ವಿಶ್ವಾಸ ಕಳೆದುಕೊಳ್ಳುತ್ತಿವೆ ಆಯುರ್ವೇದ ಆಸ್ಪತ್ರೆ

ಸಾಂಪ್ರದಾಯಿಕ ಹಾಗೂ ಆಯುಷ್​ ಚಿಕಿತ್ಸಾ ಪದ್ಧತಿಯತ್ತ ಸಾರ್ವಜನಿಕರಿಗೆ ಒಲವಿದ್ದರೂ, ಜಿಲ್ಲೆಯಲ್ಲಿನ ಸರ್ಕಾರಿ ಆಯುರ್ವೇದ ಆಸ್ಪತ್ರೆಗಳಲ್ಲಿ ಸಿಬ್ಬಂದಿ ಹಾಗೂ ಸೌಕರ್ಯ ಕೊರತೆಯಿಂದ ಜನರಿಗೆ ಸಮರ್ಪಕ ಚಿಕಿತ್ಸೆ ಸಿಗುತ್ತಿಲ್ಲ.

ಆಯುರ್ವೇದ ಪದ್ಧತಿಯಲ್ಲಿ ನೈಸರ್ಗಿಕ ಗಿಡಮೂಲಿಕೆ ಬಳಸಿ ಚಿಕಿತ್ಸೆ ನೀಡುವುದರಿಂದ ಅಡ್ಡ ಪರಿಣಾಮ ಕಡಿಮೆ. ಈ ಕಾರಣಕ್ಕಾಗಿ ದಿನದಿಂದ ದಿನಕ್ಕೆ ಬೇಡಿಕೆ ಹೆಚ್ಚುತ್ತಿದೆ. ಆದರೆ, ಮೂಲ ಸೌಕರ್ಯ ಕೊರತೆಯಿಂದ ಜನರು ಆಯುರ್ವೇದ ಆಸ್ಪತ್ರೆಗಳ ಮೇಲಿನ ವಿಶ್ವಾಸ ಕಳೆದುಕೊಳ್ಳುತ್ತಿದ್ದಾರೆ.

ಜಿಲ್ಲಾ ಆಯುಷ್​ ಆಸ್ಪತ್ರೆ, ಜಿಲ್ಲಾ ಪಂಚಕರ್ಮ ಆಸ್ಪತ್ರೆ, ಬೈಲಹೊಂಗಲ, ಸವದತ್ತಿ, ರಾಮದುರ್ಗ, ಅಥಣಿ, ರಾಯಬಾಗದಲ್ಲಿರುವ ಸರ್ಕಾರಿ ಆಯುರ್ವೇದ ಆಸ್ಪತ್ರೆಗಳು ಸೇರಿದಂತೆ ಒಟ್ಟು 41 ಆಯುಷ್​ ಆಸ್ಪತ್ರೆಗಳು ಜಿಲ್ಲೆಯಲ್ಲಿ ಕಾರ್ಯನಿರ್ವಹಿಸುತ್ತಿವೆ.

2.11 ಲ ರೋಗಿಗಳಿಗೆ ಚಿಕಿತ್ಸೆ: ಕಳೆದೊಂದು ವರ್ಷದಲ್ಲಿ ಜಿಲ್ಲಾದ್ಯಂತ ಆಯುರ್ವೇದ ಆಸ್ಪತ್ರೆಗಳು ಸೇರಿದಂತೆ ಆಯುಷ್​ ಆಸ್ಪತ್ರೆಗಳಲ್ಲಿ 2.11 ಲಕ್ಷ ಜನರು ಚಿಕಿತ್ಸೆ ಪಡೆದಿದ್ದಾರೆ. ಇವರ ಪೈಕಿ ಆಯುರ್ವೇದ 1.60 ಲಕ್ಷ, ಹೋಮಿಯೋಪಥಿ 31,228, ಯುನಾನಿ 13,613, ಮತ್ತಿತರ ವಿಧಾನಗಳ ಮೂಲಕ 24,176 ರೋಗಿಗಳು ಚಿಕಿತ್ಸೆ ಪಡೆದಿದ್ದಾರೆ.

ವೈದ್ಯರ ಕೊರತೆ: ಜಿಲ್ಲೆಯ ಒಟ್ಟು 41 ಚಿಕಿತ್ಸಾಲಯಗಳ ಪೈಕಿ ಬೈಲಹೊಂಗಲದಲ್ಲಿ 2, ಸವದತ್ತಿ ತಾಲೂಕಿನ ಹಂಚಿನಾಳ, ಚಿಕ್ಕೋಡಿ ತಾಲೂಕಿನ ನೇಜ, ನನದಿ, ಬೆಳಗಾವಿ ಆಸ್ಪತ್ರೆಗಳಲ್ಲಿ ತಲಾ ಒಂದು ವೈದ್ಯಾಧಿಕಾರಿ ಹುದ್ದೆ ಖಾಲಿ ಇವೆ. ಬೇರೆ ಕಡೆಯಿಂದ ವೈದ್ಯರನ್ನು ತಾತ್ಕಾಲಿಕವಾಗಿ ನಿಯೋಜಿಸಲಾಗಿದೆ.