂದುವರಿಸಿದೆ.

ಮೇ 19ರ ವರೆಗೆ ಅಥವಾ ಮುಂದಿನ ಆದೇಶದವರೆಗೆ ಲಾಕ್​ಡೌನ್ 3.0 ರಾಜ್ಯದಲ್ಲಿ ಮುಂದುವರಿಯಲಿದ್ದು, ಹಳೇ ಮಾರ್ಗಸೂಚಿಯ ನಿಯಮಗಳೇ ಯಥಾವತ್ತಾಗಿ ಪಾಲನೆಯಾಗಲಿದೆ ಎಂದು ರಾಜ್ಯ ಸರ್ಕಾರದ ಮುಖ್ಯ ಕಾರ್ಯದರ್ಶಿ ವಿಜಯ್ ಭಾಸ್ಕರ್​ ಅವರು ಅಧಿಕೃತ ಆದೇಶ ನೀಡಿದ್ದಾರೆ.

ಲಾಕ್​ಡೌನ್​ 3.0ರ ಜಾರಿಗೂ ಮೊದಲು ಮೇ 2ರಂದು ಪ್ರಕಟಿಸಲಾದ ಮಾರ್ಗಸೂಚಿಯಲ್ಲಿರುವ ಕೊವಿಡ್​-19ರ ನಿಯಂತ್ರಣಾ ನಿಯಮಗಳು ಮೇ 19ರವರೆಗೂ ಮುಂದುವರಿಯಲಿವೆ. ಈ ಬಗ್ಗೆ ರಾಜ್ಯದ ಎಲ್ಲ ಇಲಾಖೆಗಳು, ಜಿಲ್ಲಾಧಿಕಾರಿಗಳು, ಪೊಲೀಸ್​ ವರಿಷ್ಠಾಧಿಕಾರಿಗಳಿಗೆ ತಿಳಿಸಲಾಗಿದೆ ಎಂದಿದ್ದಾರೆ.

ಇದನ್ನೂ ಓದಿ: ಲಾಕ್​ಡೌನ್​ ಕಾಲ ಮುಗೀತು, ಕರೊನಾ ಕಟ್ಟಿ ಹಾಕುತ್ತಾ ಕಂಟೇನ್​ಮೆಂಟ್​?