’ಸಿಹಿನೀರಿನ ಬಾವಿ’ ಬೇಕಿದೆ ಕಾಯಕಲ್ಪ!

ಹೌದು.. ತಾಲೂಕಿನ ಐತಿಹಾಸಿಕ ಸಾವನದುರ್ಗದ ತಪ್ಪಲಿನಲ್ಲಿರುವ ಕಲ್ಯಾಣ ಒಡೆಯರ ಮಠ (ಕೆ.ವಿ.ಮಠ) ಗ್ರಾಮದಲ್ಲಿರುವ ‘ಸಿಹಿನೀರಿನ ಬಾವಿ’ ನೂರಾರು ವರ್ಷಗಳ ಇತಿಹಾಸವನ್ನು ಹೊಂದಿದೆ. ತಲೆ ತಲಾಂತರಗಳಿಂದ ಗ್ರಾಮಸ್ಥರ ಕುಡಿಯುವ ನೀರಿನ ಅಭಾವವನ್ನು ನೀಗಿಸುತ್ತಾ ಬಂದಿರುವ ಈ ಬಾವಿ ಎಂತಹ ಭೀಕರ ಬರಗಾಲ ಎದುರಾದರೂ ಬತ್ತದಿರುವುದು ಹೆಗ್ಗಳಿಕೆ.

ನಾಡಪ್ರಭು ಕೆಂಪೇಗೌಡರ ಆಳ್ವಿಕೆಯ ಅವಧಿಯಲ್ಲಿ ನಿರ್ಮಾಣಗೊಂಡಿದೆ ಎನ್ನಲಾದ ಈ ಬಾವಿಯು, ಇಂದಿಗೂ ತನ್ನ ಮೂಲ ಸ್ವರೂಪವನ್ನು ಕಾಯ್ದುಕೊಂಡಿದೆ. ಬಾವಿಯ ನಿರ್ಮಾಣ ಸುಸಜ್ಜಿತವಾಗಿದ್ದರೂ, ಸೂಕ್ತ ರಕ್ಷಣೆ ಹಾಗೂ ನಿರ್ವಹಣೆಯಿಲ್ಲದೆ ಈಗ ಬಾವಿಯ ಸುತ್ತಲೂ ಎತ್ತರವಾದ ಗಿಡಗಂಟಿ, ಪೊದೆಗಳು ಬೆಳೆದುಕೊಂಡಿವೆ.

ಸರಿಯಾದ ರಕ್ಷಣಾ ಬೇಲಿ ಇಲ್ಲದಿರುವುದರಿಂದ ಐತಿಹಾಸಿಕ ಬಾವಿಯ ನೀರು ಕಲುಷಿತಗೊಳ್ಳುವ ಆತಂಕ ಎದುರಾಗಿದೆ. ಆದರೂ ಸ್ಥಳೀಯ ಹಂಚಿಕುಪ್ಪೆ ಗ್ರಾಮಪಂಚಾಯಿತಿ ಅಧಿಕಾರಿಗಳು ಕಣ್ಣೆತ್ತಿಯೂ ನೋಡದಿರುವುದು ನಾಗರಿಕರ ಆಕ್ರೋಶಕ್ಕೆ ಕಾರಣವಾಗಿದೆ.

ಸ್ಥಳೀಯರ ಆಗ್ರಹ