ಅಯ್ಯೋ ದುರ್ವಿಧಿಯೇ... ಆಟವಾಡುವಾಗ ಗೇಟ್​ ಸಮೇತ ಕಾಂಪೌಂಡ್ ಕುಸಿದು 5 ವರ್ಷದ ಕಂದಮ್ಮ ಸಾವು! Compound Wall Collapses

ಬೆಂಗಳೂರು: ಆ ಮುಗ್ಧ ಕಂದಮ್ಮಗಳಿಗೆ ತಾವು ಆಟವಾಡುತ್ತಿದ್ದ ಜಾಗವೇ ತಮಗೆ ಮೃತ್ಯುಕೂಪವಾಗುತ್ತದೆ ಎಂಬ ಕನಿಷ್ಠ ಅರಿವೂ ಇರಲಿಲ್ಲ. ಸಂಜೆಯ ತಂಪಾದ ವಾತಾವರಣದಲ್ಲಿ ಕಣ್ಣಾಮುಚ್ಚಾಲೆ ಆಡುತ್ತಾ, ನಗುಮೊಗದಿಂದ ಓಡಾಡುತ್ತಿದ್ದ ಆ ಹಸುಗೂಸುಗಳ ಕಲರವ ಕೆಲವೇ ಕ್ಷಣಗಳಲ್ಲಿ ಆಕ್ರಂದನವಾಗಿ ಮಾರ್ಪಟ್ಟಿದೆ. ತಂದೆ-ತಾಯಿಯ ಮುದ್ದಿನ ಕಣ್ಮಣಿಯಾಗಿದ್ದ ಐದು ವರ್ಷದ ಆ ಮಗು, ಇನ್ನು ಎಂದಿಗೂ ಮರಳಿ ಬಾರದ ಲೋಕಕ್ಕೆ ಪಯಣ ಬೆಳೆಸಿದೆ. ಬಿರುಕು ಬಿಟ್ಟಿದ್ದ ಕಾಂಪೌಂಡ್ ಗೋಡೆಯ ( Compound Wall Collapses ) ರೂಪದಲ್ಲಿ ಬಂದ ಕ್ರೂರ ವಿಧಿ, ಆಟವಾಡುತ್ತಿದ್ದ ಕಂದನನನ್ನು ಬಲಿ ಪಡೆದಿದ್ದು, ಹೆತ್ತವರ ಒಡಲಲ್ಲಿ ಎಂದಿಗೂ ಆರದ ದುಃಖವನ್ನು ತುಂಬಿದೆ.

ಬೆಂಗಳೂರು ಉತ್ತರ ತಾಲೂಕಿನ ಬಾಗಲೂರು ಸಮೀಪದ ಬಂಡಿಕೊಡಿಗೇಹಳ್ಳಿಯಲ್ಲಿ ಬುಧವಾರ ಸಂಜೆ ಸುಮಾರು 6.30ರ ವೇಳೆಗೆ ಈ ಘೋರ ಅವಘಡ ಸಂಭವಿಸಿದೆ. ಅಫೀನ್ (5) ಎಂಬ ಬಾಲಕ ಗೋಡೆಯಡಿ ಸಿಲುಕಿ ಸ್ಥಳದಲ್ಲೇ ದುರಂತ ಸಾವಿಗೀಡಾಗಿದೆ. ಇನ್ನು ಇದೇ ಅವಘಡದಲ್ಲಿ ತೀವ್ರವಾಗಿ ಗಾಯಗೊಂಡಿರುವ ಸಮನ್ವಿ ಎಂಬ ಮತ್ತೊಂದು ಬಾಲಕಿಯನ್ನು ತಕ್ಷಣವೇ ಹತ್ತಿರದ ಆಸ್ಪತ್ರೆಗೆ ದಾಖಲಿಸಿ ತುರ್ತು ಚಿಕಿತ್ಸೆ ಕೊಡಿಸಲಾಗುತ್ತಿದ್ದು, ಮಗುವಿನ ಪ್ರಾಣ ಉಳಿಸಲು ವೈದ್ಯರು ಶ್ರಮಿಸುತ್ತಿದ್ದಾರೆ.

ಘಟನೆಯ ಹಿನ್ನೆಲೆಯ ನೋಡುವುದಾದರೆ, ನಿನ್ನೆ ಸಂಜೆ ಎಂದಿನಂತೆ ಬಂಡಿಕೊಡಿಗೇಹಳ್ಳಿಯ ಕಾಂಪೌಂಡ್‌ನ ಗೇಟ್ ಬಳಿ ಮೂವರು ಮಕ್ಕಳು ಆಟವಾಡುತ್ತಿದ್ದರು. ದುರದೃಷ್ಟವಶಾತ್, ಆ ಕಾಂಪೌಂಡ್ ಗೋಡೆ ಮೊದಲೇ ಜರ್ಜರಿತಗೊಂಡು ಬಿರುಕು ಬಿಟ್ಟಿತ್ತು ಎನ್ನಲಾಗಿದೆ. ಮಕ್ಕಳು ಗೇಟ್ ಬಳಿ ಆಟದಲ್ಲಿ ತಲ್ಲೀನರಾಗಿದ್ದಾಗ, ಆ ಕಾಂಪೌಂಡ್ ಗೋಡೆ ಇದ್ದಕ್ಕಿದ್ದಂತೆ ಮಕ್ಕಳ ಮೇಲೆ ಕುಸಿದು ಬಿದ್ದಿದೆ.

ಗೋಡೆಯ ಭಾರಿ ತೂಕದ ಅವಶೇಷಗಳ ಅಡಿಯಲ್ಲಿ ಸಿಲುಕಿದ ಅಫೀನ್ ಉಸಿರುಗಟ್ಟಿ ಕೊನೆಯುಸಿರೆಳೆದರೆ, ಸಮನ್ವಿ ಗಂಭೀರವಾಗಿ ಗಾಯಗೊಂಡಿದ್ದಾಳೆ. ಕಣ್ಮುಚ್ಚಿ ಕಣ್ಣು ಬಿಡುವುದರೊಳಗೆ ಇಡೀ ಜಾಗ ರಕ್ತಸಿಕ್ತವಾಗಿ ಮಾರ್ಪಟ್ಟಿತ್ತು. ಈ ಹೃದಯವಿದ್ರಾವಕ ಘಟನೆ ಸಂಭವಿಸುತ್ತಿದ್ದಂತೆ ಸ್ಥಳೀಯರು ಧಾವಿಸಿ ಬಂದು ಮಕ್ಕಳನ್ನು ಅವಶೇಷಗಳಿಂದ ಹೊರತೆಗೆದಿದ್ದಾರೆ.

ಮಾಹಿತಿ ತಿಳಿಯುತ್ತಿದ್ದಂತೆ ಬಾಗಲೂರು ಪೊಲೀಸ್ ಠಾಣೆಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದಾರೆ. ನಿರ್ಲಕ್ಷ್ಯತನದಿಂದಾಗಿ ಮಗುವಿನ ಸಾವಿಗೆ ಕಾರಣವಾದ ಕಾಂಪೌಂಡ್ ಮಾಲೀಕರ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂದು ಮೃತ ಮಗುವಿನ ಪೋಷಕರು ಹಾಗೂ ಗ್ರಾಮಸ್ಥರು ಆಕ್ರೋಶ ವ್ಯಕ್ತಪಡಿಸಿದ್ದು, ಈ ಸಂಬಂಧ ಬಾಗಲೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.