ವಲಸಿಗರು ಅವರ ರಾಜ್ಯಕ್ಕೆ ತೆರಳಲು ಬಯಸಿದರೆ ಅದನ್ನು ಸರ್ಕಾರ ತಡೆಯುವಂತಿಲ್ಲ. ಅವರಿಗೆ ಶ್ರಮಿಕ ವಿಶೇಷ ರೈಲು ಅಥವಾ ಬಸ್ಸಿನ ವ್ಯವಸ್ಥೆ ಮಾಡಿಕೊಡಬೇಕು. ಬಸ್ಸು ಮತ್ತು ರೈಲಿಗೆ ಶುಲ್ಕ ವಿಧಿಸುವಂತಿಲ್ಲ. ಅದನ್ನು ಇಲಾಖೆ ಮತ್ತು ರಾಜ್ಯ ಸರ್ಕಾರ ಭರಿಸಬೇಕು. ಸ್ಥಳದಲ್ಲಿರುವ ಮತ್ತು ರೈಲಿನಲ್ಲಿ ಪ್ರಯಾಣ ಮಾಡುವ ವಲಸಿಗರಿಗೆ ಊಟದ ವ್ಯವಸ್ಥೆಯನ್ನು ರಾಜ್ಯ ಸರ್ಕಾರ ಮಾಡಬೇಕು. ಊರಿಗೆ ತೆರಳಲು ಬಯಸುವ ವಲಸಿಗರ ನೋಂದಾವಣಿ ಕಾರ್ಯವನ್ನು ರಾಜ್ಯ ಸರ್ಕಾರವೇ ನೋಡಿಕೊಳ್ಳಬೇಕು. ನೋಂದಣಿ ಮಾಡಿಸಿಕೊಂಡ ವಲಸಿಗರು ನಿಗದಿ ಪಡಿಸಲಾದ ದಿನದಂದು ಬಸ್ಸು ಅಥವಾ ರೈಲನ್ನು ಹತ್ತಿದ್ದಾರೆಯೇ ಎನ್ನುವುದನ್ನು ಖಚಿತಪಡಿಸಿಕೊಳ್ಳಬೇಕು. ಸಂಬಂಧ ಪಟ್ಟವರಿಗೆ ಸಂಪೂರ್ಣ ಮಾಹಿತಿಯನ್ನು ನೀಡಬೇಕು. ರಸ್ತೆಗಳಲ್ಲಿ ಕಾಲ್ನಡಿಗೆ ಮೂಲಕ ತೆರಳುತ್ತಿರುವ ವಲಸಿಗರಿಗೆ ಆಹಾರ, ಆಶ್ರಯ ಸೇರಿ ಎಲ್ಲ ರೀತಿಯ ಸೌಲಭ್ಯ ನೀಡಬೇಕು ಎಂದು ನ್ಯಾಯಾಲಯ ತಿಳಿಸಿದೆ.
