ಅಶ್ವತ್ಥ ಎಂದರೆ ನಾಳೆ ಇಲ್ಲದೇ ಇರುವವನು ಅಥವಾ ಇವತ್ತೇ ಮರಣ ಹೊಂದುವವನು. ಕೃಷ್ಣನನ್ನಾದರೂ ತೋರಿಸು, ಇಲ್ಲ ಸಾಯುವುದಕ್ಕಾದರೂ ಅನುಮತಿಯನ್ನು ಕೊಡು ಎಂದು ಅಶ್ವತ್ಥಕ್ಕೆ ಬೇಡಿಕೊಂಡಿದ್ದಾರೆ. ಹೀಗೆ ನಾನಾ ವೃಕ್ಷಗಳ ಎದುರಿಗೆ ಹೋಗಿ ತಮ್ಮ ಗೋಳನ್ನು ಹೇಳಿಕೊಂಡಿದ್ದಾರೆ. ಯಾವ ವೃಕ್ಷವೂ ಉತ್ತರ ಕೊಡುತ್ತಿಲ್ಲ. ಕೊನೆಗೆ ಪಾದಗಳ ಚಿಹ್ನೆಯನ್ನು ನೋಡುವ ಭಾಗ್ಯ ಸಿಕ್ಕಿತಲ್ಲ ಎಂದು ಪಾದಧೂಳಿಗಳ ಸ್ಪರ್ಶ ಮಾಡಿ ಅದನ್ನು ತಲೆಗೆ ಒತ್ತಿಕೊಳ್ಳುತ್ತ ಮುಂದೆ ಸಾಗಿದ್ದಾರೆ. ಇವರಿಗೆ ಭಕ್ತಿ ಸ್ವಲ್ಪ ಮರೆತಿತ್ತು. ಕೃಷ್ಣ ನಮ್ಮನ್ನು ಅಪೇಕ್ಷೆ ಪಡುತ್ತಾನೆ ನಮಗೆ ಸಮಾನರು ಯಾರೂ ಈ ಪ್ರಪಂಚದೊಳಗೆ ಇಲ್ಲ ಎಂಬ ಅಹಂಕಾರ ಆವರಿಸಿತ್ತು. ದೇವರು ಯಾರಿಗೂ ವಶನಾಗದ ಸ್ವರಮಣನು. ಆತ್ಮಾರಾಮನಾದ ಶ್ರೀಕೃಷ್ಣನು ತನಗೆ ಯಾರ ಅಪೇಕ್ಷೆಯೂ ಇಲ್ಲ ಎನ್ನುವುದನ್ನು ಈ ಮೂಲಕ ತಿಳಿಸುತ್ತಿದ್ದಾನೆ.
