ಗಾನಕೋಗಿಲೆ ಎಸ್.ಜಾನಕಿಗೆ ಭಾರತ ರತ್ನ ಸಿಗಬೇಕಿತ್ತು: ‘ಶತಾವಧಾನಿ’ ಡಾ.ಆರ್.ಗಣೇಶ್ ಅಭಿಮತ-the legendary singer S. Janaki deserved the Bharat Ratna

ವಿಶ್ವ ಸಂವಾದ ಕೇಂದ್ರ ಕರ್ನಾಟಕ, ಬಸವನಗುಡಿಯ ಬಿಎಂಎಸ್ ಇಂಜಿನಿಯರಿಂಗ್ ಕಾಲೇಜಿನಲ್ಲಿ ಭಾನುವಾರ ಆಯೋಜಿಸಿದ್ದ‘ ವಿಎಸ್‌ಕೆ ಮೀಡಿಯಾ ಅವಾರ್ಡ್ಸ್’ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಮಾತನಾಡಿದರು.

ಲತಾ ಮಂಗೇಶ್ಕರ್ ಸಹ ಭಾರತೀಯ ಚಿತ್ರರಂಗಕ್ಕೆ ಅಮೋಘ ಕೊಡುಗೆ ಕೊಟ್ಟಿದ್ದಾರೆ. ಆದರೆ, ಹಾಡಿನ ವೈವಿಧ್ಯತೆಯಲ್ಲಿ ಲತಾ ಮಂಗೇಶ್ಕರ್ ಅವರ ಸಾಧನೆಗಿಂತ ಎಸ್. ಜಾನಕಿಯವರ ಸಾಧನೆ ಭಿನ್ನವಾಗಿದೆ. ಆದ್ದರಿಂದ, ‘ಭಾರತ ರತ್ನ’ ಪಡೆಯಲು ಎಸ್. ಜಾನಕಿ ಅರ್ಹತೆ ಇತ್ತು. ಇದನ್ನು ಸಮಾಜ ಗುರುತಿಸಬೇಕಿತ್ತು. ತನ್ನಗಿಂತ ಕಡಿಮೆ ವಯಸ್ಸಿನವರಿಗೆ ಪುರಸ್ಕಾರಕ್ಕೆ ಕೊಟ್ಟಿರುವುದಕ್ಕೆ ಅವರಿಗೆ ಬೇಸರ ಇತ್ತು.ಅದಕ್ಕಾಗಿ ಹಲವು ಪ್ರಶಸ್ತಿಗಳನ್ನು ತಿರಸ್ಕರಿಸಿದ್ದರು. ಗೌರವಕ್ಕೆ ಮೀಸಲಾತಿ ಇರಬಾರದು.ಜತೆಗೆ, ಯಾವುದೇ ಕಾರಣಕ್ಕೂ ಗೌರವ ಮಲಿನವಾಗಬಾರದು ಎಂದರು.

ವಿಶ್ವ ಸಂವಾದ ಕೇಂದ್ರವು ಮಾಧ್ಯಮ ಕ್ಷೇತ್ರದಲ್ಲಿ ದುಡಿಯುತ್ತಿರುವ ಸಾಧಕರನ್ನು ಗುರುತಿಸಿ ಪ್ರಶಸ್ತಿ ನೀಡುತ್ತಿರುವುದು ಶ್ಲಾಘನೀಯ. ಜನಮಾನಸದಲ್ಲಿ ನೆಲೆ ನಿಂತಿರುವ ಮಾಧ್ಯಮದವರಿಗೆ ಪುರಸ್ಕಾರ ಅಗತ್ಯವಿಲ್ಲ. ಆದರೆ, ಸಮಾಜದಲ್ಲಿ ಇದು ಬೇಕಿದೆ. ವರ್ತಮಾನ ಮೀರಿ ನಿಂತಿರುವ ಮಾಧ್ಯಮಗಳು ಜನರಿಗೆ ಬೇಕಿರುವ ವಿಚಾರ ಹೇಳುವುದು ಒಳ್ಳೆಯದು. ಜಗತ್ತಿನಲ್ಲಿ ಆಸ್ತಿಕರಗಿಂತ ನಾಸ್ತಿಕರು ಹೆಚ್ಚಾಗಿದ್ದಾರೆ. ಕ್ಷಣ ಕ್ಷಣವೂ ಮಾರ್ಪಾಡುತ್ತಿರುವ ಜಗತ್ತಿನಲ್ಲಿ ನಾವೆಲ್ಲರೂ ನಮ್ಮತನವನ್ನೇ ಮರೆತು ಹೋಗುತ್ತಿದ್ದೇವೆ ಎಂದು ಡಾ.ಆರ್.ಗಣೇಶ್ ಕಳವಳ ವ್ಯಕ್ತಪಡಿಸಿದರು.

ಪತ್ರಿಕೋದ್ಯಮ ಕವಲುದಾರಿಯಲ್ಲಿದೆ. ಕೃತಕ ಬುದ್ಧಿಮತ್ತೆ ( ಎಐ) ಬಂದ ಬಳಿಕ ಸಿಬ್ಬಂದಿ ತೆಗೆದು ಹಾಕುವುದು ಮಾಧ್ಯಮ ರಂಗಕ್ಕೂ ಬಂದಿದೆ. ದೊಡ್ಡ ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳು ಪತ್ರಿಕೋದ್ಯಮ ಕ್ಷೇತ್ರಕ್ಕೆ ಬರುತ್ತಿದ್ದಾರೆ. ಮುದ್ರಣ, ದೃಶ್ಯ ಮಾಧ್ಯಮಕ್ಕೆ ತನ್ನದೆಯಾದ ಸವಾಲುಗಳಿವೆ. ಈಗಿನ ಹೊಸಬರು ಆರಂಭದಲ್ಲೇ ದೊಡ್ಡ ಹುದ್ದೆ, ಹೆಸರು, ಜನಪ್ರಿಯತೆ ಮತ್ತು ವೇತನ ಸಿಗಬೇಕೆಂದು ಆಸೆ ಇಟ್ಟುಕೊಂಡು ಬರುತ್ತಿದ್ದಾರೆ.ಆದರೆ,ಪತ್ರಿಕೋದ್ಯಮದ ಸವಾಲುಗಳನ್ನು ಹೊಸಬರು ಸ್ವೀಕರಿಸಬೇಕು. ಬೇರೆ ಬೇರೆ ಕ್ಷೇತ್ರಗಳಲ್ಲಿರುವ ಅವಕಾಶವನ್ನು ಅವರು ಬಳಸಿಕೊಳ್ಳಬೇಕೆಂದು ಹಿರಿಯ ಪತ್ರಕರ್ತ ರಂಗನಾಥ ಭಾರದ್ವಾಜ್ ಸಲಹೆ ನೀಡಿದರು.

ವಿಜಯವಾಣಿ ‘ಸಂಪಾದಕ’ ಕೆ.ಎನ್.ಚನ್ನೇಗೌಡಗೆ ‘ತಿ.ತಾ.ಶರ್ಮಾ, ಹಿರಿಯ ಪತ್ರಕರ್ತರಾದ ನಾ. ಕಾರಂತ ಪೆರಾಜೆಗೆ ‘ಬೆ.ಸು.ನಾ.ಮಲ್ಯ’, ನಾಗಾರ್ಜನ್ ದ್ವಾರಕನಾಥ್‌ಗೆ ‘ಎಂ.ವಿ.ಕಾಮತ್, ರಂಗನಾಥ್ ಭಾರದ್ವಾಜ್‌ಗೆ ‘ಚಂದ್ರಶೇಖರ ಭಂಡಾರಿ’ ಪತ್ರಿಕೋದ್ಯಮ ಪ್ರಶಸ್ತಿ, ಡಾ.ಅರಕಲಗೂಡು ಸೂರ್ಯಪ್ರಕಾಶ್‌ಗೆ ‘ಹೂ.ವೆ.ಶೇಷಾದ್ರಿ ಅಂಕರಣಕಾರ ಪ್ರಶಸ್ತಿ ಹಾಗೂ ಆರ್‌ಜೆ ರಶ್ಮಿಗೆ ‘ವಿಎಸ್‌ಕೆ ಡಿಜಿಟಲ್’ ಮಾಧ್ಯಮ ಪ್ರಶಸ್ತಿ ನೀಡಿ ಸನ್ಮಾನಿಸಲಾಯಿತು. ವಿಶ್ವ ಸಂವಾದ ಕೇಂದ್ರ ಕರ್ನಾಟಕದ ನಿರ್ವಾಹಕ ವಿಶ್ವಸ್ಥ ಡಾ.ಎಂ.ಕೆ.ಶ್ರೀಧರನ್ ಸೇರಿ ನೂರಾರು ಮಂದಿ ಉಪಸ್ಥಿತರಿದ್ದರು.

ಒಬ್ಬ ವ್ಯಕ್ತಿ ತನ್ನ ಜನಪ್ರಿಯತೆಯನ್ನು ಕಾಪಾಡಿಕೊಳ್ಳುವುದು ಕಷ್ಟ. ಜನಪ್ರಿಯತೆ ಉಳಿಸಿಕೊಳ್ಳುವುದು ಆ ವ್ಯಕ್ತಿಯ ಯೋಗ್ಯತೆ ಮತ್ತು ನಡತೆ ಮೇಲೆ ನಿಂತಿರುತ್ತದೆ. ಮಾಧ್ಯಮಕ್ಕೆ ಕೃತಕ ಬುದ್ಧಿಮತ್ತೆ ಎಷ್ಟು ಉಪಯೋಗವಾಗಿರುವುದೋ ಅಷ್ಟೇ ಅನನುಕೂಲಕರವಾಗಿದೆ. ಈಗಿನ ಕಾಲಘಟ್ಟದಲ್ಲಿ ರಾಷ್ಟ್ರ ಜಾಗೃತಿ ಮೂಡಿಸುವುದು ಅನಿವಾರ್ಯವಾಗಿದೆ. ಭಾರತೀಯ ಸಂಸ್ಕೃತಿಯನ್ನು ಮುಂದಿನ ಪೀಳಿಗೆಗೆ ತಲುಪಿಸುವ ಕೆಲಸವನ್ನು ವಿಶ್ವ ಸಂವಾದ ಕೇಂದ್ರ ಮಾಡುತ್ತಿರುವುದೂ ಶ್ಲಾಘನೀಯ. ಆ ಸಂಸ್ಥೆಯು ಕೊಟ್ಟಿರುವ ಪ್ರಶಸ್ತಿಯಿಂದ ನನಗೆ ಇನ್ನಷ್ಟು ಜವಾಬ್ದಾರಿ ಹೆಚ್ಚಿದೆ.

ಒಂದು ಮೈಕ್ ನನ್ನ ಜೀವನವನ್ನೇ ಬದಲಾಯಿಸಿತು. ರೇಡಿಯೋ ನನಗೆ ಹಾಸ್ಯ ಪ್ರಜ್ಞೆ ಕಲಿಸಿದೆ. ಒಂದೊಂದು ಉಳಿ ಪೆಟ್ಟು ಒಂದೊಂದು ಪಾಠ ಕಲಿಸಿದೆ. ಪಾಡ್‌ಕಾಸ್ಟ್ ಎಂಬುದು ಮನರಂಜನೆಯಲ್ಲ. ಇದು ಹೆಚ್ಚು ಮಾಹಿತಿ ನೀಡುವ ಸಾಧನವಾಗಿದೆ.