ನೊಂದು, ಬೆಂದವರ ಧ್ವನಿಯಾಗಿ ಕೆಲಸ ಮಾಡಿ

ಸೇಡಂ: ಸಮಾಜದಲ್ಲಿ ನೊಂದು, ಬೆಂದು ಕೊನೆಗೆ ನ್ಯಾಯವನ್ನು ಅರಸಿ ಕೋರ್ಟ್​ಗೆ ಬರುತ್ತಾರೆ. ಹೀಗೆ ನೊಂದು ಬಂದ ಕದಾರರಿಗೆ ನ್ಯಾಯ ದೊರಕಿಸಿಕೊಡುವಲ್ಲಿ ವಕೀಲರು ಶ್ರಮಿಸಬೇಕು ಎಂದು ಹಿರಿಯ ಶ್ರೇಣಿ ಸಿವಿಲ್​ ನ್ಯಾಯಾಧೀಶ ಬಸವರಾಜ ತಳವಾರ ಸಲಹೆ ನೀಡಿದರು.

ನ್ಯಾಯಾಲಯ ಆವರಣದಲ್ಲಿ ಮಂಗಳವಾರ ರಾತ್ರಿ ಆಯೋಜಿಸಿದ್ದ ವಕೀಲರ ಸಂಘದ ಪದಾಧಿಕಾರಿಗಳ ಪದಗ್ರಹಣ ಹಾಗೂ ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಅವರಿಗೆ ಅಭಿನಂದನೆ ಸಮಾರಂಭದಲ್ಲಿ ಮಾತನಾಡಿ, ರಾಜ್ಯದ ವಿವಿಧೆಡೆ ನಾನು ಸೇವೆ ಸಲ್ಲಿಸಿ ಬಂದಿದ್ದೇನೆ. ಆದರೆ ಇಲ್ಲಿನ ವಕೀಲರ ಸಂಘದ ಚಟುವಟಿಕೆ ವಿಭಿನ್ನತೆಯಿಂದ ಕೂಡಿದೆ. ಸಂಘ ಒಗ್ಗಟ್ಟಿನಿಂದ ಕೂಡಿದೆ ಎನ್ನುವುದಕ್ಕೆ ಇವತ್ತಿನ ಸಮಾರಂಭ ಸಾಯಾಗಿದೆ. ನ್ಯಾಯಾಧೀಶರು ಮತ್ತು ವಕೀಲರು ಜನರಿಗೆ ತ್ವರಿತವಾಗಿ ನ್ಯಾಯ ದೊರಕಿಸಿಕೊಡುವ ನಿಟ್ಟಿನಲ್ಲಿ ಶ್ರಮಿಸಬೇಕಾಗಿದೆ ಎಂದರು.

ವೈದ್ಯಕಿಯ ಶಿಕ್ಷಣ ಹಾಗೂ ಕೌಶಲಾಭಿವೃದ್ಧಿ ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಸನ್ಮಾನ ಸ್ವೀಕರಿಸಿ ಮಾತನಾಡಿ, ರಾಜ್ಯದಲ್ಲಿ ಕಾನೂನು ವ್ಯವಸ್ಥೆ ಬಲಪಡಿಸುವ ನಿಟ್ಟಿನಲ್ಲಿ ವಕೀಲರ ಪಾತ್ರ ಹಿರಿದಾಗಿದೆ. ದಿನ ಕಳೆದಂತೆ ಸೇಡಂ ದೊಡ್ಡ ಪ್ರಮಾಣದಲ್ಲಿ ಬೆಳೆಯುತ್ತಿದ್ದು, ಅಗತ್ಯಕ್ಕೆ ಅನುಗುಣವಾಗಿ ನ್ಯಾಯಾಲಯದ ಆವರಣದಲ್ಲಿನ ಅಭಿವೃದ್ಧಿಗೆ ಅನುದಾನ ಒದಗಿಸುವಂತೆ ಸಂಘದ ಅಧ್ಯಕ್ಷರು ಕೋರಿದ್ದು, ಈ ನಿಟ್ಟಿನಲ್ಲಿ ಕ್ರಮ ಕೈಗೊಳ್ಳಲು ಪ್ರಾಮಾಣಿಕವಾಗಿ ಶ್ರಮಿಸುವೆ ಎಂದು ಭರವಸೆ ನೀಡಿದರು.

ವಕೀಲರ ಸಂಘದ ತಾಲೂಕು ಅಧ್ಯಕ್ಷ ಶರಣಬಸಪ್ಪ ಹಾಗರಗಿ ಮಾತನಾಡಿದರು. ಶ್ರೀ ಶಿವಶಂಕರ ಶಿವಾಚಾರ್ಯರು, ಶ್ರೀ ಸದಾಶಿವ ಸ್ವಾಮೀಜಿ ಸಾನ್ನಿಧ್ಯ ವಹಿಸಿದ್ದರು.

ಕಿರಿಯ ಶ್ರೇಣಿ ನ್ಯಾಯಾಧೀಶ ಬಾಲು ಜಾಧವ್​, ತಾಲೂಕು ಉಪಾಧ್ಯೆಕ್ಷ ಹೇಮಾವತಿ ಸೇಡಂಕರ್​, ಪ್ರಧಾನ ಕಾರ್ಯದರ್ಶಿ ಭೀಮರಾಯ ದಂಡೋತಿ, ಸಹ ಕಾರ್ಯದರ್ಶಿ ಶ್ರುತಿ ಕುಕ್ಕುಂದಾ, ಖಜಾಂಚಿ ಜಗದೇವಪ್ಪ ಭೀಮ್ನಳ್ಳಿ, ಕಾರ್ಯಕಾರಣಿ ಸದಸ್ಯರಾದ ಶಾಂತಾ ಅವಂಟಿ, ಅಂಕಿತ ಜೋಶಿ, ಮಲ್ಲಿಕಾರ್ಜುನ ನೀಲಂಗಿ, ಸಂಜೀವರೆಡ್ಡಿ ಇತರರಿದ್ದರು.

ಪ್ರವಿಣ ಕುಲಕರ್ಣಿ ಸ್ವಾಗತಿಸಿದರು. ಹಣಮಂತರೆಡ್ಡಿ ನಿರೂಪಣೆ ಮಾಡಿದರು. ನಾಗೇಶ ಮಿಟ್ಟಿ ವಂದಿಸಿದರು.