ದಕ್ಷಿಣ ಕನ್ನಡ, ಉಡುಪಿ ಹಾಗೂ ಉತ್ತರ ಕನ್ನಡ ಮೂರು ಜಿಲ್ಲೆಗಳಲ್ಲಿ 320 ಕಿ.ಮೀ. ವ್ಯಾಪ್ತಿಯ ಕಡಲತೀರವನ್ನು ಕರ್ನಾಟಕ ಹೊಂದಿದ್ದು, ಸಮುದ್ರ ಮೀನುಗಾರಿಕೆ ಜತೆ ಒಳನಾಡು ಮೀನುಗಾರಿಕೆ ಕೂಡ ಜನಪ್ರಿಯಗೊಂಡಿದೆ. ಕಳೆದ ಮೂರು ದಶಕಗಳಿಂದ ಮೀನುಗಾರಿಕೆ ಮತ್ತು ಜಲಕೃಷಿಯು ರಾಜ್ಯದಲ್ಲಿ ಪ್ರವರ್ಧಮಾನದಲ್ಲಿರುವ ಚಟುವಟಿಕೆಯಾಗಿ ಗುರುತಿಸಿಕೊಂಡಿದೆ. ಸಾಗರೋತ್ಪನ್ನಗಳು ಕರಾವಳಿಯ ಆರ್ಥಿಕ ಶಕ್ತಿಯಾಗಿದೆ. ಮೀನುಗಾರಿಕೆಗೆ ಕಡಲಿನಲ್ಲಿ ಬೋಟುಗಳಲ್ಲಿ ತೆರಳುವವರು, ಬಲೆ ತಯಾರಕರು, ಮೀನು ಸಾಗಾಟದಲ್ಲಿ ದುಡಿಯುವವರು, ಮಂಜುಗಡ್ಡೆ ತುಂಬುವವರು, ಮಾರುಕಟ್ಟೆಯಲ್ಲಿ- ವಿವಿಧೆಡೆ ಸಂಚರಿಸಿ ಮೀನು ಮಾರಾಟ ಮಾಡುವವರು, ಬೋಟು ತಯಾರಿಸುವವರು... ಹೀಗೆ ನೂರು ಆಯಾಮಗಳಲ್ಲಿ ಈ ಕ್ಷೇತ್ರದಲ್ಲಿ ಜನರು ದುಡಿಯುತ್ತಿದ್ದಾರೆ. ಇವರು ದುಡಿದ ಹಣ ಜವಳಿ, ಆಭರಣ, ಪೀಠೋಪಕರಣ ಸಹಿತ ಇತರ ವ್ಯಾಪಾರ- ವ್ಯವಹಾರ ಕೇಂದ್ರಗಳು, ಶಿಕ್ಷಣ, ಆರೋಗ್ಯ ಸಹಿತ ಇತರ ಆದ್ಯತಾ ಕ್ಷೇತ್ರಗಳಲ್ಲಿ ವ್ಯಯವಾಗುತ್ತದೆ. ಆದ್ದರಿಂದ ಕರಾವಳಿಯ ಅಭಿವೃದ್ಧಿ ಹಾಗೂ ಮೀನುಗಾರಿಕೆಯನ್ನು ಪ್ರತ್ಯೇಕಿಸುವುದು ಅಸಾಧ್ಯ. ಅಧಿಕೃತ ಮೂಲ ಪ್ರಕಾರ ರಾಜ್ಯದಲ್ಲಿ ಸುಮಾರು 2,33,624 ಮೀನುಗಾರರು ಇದ್ದಾರೆ. ಇವರಲ್ಲಿ 96,853 ಮಂದಿ ಮೀನುಗಾರಿಕೆಯಲ್ಲಿ ತೊಡಗಿದ್ದಾರೆ. ಇವರು ರಾಜ್ಯದ 217 ಗ್ರಾಮಗಳಲ್ಲಿ ವಾಸವಾಗಿದ್ದಾರೆ.
