ತಗ್ಗು-ಗುಂಡಿ ರಸ್ತೆಯಲ್ಲಿ ಸಂಚಾರ ಕಷ್ಟ

ಸೇಡಂ: ಕಿತ್ತು ಹೋಗಿರುವ ಡಾಂಬರ್​.. ಎಲ್ಲೆಂದರಲ್ಲಿ ಕಾಣಿಸಿಕೊಂಡಿರುವ ತಗ್ಗು-ಗುಂಡಿಗಳು.. ಏಳುತ್ತಾ-ಬೀಳುತ್ತಾ ವಾಹನ ಚಲಾಯಿಸುವ ಸವಾರರು.. ಇದು ಯಲ್ಲಮ್ಮ ಗೇಟ್​ನಿಂದ ಗಡಿಕೇಶ್ವಾರ ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆಯ ದುಸ್ಥಿತಿಯಾಗಿದೆ.

ಸುಮಾರು 14 ಕಿಮೀ. ರಸ್ತೆ ಇದಾಗಿದ್ದು, ಭೂತಪುರ, ರಾಯ್ಕೋಡ್​ ಹಾಗೂ ಕಲ್ಲೂರ (ಕೆ) ಸೇರಿ ಹಲವು ಹಳ್ಳಿಗಳಿಗೆ ಸಂಪರ್ಕ ಕಲ್ಪಿಸುತ್ತದೆ. ಸಂಪೂರ್ಣ ಹದಗೆಟ್ಟ ರಸ್ತೆಯಲ್ಲಿ ಪ್ರಯಾಸ ಪಡುತ್ತಾ ತಿರುಗಾಡಬೇಕಿದೆ. ಶಾಲಾ-ಕಾಲೇಜು ವಿದ್ಯಾರ್ಥಿಗಳು ಹಾಗೂ ಶಿಕ್ಷರು ಹಾಗೂ ಸಾರ್ವಜನಿಕರು ನಿತ್ಯವೂ ಜೀವ ಕೈಯಲ್ಲಿಡಿದು ಸಂಚರಿಸುವ ಸ್ಥಿತಿ ನಿರ್ಮಾಣವಾಗಿದೆ.

ಬಹುತೇಕ ಡಾಂಬರ್​ ಕಿತ್ತುಹೋಗಿದ್ದು, ಎಲ್ಲೆಡೆ ಬೃಹತ್​ ತಗ್ಗುಗಳು ಬಿದ್ದಿವೆ. ದೊಡ್ಡ ವಾಹನಗಳು ಹೇಗಾದರೂ ಸಂಚರಿಸಬಹುದು. ಆದರೆ ಆಟೋ, ಬೈಕ್​ಗಳ ಸಂಚಾರ ಕಷ್ಟಕರವಾಗಿದೆ. ನಿತ್ಯವೂ ಯಾರಾದರೊಬ್ಬರೂ ಬೈಕ್​ನಿಂದ ಬಿದ್ದು ಗಾಯಮಾಡಿಕೊಳ್ಳುವುದು ಸಾಮಾನ್ಯವಾಗಿದೆ. ರಸ್ತೆಯ ದುಸ್ಥಿತಿಯಿಂದ ರೈತರು ಕೃಷಿ ಸಾಮಗ್ರಿ ಸಾಗಣೆಯಲ್ಲಿ ತೊಂದರೆ ಅನುಭವಿಸುತ್ತಿದ್ದಾರೆ. ಗರ್ಭಿಣಿಯರು, ಮಹಿಳೆಯರು ಹಾಗೂ ವಯೋವೃದ್ಧರು ತುರ್ತು ಆರೋಗ್ಯ ಸೇವೆ ಪಡೆಯಲು ಸಂಕಷ್ಟ ಎದುರಿಸುತ್ತಿದ್ದಾರೆ.

ಇದೀಗ ಮಳೆಗಾಲವಾಗಿದ್ದು, ನೀರು ಸಂಗ್ರಹವಾಗಿ ರಸ್ತೆ ಯಾವುದು ? ಗುಂಡಿಗಳು ಯಾವುವು ಎಂಬುದು ತಿಳಿಯದಂತಾಗಿದೆ. ಸಂಪೂರ್ಣ ಹಾಳಾಗಿರುವ ರಸ್ತೆ ಸುಧಾರಣೆಗೆ ಕ್ರಮ ಕೈಗೊಳ್ಳುವಂತೆ ಹಲವು ಬಾರಿ ಸಂಬಂಧಪಟ್ಟ ಅಧಿಕಾರಿಗಳು ಹಾಗೂ ಜನಪ್ರತಿನಿಧಿಗಳಿಗೆ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂಬುದು ಸ್ಥಳಿಯ ಆರೋಪವಾಗಿದೆ.

ಈಗಾಗಲೇ ಶಾಲಾ-ಕಾಲೇಜುಗಳು ಆರಂಭವಾಗಿದ್ದು, ಕೂಡಲೇ ಸಂಬಂಧಪಟ್ಟವರು ಗಮನಹರಿಸಿ ಸಂಪೂರ್ಣ ಅಪಾಯ ಆಹ್ವಾನಿಸುತ್ತಿರುವ ಯಲ್ಲಮ್ಮಗೇಟ್​-ಗಡಿಕೇಶ್ವರ ರಸ್ತೆ ದುರಸ್ತಿಗೆ ಮುಂದಾಗಬೇಕು ಎಂಬುದು ಸ್ಥಳಿಯರ ಒಕ್ಕೊರಲ ಒತ್ತಾಯವಾಗಿದೆ.

"

ಯಲ್ಲಮ್ಮಗೇಟ್​- ಗಡಿಕೇಶ್ವಾರ ರಸ್ತೆಯನ್ನು ತಕ್ಷಣ ದುರಸ್ತಿ ಮಾಡಿ ವಿದ್ಯಾರ್ಥಿಗಳು, ರೈತರು ಹಾಗೂ ಸಾರ್ವಜನಿಕರಿಗೆ ಅನುಕೂಲ ಕಲ್ಪಿಸಬೇಕು. ಕ್ರಮ ಕೈಗೊಳ್ಳದಿದ್ದಲ್ಲಿ ಸಾರ್ವಜನಿಕರ ಹಿತದೃಷ್ಟಿಯಿಂದ ಹಾಗೂ ವಿದ್ಯಾರ್ಥಿಗಳ ಭವಿಷ್ಯದ ರಣೆಗೆ ಮುಂದಿನ ದಿನಗಳಲ್ಲಿ ಪ್ರತಿಭಟನೆಗೆ ಮುಂದಾಗಬೇಕಾಗುತ್ತದೆ.

— > ವೀರೇಂದ್ರ ಪಾಟೀಲ್​ ರಾಯ್ಕೋಡ್​, ಜಿಲ್ಲಾಧ್ಯಕ್ಷ, ಬಿಜೆಪಿ ಯುವ ಮೋರ್ಚಾ