ಅಗ್ನಿಶಾಮಕ ದಳ ನೇಮಕಾತಿ ಅಧಿಕಾರಿಗಳಿಗಿಲ್ಲ ತುರ್ತು; 545 ಎಸ್​ಐ ನೇಮಕಾತಿ ಅಕ್ರಮ ಪ್ರಕರಣದ ನೆಪದಲ್ಲಿ ತಡೆ..

ರಾಜ್ಯ ಅಗ್ನಿ ಶಾಮಕ ಮತ್ತು ತುರ್ತು ಸೇವೆಗಳ ಇಲಾಖೆಯಲ್ಲಿ ಖಾಲಿ ಹುದ್ದೆಗಳ ನೇಮಕಾತಿಗೆ 545 ಸಬ್​ಇನ್​ಸ್ಪೆಕ್ಟರ್ ನೇಮಕಾತಿ ಅಕ್ರಮ ಪ್ರಕರಣದ ಗ್ರಹಣ ಹಿಡಿದಿದೆ. 2 ವರ್ಷ ಕಳೆದರೂ ತಾತ್ಕಾಲಿಕ ಪಟ್ಟಿ ಬಿಡುಗಡೆಗೆ ಅಧಿಕಾರಿಗಳು ಮೀನಮೇಷ ಏಣಿಸುತ್ತಿದ್ದು, ಅಭ್ಯರ್ಥಿಗಳು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ನೊಂದ ಅಭ್ಯರ್ಥಿಗಳು ವಿಜಯವಾಣಿ ಸಹಾಯವಾಣಿಗೆ ಕರೆ ಮಾಡಿ ಅಳಲು ತೋಡಿಕೊಂಡಿದ್ದು, ಈ ಕುರಿತು ವರದಿಗಾರ ಗೋವಿಂದರಾಜು ಚಿನ್ನಕುರ್ಚಿ ವಿಶೇಷ ವರದಿ ಸಿದ್ಧಪಡಿಸಿದ್ದಾರೆ.

ಬೆಂಗಳೂರು: ಅಗ್ನಿ ಶಾಮಕ ಮತ್ತು ತುರ್ತು ಸೇವೆಗಳ ಇಲಾಖೆಯಲ್ಲಿ ಖಾಲಿ ಇರುವ ಹುದ್ದೆಗಳಿಗೆ 2019-20ರಲ್ಲಿ ಅಧಿಸೂಚನೆ ಹೊರಡಿಸಿ ಈಗಾಗಲೆ ಎರಡು ಹಂತಗಳಲ್ಲಿ ಪರೀಕ್ಷೆ ನಡೆಸಿದ್ದರೂ ಈವರೆಗೆ ನೇಮಕಾತಿ ಪೂರ್ಣಗೊಂಡಿಲ್ಲ.

ಅಗ್ನಿ ಶಾಮಕ, ಅಗ್ನಿ ಶಾಮಕ ಚಾಲಕ ಮತ್ತು ಚಾಲಕ ತಂತ್ರಜ್ಞ ಹುದ್ದೆಗಳು ಸೇರಿ 1244 ಹುದ್ದೆಗಳ ನೇರ ನೇಮಕಾತಿಗೆ ಅರ್ಜಿ ಆಹ್ವಾನಿಸಲಾಗಿತ್ತು. ನೌಕರಿ ಬಯಸಿ ಸಾವಿರಾರು ಮಂದಿ 250 ಮತ್ತು 100 ರೂ. ಶುಲ್ಕ ಪಾವತಿಸಿ ಅರ್ಜಿ ಸಲ್ಲಿಸಿದ್ದರು. ಆಯ್ಕೆ ವಿಧಾನ ದೈಹಿಕ, ವಾಹನ ಚಾಲನ ಮತ್ತು ವೈದ್ಯಕೀಯ ಪರೀಕ್ಷೆ ಎಂದು ಮೂರು ಹಂತದಲ್ಲಿ ನಡೆಸುವುದಾಗಿ ಅಗ್ನಿ ಶಾಮಕ ಮತ್ತು ತುರ್ತು ಸೇವೆಗಳ ಇಲಾಖೆ ತಿಳಿಸಿತು.

ಅರ್ಜಿ ಸಲ್ಲಿಸಿ 10 ತಿಂಗಳ ಬಳಿಕ 2021ರ ಏ.23ರಂದು ದೈಹಿಕ ಪರೀಕ್ಷೆ ನಡೆಸಿತ್ತು. ವಾಹನ ಚಾಲನೆ ಮತ್ತು ವೈದ್ಯಕೀಯ ಪರೀಕ್ಷೆಯನ್ನು ನಡೆಸಿರಲಿಲ್ಲ. 2022ರ ಜನವರಿಯಲ್ಲಿ ವೈದ್ಯಕೀಯ ಪರೀಕ್ಷೆ ನಡೆಸಲಾಯಿತು. ಇದಾದ ಮೇಲೆ ವಾಹನ ಚಾಲನ ಪರೀಕ್ಷೆ ವಿಳಂಬ ಮಾಡಿ ಕೊನೆಗೆ ಚಾಲಕ ತಂತ್ರಜ್ಞ ಹುದ್ದೆಯ 121 ಅಭ್ಯರ್ಥಿಗಳಿಗೆ ಮತ್ತು ಅಗ್ನಿ ಶಾಮಕ ಚಾಲಕ ಹುದ್ದೆಯ 577 ಅಭ್ಯರ್ಥಿಗಳು ಸೇರಿ 698 ಅಭ್ಯರ್ಥಿಗಳಿಗೆ ಭಾರೀ ವಾಹನ ಚಾಲನಾ ಪರೀಕ್ಷೆಯನ್ನು ಫೆಬ್ರವರಿ ನಡೆಸಲಾಯಿತು.

ಮತ್ತೊಂದೆಡೆ ಅಗ್ನಿ ಶಾಮಕ ಹುದ್ದೆ ನೇಮಕಾತಿಗೆ ತಾತ್ಕಾಲಿಕ ಆಯ್ಕೆಪಟ್ಟಿ ಬಿಡುಗಡೆ ಮಾಡಿ ಸಿಂಧುತ್ವ ಪರೀಕ್ಷೆ ನಡೆಸಿತ್ತು. ಎಸ್​ಎಸ್​ಎಲ್​ಸಿ ನಕಲಿ ಅಂಕಪಟ್ಟಿ ಸಲ್ಲಿಸಿದ ಆರೋಪಿಗಳು ಸೆರೆಸಿಕ್ಕಿದ್ದರು. ಆದರೆ, ಅಗ್ನಿ ಶಾಮಕ ಚಾಲಕ ಮತ್ತು ಚಾಲಕ ತಂತ್ರಜ್ಞರ ಹುದ್ದೆಗಳ ಪರೀಕ್ಷೆ ನಡೆದು 3 ತಿಂಗಳು ಕಳೆದರೂ ತಾತ್ಕಾಲಿಕ ಆಯ್ಕೆಪಟ್ಟಿ ಬಿಡುಗಡೆಗೆ ಇಲಾಖೆ ಅಧಿಕಾರಿಗಳು ಹಿಂದೇಟು ಹಾಕುತ್ತಿದ್ದಾರೆ. ಇದರಿಂದ ಉದ್ಯೋಗ ಆಕಾಂಕ್ಷಿಗಳು ಕಾಯುತ್ತಿದ್ದು, ಸರ್ಕಾರ ಗಮನಹರಿಸಬೇಕಾಗಿದೆ.

ಆಸಕ್ತಿ ತೋರದ ಅಧಿಕಾರಿಗಳು: ಅಗ್ನಿ ಶಾಮಕ ಮತ್ತು ತುರ್ತು ಸೇವೆಗಳ ಇಲಾಖೆ ನೇಮಕಾತಿಗೆ ಅಧಿಕಾರಿಗಳೇ ಆಸಕ್ತಿ ತೋರಿಲ್ಲ ಎಂಬ ಆರೋಪ ಕೇಳಿಬಂದಿದೆ. ನೋಟಿಫಿಕೇಷನ್ ಹೊರಡಿಸಿ ಅರ್ಜಿ ಸ್ವೀಕರಿಸಿದ ಮೇಲೆ ಹಂತ ಹಂತವಾಗಿ ವಿಶೇಷ ತಂಡ ರಚನೆ ಮಾಡಿ ನೇರ ನೇಮಕಾತಿ ಪ್ರಕ್ರಿಯೆ ನಡೆಸಬೇಕು. ಹಿರಿಯ ಅಧಿಕಾರಿಗಳು ಕೈ ಜೋಡಿಸದ ಕಾರಣ ನೇಮಕಾತಿಗೆ ಬೇಕಾದ ವೇದಿಕೆ ಸಜ್ಜಾಗದೆ ತಡವಾಗುತ್ತಿದೆ. ಇದೀಗ ನೇಮಕಾತಿ ಪ್ರಕ್ರಿಯೆಯನ್ನು ಸಿಐಡಿಗೆ ವಹಿಸಲಾಗಿದೆ ಎಂದು ತಿಳಿದುಬಂದಿದೆ.

https://www.vijayavani.net/upendras-new-film-ui-launched/

https://www.vijayavani.net/fire-accident-in-tea-stall-girl-caught-up-with-fire/