ಇದೇ 26ರಂದು ಅಧಿಕಾರಾವಧಿಯ ಒಂದು ವರ್ಷ ಪೂರೈಸಲಿರುವ ರಾಜ್ಯ ಬಿಜೆಪಿ ಸರ್ಕಾರ ಹೊಸ ಕೈಗಾರಿಕಾ ನೀತಿಯನ್ನು ಪ್ರಕಟಿಸುವುದರೊಂದಿಗೆ, ಆರ್ಥಿಕತೆಯ ಚೇತರಿಕೆಗೆ ಮಹತ್ವದ ಹೆಜ್ಜೆ ಇರಿಸಿದೆ. ಕರೊನಾ ಸಂಕಷ್ಟದಿಂದಾಗಿ ಆರ್ಥಿಕತೆ ಕುಸಿದಿದ್ದು, ಕೈಗಾರಿಕಾ ವಲಯ ಭಾರಿ ನಷ್ಟ ಎದುರಿಸುತ್ತಿದೆ. ಉದ್ಯೋಗನಷ್ಟದ ಪ್ರಮಾಣ ಹೆಚ್ಚುತ್ತಿದೆ. ಪರಿಸ್ಥಿತಿ ಇಷ್ಟೊಂದು ಸವಾಲಿನಿಂದ ಕೂಡಿರುವಾಗ ಕರ್ನಾಟಕದಲ್ಲಿ ಉದ್ಯಮಸ್ನೇಹಿ ಮತ್ತು ಹೂಡಿಕೆಗೆ ಪೂರಕ ವಾತಾವರಣ ಸೃಷ್ಟಿಸಲು ಸಶಕ್ತ ಕೈಗಾರಿಕಾ ನೀತಿಯ ಅಗತ್ಯವಿತ್ತು. ಈಗಿನ ಸ್ಪರ್ಧಾತ್ಮಕ ವಾತಾವರಣ, ಉದ್ಯಮಗಳಿಗೆ ಅವಶ್ಯವಾಗಿ ಬೇಕಾಗಿರುವ ಪ್ರೋತ್ಸಾಹಕರ ನೀತಿ ಇದೆಲ್ಲವನ್ನೂ ಪರಿಗಣಿಸಿಯೇ, ಹೊಸ ಕೈಗಾರಿಕಾ ನೀತಿ ರೂಪಿಸಲಾಗಿದ್ದು, ಗುರುವಾರ ಅದಕ್ಕೆ ಸಂಪುಟದ ಅನುಮೋದನೆ ದೊರೆತಿದೆ. ಬೆಂಗಳೂರಿಗೆ ಮಾತ್ರ ಕೈಗಾರಿಕೆಗಳು ಸೀಮಿತವಾಗಿದ್ದು, ಎರಡನೇ ಮತ್ತು ಮೂರನೇ ಹಂತದ ನಗರಗಳಿಗೂ ಕೈಗಾರಿಕೆಗಳು ವಿಸ್ತರಣೆಯಾಗಬೇಕು ಎಂಬ ಬಹುಕಾಲದ ಬೇಡಿಕೆಗೆ ಸರ್ಕಾರ ಈ ಬಾರಿ ಸಕಾರಾತ್ಮಕವಾಗಿ ಸ್ಪಂದಿಸಿದ್ದು, ಅದು ಅನುಷ್ಠಾನದ ರೂಪದಲ್ಲಿ ಬರಬೇಕಿದೆ.
