ಬಾಹ್ಯಾಕಾಶದಲ್ಲೇ ತರಕಾರಿ ಬೆಳೆಯುತ್ತಿರುವ ಸುನಿತಾ ವಿಲಿಯಮ್ಸ್; ಆದ್ರೆ ತಿನ್ನುವುದಕ್ಕಲ್ಲ​, ಕಾರಣ ಕೇಳಿದ್ರೆ ಗ್ರೇಟ್​ ಅಂತೀರಿ | Sunita Williams

Sunita Williams : ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಿಂದ ​ಭೂಮಿಗೆ ಮರಳಲಾಗದೇ ಅಲ್ಲಿಯೇ ಸಿಲುಕಿರುವ ಭಾರತೀಯ ಮೂಲದ ಗಗನಯಾತ್ರಿ ಸುನೀತಾ ವಿಲಿಯಮ್ಸ್, ಬಾಹ್ಯಾಕಾಶದಲ್ಲೇ ಹೆಚ್ಚು ಸಮಯ ಕಳೆಯುತ್ತಿರುವುದರಿಂದ ಗಂಭೀರ ಆರೋಗ್ಯ ಸಮಸ್ಯೆಗಳ ಭಯವಿದ್ದರೂ ವಿಶ್ರಾಂತಿಯ ಮೊರೆ ಹೋಗದೆ ಬಾಹ್ಯಾಕಾಶ ನಿಲ್ದಾಣದಲ್ಲೇ ತರಕಾರಿ ಬೆಳೆಯುತ್ತಿದ್ದಾರೆ.

ಸುನಿತಾ ಅವರು ಬಾಹ್ಯಾಕಾಶದಲ್ಲಿ ಲೆಟಿಸ್ ಎಂಬ ಎಲೆ ತರಕಾರಿಯನ್ನು ಬೆಳೆಯುತ್ತಿದ್ದಾರೆ. ಅಚ್ಚರಿಯ ಸಂಗತಿ ಏನೆಂದರೆ, ಈ ತರಕಾರಿಯನ್ನು ತಿನ್ನುವುದಕ್ಕೆ ಬೆಳೆಯುತ್ತಿಲ್ಲ. ಹಾಗಾದರೆ, ಅದನ್ನು ಬೆಳೆಯುತ್ತಿರುವುದಾದರೂ ಏತಕ್ಕೆ ಎಂಬ ಪ್ರಶ್ನೆ ನಿಮ್ಮಲ್ಲಿ ಮೂಡಬಹುದು. ಅದಕ್ಕೆ ಉತ್ತರ ಇಲ್ಲಿದೆ. ಅದಕ್ಕೂ ಮೊದಲು ಲೆಟಿಸ್​ ತರಕಾರಿಯ ಬಗ್ಗೆ ತಿಳಿದುಕೊಳ್ಳೋಣ.

ಲೆಟಿಸ್​ ಎಂಬುದು ಒಂದು ಎಲೆ ತರಕಾರಿಯಾಗಿದ್ದು, ಬಹಳಷ್ಟು ಆರೋಗ್ಯ ಪ್ರಯೋಜನಗಳನ್ನು ಒಳಗೊಂಡಿದೆ. ಲ್ಯಾಕ್ಟುಕಾ ಸಟಿವಾ ಎಂಬುದು ಲೆಟಿಸ್​ನ ವೈಜ್ಞಾನಿಕ ಹೆಸರು. ಇದು ಡೈಸಿ ಕುಟುಂಬಕ್ಕೆ ಸೇರಿದ ಪ್ರಬೇಧವಾಗಿದೆ. ಆಸ್ಟರೇಸಿಗೆ ಸೇರಿದ ಎಲೆಗಳ ಹಸಿರು ಸಸ್ಯವಾಗಿದೆ. ಮೆಡಿಟರೇನಿಯನ್ ಪ್ರದೇಶದಲ್ಲಿ ಹುಟ್ಟಿಕೊಂಡ ಈ ತರಕಾರಿ ಮಾನವಕುಲಕ್ಕೆ ತಿಳಿದಿರುವ ಹಳೆಯ ಕೃಷಿಯಾಗಿದೆ. ಅಂದಹಾಗೆ ಲೆಟಿಸ್ ಕಡಿಮೆ ಕ್ಯಾಲೋರಿ ತರಕಾರಿಯಾಗಿದ್ದು, ವಿಟಮಿನ್ ಎ, ಕೆ ಮತ್ತು ಸಿ ಸೇರಿದಂತೆ ಅನೇಕ ಪೋಷಕಾಂಶಗಳನ್ನು ಒಳಗೊಂಡಿದೆ. ಇದು ಫೈಬರ್‌ನ ಅತ್ಯುತ್ತಮ ಮೂಲವಾಗಿದೆ. ಈ ತರಕಾರಿಯಲ್ಲಿರುವ ಹೆಚ್ಚಿನ ನೀರಿನ ಅಂಶವು ಜಲಸಂಚಯನವನ್ನು ಒದಗಿಸುತ್ತದೆ. ಇದರಲ್ಲಿ ಪೊಟ್ಯಾಶಿಯಂ ಮತ್ತು ಕ್ಯಾಲ್ಸಿಯಂನಂತಹ ವಿವಿಧ ಖನಿಜಗಳು ಸಹ ಇವೆ.

ಇದನ್ನೂ ಓದಿ: ಗೀಸರ್​​ ಉಪಯೋಗಿಸುವವರು ಎಂದಿಗೂ ಈ ತಪ್ಪುಗಳನ್ನು ಮಾಡ್ಬೇಡಿ! ತಪ್ಪಿದರೆ ನಿಮ್ಮ ಜೀವವೇ ಹೋದಿತು

ನಾವೀಗ ಅಸಲಿ ವಿಚಾರದ ಕಡೆ ಬರೋಣ. ಸುನಿತಾ ವಿಲಿಯಮ್ಸ್​ ಅವರು ಬಾಹ್ಯಾಕಾಶದಲ್ಲಿ ಈ ತರಕಾರಿಯನ್ನು ಬೆಳೆಯುವ ಉದ್ದೇಶವೇನೆಂದರೆ, ಸೂಕ್ಷ್ಮ ಗುರುತ್ವಾಕರ್ಷಣೆಯಲ್ಲಿ ನೀರಿನ ಮಟ್ಟವು ಸಸ್ಯಗಳ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಎಂಬುದನ್ನು ನೋಡಲು ಸುನಿತಾ ವಿಲಿಯಮ್ಸ್ ಒಂದು ಪ್ರಯೋಗವನ್ನು ನಡೆಸುತ್ತಿದ್ದಾರೆ. ಭವಿಷ್ಯದ ಅಂತರಗ್ರಹ ಬಾಹ್ಯಾಕಾಶ ಕಾರ್ಯಕ್ರಮಗಳು ಮತ್ತು ಭೂಮಿಯ ಮೇಲಿನ ಕೃಷಿ ಎರಡಕ್ಕೂ ಪ್ರಯೋಜನಕಾರಿಯಾಗುವ ಸಂಶೋಧನೆಯು ನಡೆಯುತ್ತಿದೆ. ಅದರ ಫಲಿತಾಂಶಗಳ ಆಧಾರದ ಮೇಲೆ ಹೊಸ ಕೃಷಿ ಪದ್ಧತಿಗಳನ್ನು ಭೂಮಿಯಲ್ಲಿಯೂ ಅಳವಡಿಸಬಹುದಾಗಿದೆ.

ತೇವಾಂಶದ ಮಟ್ಟವು ಸಸ್ಯದ ಬೆಳವಣಿಗೆಯ ಮೇಲೆ ಹೇಗೆ ಪರಿಣಾಮ ಬೀರುತ್ತದೆ ಮತ್ತು ಎಷ್ಟು ಪೋಷಕಾಂಶಗಳು ಬದಲಾಗುತ್ತವೆ ಎಂಬುದನ್ನು ಪ್ರಯೋಗವು ನೋಡುತ್ತದೆ. ಬಾಹ್ಯಾಕಾಶದಲ್ಲಿ ಸುಸ್ಥಿರ ಕೃಷಿ ಹೇಗೆ ಸಾಧ್ಯ ಮತ್ತು ಸವಾಲುಗಳೇನು ಎಂಬುದರ ಕುರಿತು ಪ್ರಯೋಗಗಳು ಮಾಹಿತಿಯನ್ನು ಒದಗಿಸಬಹುದು. ಅದೇ ರೀತಿ, ಕಡಿಮೆ ನೀರಿನ ಲಭ್ಯತೆ ಇರುವ ಸ್ಥಳಗಳಲ್ಲಿ ಕೃಷಿಗೆ ಮಾಡಲು ಸಾಧ್ಯವಾಗುತ್ತದೆ ಎಂದು ನಿರೀಕ್ಷಿಸಲಾಗಿದೆ.

ಸುನಿತಾ ವಿಲಿಯಮ್ಸ್​ ಬಾಹ್ಯಾಕಾಶದಲ್ಲೇ ಸಿಲುಕಿರುವುದೇಕೆ?

ಬೋಯಿಂಗ್​ ಸ್ಟಾರ್​ಲೈನರ್ ಸ್ಪೇಸ್​ ಕ್ಯಾಪ್ಸುಲ್​ನಲ್ಲಿ ತಾಂತ್ರಿಕ ದೋಷ ಕಾಣಿಸಿಕೊಂಡಿರುವ ಕಾರಣ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣ (ಐಎಸ್​ಎಸ್​)ದಲ್ಲಿರುವ ಭಾರತೀಯ ಮೂಲದ ಅಮೆರಿಕ ಗಗನಯಾತ್ರಿ ಸುನಿತಾ ವಿಲಿಯಮ್ಸ್ ಮತ್ತು ಬಚ್​ ವಿಲ್ಮೋರ್ ಭೂಮಿಗೆ ಆಗಮಿಸುವುದು ವಿಳಂಬವಾಗಲಿದೆ. ಕಳೆದ 180 ದಿನಗಳಿಗೂ ಹೆಚ್ಚು ಸಮಯದಿಂದ ಬಾಹ್ಯಾಕಾಶದಲ್ಲಿ ಸಿಲುಕಿದ್ದಾರೆ. ಇನ್ನು ವಿಲ್ಮೋರ್ ಮತ್ತು ವಿಲಿಯಮ್ಸ್‌ಗಾಗಿ ಮುಂಬರುವ ಕ್ರೂ ಡ್ರ್ಯಾಗನ್ ಉಡಾವಣೆಯಲ್ಲಿ ಎರಡು ಸ್ಥಾನಗಳನ್ನು ಖಾಲಿ ಬಿಡಲು ನಾಸಾ ಸ್ಪೇಸ್‌ಎಕ್ಸ್‌ನೊಂದಿಗೆ ಚರ್ಚಿಸಿದೆ. 2025ರ ಆರಂಭದಲ್ಲಿ ಗಗನಯಾತ್ರಿಗಳನ್ನು ಭೂಮಿಗೆ ಮರಳಿ ತರಲು 2024ರ ಸೆಪ್ಟೆಂಬರ್​ನಲ್ಲಿ ಉಡಾವಣೆ ಮಾಡಲು ನಿಗದಿಪಡಿಸಲಾದ ಸ್ಪೇಸ್​ಎಕ್ಸ್​ನ ಕ್ರ್ಯೂ-9 ಮಿಷನ್ ಅನ್ನು ಬಳಸುವುದನ್ನು ಈ ಯೋಜನೆ ಒಳಗೊಂಡಿದೆ. (ಏಜೆನ್ಸೀಸ್)

https://www.vijayavani.net/this-point-should-be-taken-care-of-when-buying-apples-otherwise-you-will-get-stuck

https://www.vijayavani.net/mobile-addiction-18-year-old-girl-killed-by-her-father-with-a-pressure-cooker