ಮಹಿಳೆಯಷ್ಟೇ ಅಲ್ಲ ಮಗುವಿನ ಧ್ವನಿಯಲ್ಲೂ ಮಂತ್ರಮುಗ್ಧಗೊಳಿಸಿದ ಗಾನಕೋಗಿಲೆ: ಜಾನಕಮ್ಮನ ಕಂಠಸಿರಿಗೆ ಮಾರುಹೋಗದವರೇ ಇಲ್ಲ!

S Janaki: 'ಸ್ವರ ಸರಸ್ವತಿ', ಭಾರತೀಯ ಸಂಗೀತ ಲೋಕದ 'ಗಾನ ಕೋಗಿಲೆ', ಎಲ್ಲ ವಯಸ್ಸಿನ ಧ್ವನಿಗಳಲ್ಲಿಯೂ ಹಾಡಿದ ದಿಗ್ಗಜ ಗಾಯಕಿ ಎಸ್. ಜಾನಕಿ ಅಮ್ಮನವರ ಇನ್ನಿಲ್ಲ ಎಂಬ ಸುದ್ದಿಯಿಂದ ಇಡೀ ದೇಶದ ಸಂಗೀತ ಸಾಮ್ರಾಜ್ಯದ ಸುವರ್ಣ ಅಧ್ಯಾಯವೊಂದು ಕೊನೆಗೊಂಡಂತಾಗಿದೆ. ದಶಕಗಳ ಕಾಲ ತಮ್ಮ ಕಂಚಿನ ಕಂಠದಿಂದ ಕೋಟ್ಯಂತರ ಹೃದಯಗಳನ್ನು ತಣಿಸಿ, ತಮ್ಮ ಹೆಬ್ಬಯಕೆಯಂತೆ ಕೊನೆಯ ಕ್ಷಣಗಳಲ್ಲಿ ಮೈಸೂರಿನಲ್ಲಿ ಕೊನೆಯುಸಿರೆಳೆದ ಮಹಾನ್ ಗಾಯಕಿಯ ಅಗಲಿಕೆಗೆ ಭಾರತೀಯ ಚಿತ್ರರಂಗ, ಸ್ವರ ಲೋಕ, ಹಲವು ಕ್ಷೇತ್ರಗಳ ಗಣ್ಯರು ಮತ್ತು ಅಭಿಮಾನಿಗಳು ಕಣ್ಣೀರಿಟ್ಟಿದ್ದಾರೆ.  

ಜಾನಕಮ್ಮನವರು ಹಾಡಿದ ಪ್ರತಿಯೊಂದು ಹಾಡೂ ನಮ್ಮ ಸುಖ-ದುಃಖಗಳಲ್ಲಿ ಭಾಗಿಯಾಗಿವೆ. ವರನಟ ಡಾ. ರಾಜ್​ಕುಮಾರ್​ ಅವರೊಂದಿಗೆ 50ಕ್ಕೂ ಹೆಚ್ಚು ಹಾಡುಗಳನ್ನು ಹಾಡಿರುವ ಅವರು, ತಮ್ಮ ದಿವ್ಯ ಕಂಠದಲ್ಲಿ ಪುಟ್ಟ ಮಗುವಿನಂತೆ ಹಾಡಿ ಅಂದಿನ ಕಾಲಘಟ್ಟದಲ್ಲೇ ತಮ್ಮ ಹೆಸರನ್ನು ಇತಿಹಾಸದ ಪುಟಕ್ಕೆ ಸೇರಿಸಿದ ಅದ್ಭುತ ಕಲಾವಿದೆ. ಬಾಲಕ, ಬಾಲಕಿ, ಪುರುಷ ಮತ್ತು ವಯಸ್ಸಾದ ಮಹಿಳೆಯ ಧ್ವನಿಯಲ್ಲಿ ಜಾನಕಿಯಮ್ಮ ಹಾಡಿದ ಹಲವಾರು ಹಾಡುಗಳು ಬಹುತೇಕರಿಗೆ ಇಂದಿಗೂ ಗೊತ್ತಿಲ್ಲ. ಪ್ರಾಯಶಃ ಕೇಳಿರಬಹುದು. ಆದ್ರೆ, ಇದೇ ಅವರಾಡಿದ ಸಾಂಗ್​ ಎಂಬುದು ತಕ್ಷಣಕ್ಕೆ ನೆನಪಿಗೆ ಬರುವುದು ಕೊಂಚ ಕಷ್ಟಸಾಧ್ಯ. 

ಯಾವುದೇ ವಯಸ್ಸಿನ ಪಾತ್ರಕ್ಕಾದರೂ ಕರಾರುವಕ್ಕಾಗಿ ಹೊಂದುವಂತೆ ತಮ್ಮ ಧ್ವನಿಯನ್ನು ಬದಲಾಯಿಸಿಕೊಳ್ಳುವ ಅಪರೂಪದ ಕಲೆ, ಸಾಮರ್ಥ್ಯ ಎಸ್. ಜಾನಕಿ ಅವರದ್ದಾಗಿತ್ತು. ಒಂದು ಹಾಡಿನಲ್ಲಿ ಪುಟ್ಟ ಮಗುವಿನ ನಿಷ್ಕಲ್ಮಶ ಮುಗ್ಧತೆಯಿಂದ ಹಾಡಬಲ್ಲ ಅವರು, ತಕ್ಷಣವೇ ಮತ್ತೊಂದು ಹಾಡಿನಲ್ಲಿ ವೃದ್ಧೆಯಾಗಿ ಅಥವಾ ಪ್ರೇಮಪಾಶದಲ್ಲಿ ಬಿದ್ದ ಯುವತಿಯಾಗಿ ಸಂಪೂರ್ಣವಾಗಿ ರೂಪಾಂತರಗೊಳ್ಳುತ್ತಿದ್ದರು. ತಮ್ಮ ಸುದೀರ್ಘ ಹಾಗೂ ಅದ್ಭುತ ಸಂಗೀತ ಪಯಣದಲ್ಲಿ ಅವರು ಭಾರತದ ಹದಿನೇಳು ವಿವಿಧ ಭಾಷೆಗಳಲ್ಲಿ ಬರೋಬ್ಬರಿ 48000ಕ್ಕೂ ಹೆಚ್ಚು ಹಾಡುಗಳನ್ನು ರೆಕಾರ್ಡ್ ಮಾಡುವ ಮೂಲಕ ಸಂಗೀತ ಲೋಕದ ಅಪ್ರತಿಮ ದಂತಕಥೆಯಾಗಿ ಜನರ ಮಾನಸದಲ್ಲಿ ಎಂದೆಂದಿಗೂ ಜೀವಂತ. 

1. ಎಲ್ಲು ಹೋಗಲ್ಲ ಮಾಮಾ: ಗಂಧದ ಗುಡಿ (ಚಿತ್ರ)

2. ಭೂಮಿಗೆ ಬಂದ.. : ಭೂಮಿಗೆ ಬಂದ ಭಗವಂತ 

3. ನಿಜ ಹೇಳುವೇನು ಅಮ್ಮ ನಿನ್ನ ಕಂಡರೆ... : ಚಕ್ರವ್ಯೂಹ

4. ಸಿಹಿಮುತ್ತು, ಸಿಹಿಮುತ್ತು ಇನ್ನೊಂದು... : ನಾ ನಿನ್ನ ಮರೆಯಲಾರೆ

5. ಏಕೋ ಈ ಕೋಪ... : ಭಕ್ತ ಸಿರಿಯಾಳ 

6. ಕೇಳಿದ್ದು ಸುಳ್ಳಾಗಬಹುದು... : ರಾಮ ಲಕ್ಷಣ

7. ತಾಯಿಯ ತಂದೆಯ... ಕನ್ನಡ (ಸೋಲೋ)

8. ನೀ ಮೀಟಿದಾ.. : ನೀ ಬರೆದ ಕಾದಂಬರಿ

ಇವು ಕನ್ನಡದಲ್ಲಿ ಹಾಡಿರುವುದಾದರೆ, ತಮಿಳು, ತೆಲುಗು ಮತ್ತು ಮಲಯಾಳಂ ಭಾಷೆಗಳಲ್ಲಿ ಇನ್ನೂ ಹೆಚ್ಚು ಗಾಯನಗಳನ್ನು ಮಗುವಿನ ಧ್ವನಿಯಲ್ಲೇ ಹಾಡಿದ್ದಾರೆ.  ವಿಶೇಷ ಎಂದರೆ, 1970ರಲ್ಲಿ ತೆರೆಕಂಡ ತೆಲುಗಿನ CID ರಾಜು ಚಿತ್ರದಲ್ಲಿ "ನನ್ನನ್ನು ಚುಸಿ ಅಂತಗಾ" ಹಾಡು ಅವರ ಏಕವ್ಯಕ್ತಿ ಪುರುಷ ಧ್ವನಿಯ ಹಾಡುಗಳಲ್ಲಿ ಒಂದು. 

ಎಸ್.​ ಜಾನಕಿ ಅವರು ದೈತ್ಯ ಪ್ರತಿಭೆಯ ಅನ್ನೋದಕ್ಕಿಂತ ಅವರೊಬ್ಬರು ಅಸಾಧಾರಣ ಪ್ರತಿಭೆ ಎಂಬುದಕ್ಕೆ ಅತ್ಯುತ್ತಮ ಉದಾಹರಣೆಯೇ 1994ರ ತಮಿಳು ಚಲನಚಿತ್ರ 'ಮಗಳಿರ್ ಮಟ್ಟುಮ್'.  ಈ ಚಿತ್ರದಲ್ಲಿ ಪ್ರಪ್ರಥಮ ಬಾರಿಗೆ ಮೂರು ಪ್ರಮುಖ ನಟಿಯರಾದ ರೇವತಿ, ಊರ್ವಶಿ ಮತ್ತು ರೋಹಿಣಿಗೆ ಮೂರು ವಿಭಿನ್ನ ಶೈಲಿಯಲ್ಲಿ ಒಂದೇ ಹಾಡಿಗೆ ದನಿ ನೀಡಿದ್ದಾರೆ. 

ತಮ್ಮ ಸಹಜ ಧ್ವನಿಯಲ್ಲಿ ಹಾಡಲಿಲ್ಲ. ಬದಲಿಗೆ ಪ್ರತಿ ಪಾತ್ರದ ವ್ಯಕ್ತಿತ್ವಕ್ಕೆ ತಕ್ಕಂತೆ ದನಿಗೂಡಿಸುತ್ತಿದ್ದರು ಮತ್ತು ಉಚ್ಚಾರಣೆಯನ್ನು ಥಟ್​ ಎಂದು ಬದಲಿಸುತ್ತಿದ್ದರು. ಈ ತಮಿಳು ಹಾಡಿನ ಸಾಹಿತ್ಯವನ್ನು ವಾಲಿ ಬರೆದಿದ್ದು, ಇಳಯರಾಜ ಸಂಯೋಜನೆ ಮಾಡಿದ್ದಾರೆ. ಯಾವುದೇ ಹಾಡು ಕೊಟ್ಟರೂ ಅದಕ್ಕೆ ತಮ್ಮ ಸ್ವರಗಳಿಂದಲೇ ಜೀವ ತುಂಬುತ್ತಿದ್ದ ಜೀವ ಜಾನಕಿ ಅಮ್ಮನದ್ದು. ಹೀಗಿರುವಾಗ, ಅವರ ಅಗಲಿಕೆ ನಿಜಕ್ಕೂ ಸಂಗೀತ ಪ್ರೇಮಿಗಳಿಗೆ ಮತ್ತು ಸಂಗೀತ ಲೋಕಕ್ಕೆ ತುಂಬಲಾರದ ನಷ್ಟವಾಗಿದೆ ಎಂದೇ ಹೇಳಬಹುದು.