ಕೇಂದ್ರದ ನಡೆ ಕುತೂಹಲ: ಜೆ-ಕೆ ವಿಧಾನಸಭೆ ಪ್ರತಿ ವಿಷಯಕ್ಕೂ ಕಾನೂನನ್ನು ರಚಿಸಬಹುದು ಮತ್ತು ಕಾನೂನಿನ ಜಾರಿಗೆ ಹೊಸದಾಗಿ ಬರುವ ರಾಜ್ಯಪಾಲರ ಸಹಿ ಮಾತ್ರ ಅಗತ್ಯವಿರುತ್ತದೆ. ಹಾಗೇ, ಪ್ರಸ್ತುತ ಜೆ-ಕೆಯಲ್ಲಿ ಒಟ್ಟು ಶಾಸಕರ ಸಂಖ್ಯೆಯಲ್ಲಿ ಶೇ.10ರಷ್ಟು ಮಂದಿಯನ್ನು ಮಾತ್ರ ಸಚಿವರನ್ನಾಗಿ ಮಾಡಬಹುದು. ರಾಜ್ಯ ಸ್ಥಾನಮಾನ ಬಂದರೆ ಶೇ. 15ರಷ್ಟು ಶಾಸಕರು ಮಂತ್ರಿಗಳಾಗಬಹುದು. ಜೆ-ಕೆಯ 370ನೇ ವಿಧಿ ರದ್ದತಿ ಎತ್ತಿಹಿಡಿದಿದ್ದ ಸುಪ್ರೀಂಕೋರ್ಟ್, ಮುಂದಿನ ದಿನಗಳಲ್ಲಿ ರಾಜ್ಯ ಸ್ಥಾನಮಾನ ನೀಡಬೇಕು ಎಂದೂ ಆದೇಶಿಸಿತ್ತು. ಕೇಂದ್ರದ ಸಾಲಿಸಿಟರ್ ಜನರಲ್ ತುಷಾರ್ ಮೆಹ್ತಾ ಕೂಡ, ಕೇಂದ್ರ ಈ ದಿಕ್ಕಿನಲ್ಲಿ ಕೆಲಸ ಮಾಡಲಿದೆ ಎಂದಿದ್ದರು. ಆದರೆ, ಜೆ-ಕೆಯ ಆಮೂಲಾಗ್ರ ಬದಲಾವಣೆಗೆ ಕಾರಣವಾಗಿರುವ ಎನ್ಡಿಎ ಸರ್ಕಾರ, ರಾಜ್ಯ ಸ್ಥಾನಮಾನ ಮರುಸ್ಥಾಪಿಸಿ ಸಂಪೂರ್ಣ ಅಧಿಕಾರವನ್ನು ನ್ಯಾಷನಲ್ ಕಾನ್ಪರೆನ್ಸ್-ಕಾಂಗ್ರೆಸ್ಗೆ ಬಿಟ್ಟುಕೊಡುವುದೇ ಎಂಬ ಅನುಮಾನವೂ ಇದೆ. ಇದು ಅತಿಸೂಕ್ಷ್ಮ ಕಣಿವೆ ಪ್ರದೇಶವಾಗಿರುವುದರಿಂದ ಕೇಂದ್ರ ತನ್ನ ನಿಯಂತ್ರಣವನ್ನು ಪೂರ್ಣವಾಗಿ ಚುನಾಯಿತ ಸರ್ಕಾರಕ್ಕೆ ನೀಡುವುದೇ ಎಂಬ ಪ್ರಶ್ನೆಗಳಿಗೆ ಮುಂದಿನ ದಿನಗಳಲ್ಲಿ ಉತ್ತರ ಸಿಗಲಿದೆ. ಇಲ್ಲವಾದಲ್ಲಿ, ರಾಜಧಾನಿ ದಿಲ್ಲಿಯಂತೆ ಕೇಂದ್ರ-ಲೆ. ಗವರ್ನರ್ ನಡುವಿನ ಸಂಘರ್ಷ ಜಮ್ಮು-ಕಾಶ್ಮೀರದಲ್ಲೂ ನಿತ್ಯ ನಿರಂತರವಾಗಿ ನಡೆದರೂ ಅಚ್ಚರಿ ಇಲ್ಲ ಎಂದು ಹೇಳಲಾಗುತ್ತಿದೆ.
