ಟಾಂಜಾನಿಯಾದಲ್ಲಿ ಪಪ್ಪಾಯ ಹಣ್ಣಿಗೂ ಕರೊನಾ ಪಾಸಿಟಿವ್​...! ಮೇಕೆ, ಕುರಿಗಳಿಗೆಲ್ಲ ಸೋಂಕು..

ಚೀನಾದಿಂದ ರಫ್ತಾಗುವ ಟೆಸ್ಟಿಂಗ್​ ಕಿಟ್​, ಪಿಪಿಇ ಕಿಟ್​ಗಳ ಬಗ್ಗೆ ಅನೇಕ ರಾಷ್ಟ್ರಗಳು ಕ್ಯಾತೆ ತೆಗೆದಿವೆ. ಗುಣಮಟ್ಟವಿಲ್ಲ ಎಂದೂ ಆರೋಪ ಮಾಡಿ, ವಾಪಸ್​ ಕಳಿಸಿದ್ದು ಈಗಾಗಲೇ ಸುದ್ದಿಯಾಗಿದೆ.

ಆದರೆ ಸದ್ಯ ಪೂರ್ವ ಆಫ್ರಿಕಾದ ಟಾಂಜಾನಿಯಾ ದೇಶ ಒಂದು ವಿಚಿತ್ರ ಆರೋಪ ಮಾಡಿದೆ. ವಿದೇಶದಿಂದ ತರಿಸಲಾದ ಕರೊನಾ ಟೆಸ್ಟಿಂಗ್​ ಕಿಟ್​ ಸ್ವಲ್ಪವೂ ಸರಿಯಿಲ್ಲ. ಅದರಲ್ಲಿ ವಿಪರೀತ ದೋಷವಿದೆ ಎಂದು ಟಾಂಜಾನಿಯಾ ಅಧ್ಯಕ್ಷ ಜಾನ್ ಮಾಗುಫುಲಿ ಹೇಳಿದ್ದಾರೆ.

ಟಾಂಜಾನಿಯಾದಲ್ಲಿ ಕರೊನಾ ಸೋಂಕಿನ ಸಂಖ್ಯೆಯನ್ನು ಬಹಿರಂಗಪಡಿಸದಂತೆ ಆದೇಶ ಹೊರಡಿಸಿ ಟೀಕೆಗೆ ಒಳಗಾಗಿದ್ದ ಜಾನ್​ ಅವರು ಈಗ ಮತ್ತೊಂದು ವಿಷಯವನ್ನು ಹೇಳುವ ಮೂಲಕ ವಿಚಿತ್ರ ರೀತಿಯಲ್ಲಿ ಸುದ್ದಿಯಾಗಿದ್ದಾರೆ.

ವಾಯವ್ಯ ಟಾಂಜಾನಿಯಾದ ಚಾಟೋ ಎಂಬಲ್ಲಿ ನಡೆದ ಸಮಾರಂಭದಲ್ಲಿ ಮಾತನಾಡಿದ ಅಧ್ಯಕ್ಷ ಜಾನ್​ ಮಾಗುಫುಲಿ ಅವರು, ಕರೊನಾ ಟೆಸ್ಟ್​ ಕಿಟ್​ಗಳನ್ನು ವಿದೇಶದಿಂದ ಆಮದು ಮಾಡಿಕೊಳ್ಳಲಾಗಿತ್ತು. ಆದರೆ ಅವು ತಾಂತ್ರಿಕ ಸಮಸ್ಯೆ ಹೊಂದಿವೆ. ಪಪ್ಪಾಯಿ ಹಣ್ಣು, ಕುರಿ, ಮೇಕೆಗಳಿಗೂ ಕರೊನಾ ಪಾಸಿಟಿವ್​ ಎಂದೇ ವರದಿ ತೋರಿಸುತ್ತಿವೆ ಎಂದು ಹೇಳಿದ್ದಾರೆ.

ಇದನ್ನೂ ಓದಿ: 50 ಸಾವಿರದತ್ತ ಓಡುತ್ತಿದೆ ಕರೊನಾ ಸೋಂಕಿತರ ಸಂಖ್ಯೆ; 1500ಕ್ಕಿಂತಲೂ ಹೆಚ್ಚು ಮಂದಿ ಸಾವು..

ನಾವಿದನ್ನು ನೋಡಿದ್ದೇವೆ. ಕುರಿ, ಮೇಕೆಗಳ ಮಾದರಿಯನ್ನು ಸಂಗ್ರಹಿಸಿ ಪ್ರಯೋಗಾಲಯಕ್ಕೆ ತಪಾಸಣೆಗೆ ಕಳಿಸಲಾಗಿತ್ತು. ಅಷ್ಟೇ ಅಲ್ಲ ಪಪ್ಪಾಯ ಹಣ್ಣಿನ ರಸವನ್ನೂ ರವಾನಿಸಲಾಗಿತ್ತು. ಆದರೆ ಅದರ ಮೇಲೆ ಮನುಷ್ಯರ ಹೆಸರು ಮತ್ತು ವಯಸ್ಸನ್ನು ನಮೂದಿಸಲಾಗಿತ್ತು. ಕಿಟ್​ ಪರೀಕ್ಷೆ ಮಾಡಲೆಂದೇ ಹೀಗೆ ಮಾಡಿದ್ದೆವು.

ಲ್ಯಾಬೋರೇಟರಿಯಲ್ಲಿ ಇದನ್ನು ಪರೀಕ್ಷೆ ಮಾಡುವವರಿಗೆ ಇವು ಕುರಿ, ಮೇಕೆ, ಪಪ್ಪಾಯದ್ದು, ಮನುಷ್ಯರದ್ದಲ್ಲ ಎಂದು ಗೊತ್ತಿರಲಿಲ್ಲ. ಅವರು ವಿದೇಶದಿಂದ ಬಂದ ಟೆಸ್ಟಿಂಗ್​ ಕಿಟ್​ಗಳ ಮೂಲಕ ಆ ಮಾದರಿಗಳನ್ನು ತಪಾಸಣೆ ಮಾಡಿ ವರದಿ ನೀಡಿದ್ದಾರೆ. ಎಲ್ಲವೂ ಕರೊನಾ ಪಾಸಿಟಿವ್​ ಎಂದೇ ಬಂದಿವೆ. ನಮಗೆ ಇದು ದೊಡ್ಡ ಆಶ್ಚರ್ಯವನ್ನುಂಟುಮಾಡಿದೆ ಎಂದು ಜಾನ್​ ಹೇಳಿದ್ದಾರೆ.

ಇದನ್ನೂ ಓದಿ:  ಈಕೆ ‘ಹೆಪ್ಪುಗಟ್ಟಿದ ಮಹಿಳೆ’ ಎಂದೇ ಪ್ರಸಿದ್ಧ..; ಆದ್ರೆ ಈ ಹೆಸರು ಬರಲು ಕಾರಣವಾದ ಘಟನೆ ಮೈ ಜುಂ ಎನ್ನಿಸುವಷ್ಟು ಭಯಾನಕ..!

ಕುರಿ, ಮೇಕೆಗಳಿಗೇನೂ ಕರೊನಾ ವೈರಸ್​ ತಗುಲಿಲ್ಲ. ಪಪ್ಪಾಯ ಹಣ್ಣಿಗೆ ಹೇಗೆ ಸೋಂಕು ಬರುತ್ತದೆ. ಆದರೂ ವರದಿ ಪಾಸಿಟಿವ್​ ಬಂದಿದೆ ಅಂದರೆ ಇಲ್ಲೋನೋ ತಪ್ಪಾಗುತ್ತಿದೆ ಎಂದೇ ಅರ್ಥ. ಇದರ ಬಗ್ಗೆ ತನಿಖೆಯಾಗಲೇಬೇಕು ಎಂದು ಮಗುಫುಲಿ ಆದೇಶ ನೀಡಿದ್ದಾರೆ. ಅಲ್ಲದೆ, ತಮ್ಮ ದೇಶದ ಸೈನಿಕರಿಗೆ ಎಚ್ಚರಿಕೆಯಿಂದ ಇರಬೇಕು. ಆಮದಾಗುವ ಇಂಥ ಕಿಟ್​ಗಳನ್ನು ಒಮ್ಮೆ ಪರಿಶೀಲನೆ ನಡೆಸಿ ಎಂದಿದ್ದಾರೆ.

ಸದ್ಯ ಯುರೋಪಿಯನ್​ ದೇಶಗಳಿಗೆ ಹೋಲಿಸಿದರೆ ಆಫ್ರಿಕನ್​ ದೇಶಗಳಲ್ಲಿ ಕರೊನಾ ಪ್ರಸರಣ ಕಡಿಮೆ ಇದೆ. ಟಾಂಜಾನಿಯಾದಲ್ಲಿ ಭಾನುವಾರದವರೆಗೆ 480 ಕರೊನಾ ವೈರಸ್​ ಪ್ರಕರಣಗಳು ಪತ್ತೆಯಾಗಿದ್ದವು. ಅದಾದ ಮೇಲೆ ಅಧ್ಯಕ್ಷ ಜಾನ್ ಮಾಗುಫುಲಿ ಹೆಲ್ತ್​ ಬುಲೆಟಿನ್ ನೀಡುವುದನ್ನು ನಿಷೇಧಿಸಿದ್ದಾರೆ. (ಏಜೆನ್ಸೀಸ್​)

VIDEO| ಪವರ್​ಸ್ಟಾರ್​ ಪುನೀತ್​ ರಾಜ್​ಕುಮಾರ್ ವರ್ಕೌಟ್​ ನೋಡಿದ್ರೆ, ನೀವು ಖಂಡಿತ ದಂಗಾಗ್ತಿರಾ!