ಬಂಡೀಪುರದಲ್ಲಿ ಪ್ರವಾಸಿಗರ ಪುಂಡಾಟ: ಅಭಯಾರಣ್ಯದಲ್ಲಿ ಬಿಯರ್​ ಎಸೆದ ಯುವಕರು; ಕಾಡು ಇವರ ಅಪ್ಪನದಲ್ಲ ಎಂದ ನೆಟ್ಟಿಗರು! Tourists in BandipurTigerReserve

ಕರ್ನಾಟಕ: ಕಾಡಿನ ಮಧ್ಯೆ ಹಸಿರ ಸೌಂದರ್ಯ ಸವಿಯುತ್ತಾ, ಪ್ರಾಣಿ-ಪಕ್ಷಿಗಳನ್ನು ನೋಡಿ ಆನಂದಿಸಬೇಕಾದ ಪ್ರವಾಸಿಗರು ಬಂಡೀಪುರ ಅಭಯಾರಣ್ಯದಲ್ಲಿ (Tourists in BandipurTigerReserve) ಮಾಡಬಾರದ ಕೆಲಸ ಮಾಡಿದ್ದಾರೆ. ಚಲಿಸುವ ಕಾರಿನಿಂದ ಬಿಯರ್ ಕ್ಯಾನ್‌ಗಳು ಹಾಗೂ ಬಳಸಿದ ಟಿಶ್ಯೂ ಪೇಪರ್‌ಗಳನ್ನು ರಸ್ತೆಗೆ ಎಸೆದು ತಮ್ಮ ವಿಕೃತ ಬುದ್ಧಿ ಪ್ರದರ್ಶಿಸಿದ್ದು, ಈ ವಿಡಿಯೋ ಸೋಷಿಯಲ್​ ಮೀಡಿಯಾನಲ್ಲಿ ವೈರಲ್​ ಆಗಿದ್ದು, ನೆಟ್ಟಿಗರ ಕೋಪಕ್ಕೆ ಕಾರಣವಾಗಿದೆ.

ವರದಿಗಳ ಪ್ರಕಾರ, ಈ ಘಟನೆ ಬಂಡೀಪುರ ಹುಲಿ ಅಭಯಾರಣ್ಯದ ಮೂಲಕ ಹಾದುಹೋಗುವ ರಾಷ್ಟ್ರೀಯ ಹೆದ್ದಾರಿಯಲ್ಲಿ ನಡೆದಿದೆ. ಮಾರುತಿ ಸುಜುಕಿ ಬಲೆನೊ ಕಾರಿನಲ್ಲಿ ಬಂದ ಪ್ರವಾಸಿಗರ ಗುಂಪೊಂದು ಈ ಕೃತ್ಯ ಎಸಗಿದೆ.

ಕಾಡನ್ನು ಕಸದ ತೊಟ್ಟಿ ಮಾಡಿಕೊಂಡ ಈ ಪುಂಡರ ವರ್ತನೆಗೆ ಸೋಷಿಯಲ್ ಮೀಡಿಯಾದಲ್ಲಿ ಜನ ತರಾಟೆ ತೆಗೆದುಕೊಂಡಿದ್ದಾರೆ. ವೈರಲ್ ವಿಡಿಯೋಗೆ ಕಮೆಂಟ್ ಮಾಡಿರುವ ನೆಟ್ಟಿಗರೊಬ್ಬರು, ಇತ್ತೀಚಿನ ದಿನಗಳಲ್ಲಿ ಜನ ಪ್ರಕೃತಿಯನ್ನು ಪ್ರೀತಿಸಲು ಕಾಡಿಗೆ ಬರಲ್ಲ, ಬದಲಿಗೆ ಇನ್‌ಸ್ಟಾಗ್ರಾಮ್ ರೀಲ್ಸ್ ಹಾಗೂ ಶೋಕಿ ಮಾಡಲು ಬರುತ್ತಾರೆ. ಇಂತಹ ಪ್ರವಾಸಿಗರಿಂದಲೇ ಕಾಡು ಹಾಳಾಗುತ್ತಿದೆ ಎಂದು ಬೇಸರ ವ್ಯಕ್ತಪಡಿಸಿದ್ದಾರೆ.

ಇನ್ನೊಬ್ಬ ಬಳಕೆದಾರರು ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿ, ಇವರಿಗೆ ಕೇವಲ 500 ಅಥವಾ 1000 ದಂಡ ಹಾಕಿದರೆ ಸಾಲದು. ಕಾರು ಇಟ್ಟುಕೊಂಡು ಐಷಾರಾಮಿ ಜೀವನ ನಡೆಸುವ ಇವರಿಗೆ ಕನಿಷ್ಠ 10,000 ಆದರೂ ದಂಡ ವಿಧಿಸಬೇಕು. ಆಗಲೇ ಬುದ್ಧಿ ಬರುವುದು ಎಂದು ಅರಣ್ಯ ಇಲಾಖೆಯನ್ನು ಆಗ್ರಹಿಸಿದ್ದಾರೆ.

ಮತ್ತೊಬ್ಬರು ದೇಶದಲ್ಲಿ ಎಷ್ಟೇ ಡಿಗ್ರಿ ಓದಿದ್ರೂ ಜನರಿಗೆ ಸಾರ್ವಜನಿಕ ಸ್ಥಳಗಳಲ್ಲಿ ಹೇಗೆ ನಡೆದುಕೊಳ್ಳಬೇಕು ಅನ್ನೋ ಕನಿಷ್ಠ ಜ್ಞಾನ ಇಲ್ಲದಿರುವುದು ನಾಚಿಕೆಗೇಡು ಎಂದು ನಾಗರಿಕ ಪ್ರಜ್ಞೆಯನ್ನು ಪ್ರಶ್ನಿಸಿದ್ದಾರೆ.

ಬಂಡೀಪುರ ಅರಣ್ಯ ಪ್ರದೇಶವು ಭಾರತದ ಅತ್ಯಂತ ಪ್ರತಿಷ್ಠಿತ ಮತ್ತು ದುರ್ಬಲ ಪರಿಸರ ವ್ಯವಸ್ಥೆಯನ್ನು ಹೊಂದಿರುವ ಹುಲಿ ಸಂರಕ್ಷಿತ ಪ್ರದೇಶವಾಗಿದೆ. ಇಲ್ಲಿಗೆ ಪ್ರತಿದಿನ ಸಾವಿರಾರು ವನ್ಯಜೀವಿಗಳು ನೀರು, ಆಹಾರ ಹುಡುಕುತ್ತಾ ರಸ್ತೆ ದಾಟುತ್ತವೆ.

ಇಂತಹ ಜಾಗದಲ್ಲಿ ಪ್ಲಾಸ್ಟಿಕ್, ಟಿಶ್ಯೂ ಹಾಗೂ ಬಿಯರ್ ಕ್ಯಾನ್‌ಗಳನ್ನು ಎಸೆಯುವುದರಿಂದ ಜಿಂಕೆ, ಆನೆ ಅಥವಾ ಇತರ ಪ್ರಾಣಿಗಳು ಇವುಗಳನ್ನು ಆಹಾರವೆಂದು ತಪ್ಪಾಗಿ ಸೇವಿಸಿ ಪ್ರಾಣ ಕಳೆದುಕೊಳ್ಳುವ ಅಪಾಯವಿರುತ್ತದೆ. ಅಲ್ಲದೆ, ಗಾಜಿನ ಬಾಟಲಿಗಳು ಅಥವಾ ಟಿನ್ ಕ್ಯಾನ್‌ಗಳಿಂದ ವನ್ಯಜೀವಿಗಳ ಕಾಲಿಗೆ ಗಾಯಗಳಾಗುವ ಸಾಧ್ಯತೆಯೂ ಹೆಚ್ಚಿರುತ್ತದೆ.

ಪ್ರವಾಸಿಗರ ಇಂತಹ ಪುಂಡಾಟಿಕೆ ಬಂಡೀಪುರದಲ್ಲಿ ಇದೇ ಮೊದಲೇನಲ್ಲ. ವನ್ಯಜೀವಿ ವಲಯಗಳಲ್ಲಿ ಪದೇ ಪದೇ ನಿಯಮ ಉಲ್ಲಂಘನೆಯಾಗುತ್ತಿದ್ದರೂ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳುತ್ತಿಲ್ಲ ಎಂಬ ಆಪಾದನೆ ಕೇಳಿಬರುತ್ತಿದೆ. ಪರಿಸರವಾದಿಗಳು ಈಗ ಈ ಕಾರಿನ ನಂಬರ್ ಪ್ಲೇಟ್ ಆಧರಿಸಿ ಆರೋಪಿಗಳ ವಿರುದ್ಧ ತಕ್ಷಣವೇ ಎಫ್‌ಐಆರ್ ದಾಖಲಿಸಿ, ಕಠಿಣ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಒತ್ತಾಯಿಸುತ್ತಿದ್ದಾರೆ.

ಇನ್ಮುಂದೆಯಾದರೂ ರಾಷ್ಟ್ರೀಯ ಉದ್ಯಾನವನಗಳ ಚೆಕ್ ಪೋಸ್ಟ್‌ಗಳಲ್ಲಿ ಕಟ್ಟುನಿಟ್ಟಿನ ತಪಾಸಣೆ ನಡೆಸಿ, ಮದ್ಯದ ಬಾಟಲಿಗಳು ಹಾಗೂ ಪ್ಲಾಸ್ಟಿಕ್ ಕೊಂಡೊಯ್ಯುವುದನ್ನು ಸಂಪೂರ್ಣ ನಿಷೇಧಿಸಬೇಕಿದೆ ಎನ್ನುವುದು ಅವರ ವಾದವಾಗಿದೆ, (ಏಜನ್ಸೀಸ್​).