ಹಂಪಿ ಉತ್ಸವ; ಅಬ್ಬಬ್ಬಾ.. ಇದು ಎತ್ತುಗಳ ಗತ್ತು !

ವಿಶ್ವವಿಖ್ಯಾತ ಹಂಪಿ ಉತ್ಸವದ ಹಿನ್ನೆಲೆಯಲ್ಲಿ ಈ ಬಾರಿ ವಿಜಯನಗರದ ಜನತೆಗೆ ಹೊಸ ಮಾದರಿಯ ರಸದೌತಣ ಸಿಕ್ಕಿದೆ. ಪ್ರತಿ ವರ್ಷ ನಡೆಯುತ್ತಿದ್ದ ಟಗರು ಮತ್ತು ಶ್ವಾನ ಪ್ರದರ್ಶನಕ್ಕೆ ಈ ಬಾರಿ ವಿರಾಮ ನೀಡಿ, ಹಂಪಿ ಉತ್ಸವದ ಇತಿಹಾಸದಲ್ಲೇ ಮೊದಲ ಬಾರಿಗೆ ಎತ್ತುಗಳ ಪ್ರದರ್ಶನ ಆಯೋಜಿಸುವ ಮೂಲಕ ಗ್ರಾಮೀಣ ಸೊಗಡಿಗೆ ಮರುಜೀವ ನೀಡಲಾಗಿದೆ.

ಕಮಲಾಪುರ ಹವಾಮ ಕಚೇರಿಯ ಹಿಂಭಾಗದ ಮೈದಾನದಲ್ಲಿ ಜಿಲ್ಲಾಡಳಿತದ ವಿಶೇಷ ಸಿದ್ಧತೆಯೊಂದಿಗೆ ಈ ಪ್ರದರ್ಶನ ಏರ್ಪಡಿಸಲಾಗಿತ್ತು. ಪ್ರವಾಸೋದ್ಯಮ, ಕನ್ನಡ-ಸಂಸ್ಕೃತಿ ಇಲಾಖೆ ಹಾಗೂ ಪಶುಪಾಲನಾ ಮತ್ತು ಪಶು ವೈದ್ಯಕೀಯ ಸೇವಾ ಇಲಾಖೆಯ ಸಹಯೋಗದೊಂದಿಗೆ ಈ ಬೃಹತ್ ಕಾರ್ಯಕ್ರಮ ನಡೆಯಿತು. ರೈತರು ಮತ್ತು ಜಾನುವಾರು ಪ್ರೇಮಿಗಳನ್ನು ಉತ್ತೇಜಿಸಲು ಈ ವಿಶೇಷ ವೇದಿಕೆ ಸಿದ್ಧಪಡಿಸಲಾಗಿತ್ತು.

ಇದು ಕೇವಲ ಪ್ರದರ್ಶನಕ್ಕೆ ಸೀಮಿತವಾಗದೆ, ತಳಿಗಳ ಸಂರಕ್ಷಣೆಯ ಬಗ್ಗೆ ಮಾಹಿತಿ ನೀಡುವ ವೇದಿಕೆಯೂ ಆಗಿ ಮಾರ್ಪಟ್ಟಿತ್ತು. ಪಶುಪಾಲನಾ ಇಲಾಖೆಯ ಅಧಿಕಾರಿಗಳು ಪ್ರತಿ ಜೋಡಿ ಎತ್ತುಗಳನ್ನು ವೇದಿಕೆಯ ಮೇಲೆ ಕರೆತಂದು ಅವುಗಳ ದೈಹಿಕ ಲಕ್ಷಣ, ತಳಿಯ ವಿಶೇಷತೆ ಹಾಗೂ ಅವುಗಳ ಪೋಷಣೆಯ ವಿಧಾನದ ಬಗ್ಗೆ ನೆರೆದಿದ್ದ ಸಾರ್ವಜನಿಕರಿಗೆ ವಿವರವಾಗಿ ಮನವರಿಕೆ ಮಾಡಿಕೊಟ್ಟರು. ಹಂಪಿ ಉತ್ಸವಕ್ಕೆ ಆಗಮಿಸಿದ ಪ್ರವಾಸಿಗರು ಮತ್ತು ಸ್ಥಳೀಯ ರೈತರು ಈ ಅಪರೂಪದ ಬಸವಣ್ಣಗಳ ಪ್ರದರ್ಶನ ಕಂಡು ಮೈಮರೆತರು.

ಕಳೆದ ಬಾರಿಗಿಂತ ಈ ಬಾರಿ ನಿರೀಕ್ಷೆಗೂ ಮೀರಿ ಎತ್ತುಗಳು ಪ್ರದರ್ಶನಕ್ಕೆ ಆಗಮಿಸಿದ್ದವು. ಸ್ಪರ್ಧೆಯಲ್ಲಿ ಹೊಸಪೇಟೆ ಮಂಜುನಾಥ ಪ್ರಥಮ, ಗಾದಿಗನೂರಿನ ಬಿ.ಬಸವ ದ್ವಿತೀಯ, ಹಳೇ ಮಲಪನಗುಡಿಯ ಬಾಣಾಪುರದ ಶಂಕರಪ್ಪ ಅವರ ಜೋಡಿ ತೃತೀಯ ಹಾಗೂ ಹೊಸಪೇಟೆಯ ಕೆ.ಮಹಮ್ಮದ್ ಅವರ ಹಳ್ಳಿಕಾರ್ ತಳಿಯ ಜೋಡಿ ಎತ್ತುಗಳು ನಾಲ್ಕನೇ ಸ್ಥಾನ ಪಡೆದವು. ದೇಶಿ ತಳಿ ಸಂರಕ್ಷಣೆಯ ವಿಶೇಷವಾಗಿ ಮಲೆನಾಡ ಗಿಡ್ಡ ತಳಿಯ ಜೋಡಿ ಎತ್ತುಗಳು ವಿಶೇಷ ಬಹುಮಾನ ಪಡೆದವು. ಸಚಿವ ಜಮೀರ್ ಅಹ್ಮದ್ ಅವರು ನಾಲ್ಕು ಸ್ಥಾನ ಗಳಿಸಿದ ಜೋಡಿ ಎತ್ತುಗಳಿಗೆ ತಲಾ 50 ಸಾವಿರ ರೂ. ನಗದು ವಿತರಿಸಿದರು.

ಇದೇ ವೇಳೆ ಸಮಾಧಾನಕರ ಬಹುಮಾನ ನೀಡಿಲ್ಲವೆಂದು ಉಳಿದ ಜೋಡಿ ಎತ್ತುಗಳ ಮಾಲೀಕರು ಆಯೋಜಕರ ಬಳಿ ವಾಗ್ವಾದಕ್ಕೆ ಇಳಿದರು. ಕೆಲ ಕಾಲ ಅಧಿಕಾರಿಗಳು ಹಾಗೂ ಎತ್ತುಗಳ ಮಾಲೀಕರ ನಡುವೆ ಚಕಮಕಿ ನಡೆಯಿತು. ಬಳಿಕ ಪೊಲೀಸರು ಮಧ್ಯೆ ಪ್ರವೇಶಿಸಿ ಗಲಾಟೆ ತಿಳಿಪಡಿಸಿದರು.

"