ಬೆಳಕು ನೀಡದ ಬೀದಿ ದೀಪಗಳು

ವಡಗಾಂವ: (ದೇ) ಗ್ರಾಮದ ಪ್ರಮುಖ ರಸ್ತೆಯಲ್ಲಿ ಅಳವಡಿಸಿರುವ ದೀಪಗಳು ಹಲವಾರು ದಿನಗಳಿಂದ ಕೆಟ್ಟು ಹೋಗಿದ್ದು, ರಾತ್ರಿ ಕತ್ತಲಲ್ಲಿ ತಿರುಗಾಡುವಂತಾಗಿದೆ. ಸಂಬಂಧಿಸಿದ ಅಧಿಕಾರಿಗಳ ಗಮನಕ್ಕಿದ್ದರೂ ಮೌನಕ್ಕೆ ಶರಣಾಗಿರುವುದು ಸಾರ್ವಜನಿಕರನ್ನು ಸಿಡಿದೇಳುವಂತೆ ಮಾಡಿದೆ.

ತಾಲೂಕಿನ ದೊಡ್ಡದಾದ ಹೋಬಳಿಗಳಲ್ಲಿ ವಡಗಾಂವ ಒಂದಾಗಿದ್ದು, ಗ್ರಾಮ ಪಂಚಾಯಿತಿ ಕೇಂದ್ರ ಸ್ಥಾನವಾಗಿದೆ. ಗ್ರಾಮದ ಹೃದಯ ಭಾಗದ ಡಾ.ಅಂಬೇಡ್ಕರ್​ ವೃತ್ತದಿಂದ ಜಂಬಗಿ ಮತ್ತು ಸಂತಪುರಕ್ಕೆ ಸಂಪರ್ಕ ಕಲ್ಪಿಸುವ ಮಾರ್ಗದಲ್ಲಿ ಹೈಮಾಸ್ಟ್​ ದೀಪಗಳನ್ನು ಅಳವಡಿಸಲಾಗಿದೆ. ಆದರೆ ಈ ದೀಪಗಳು ಬೆಳಗದ ಕಾರಣ ಸಾರ್ವಜನಿಕರು ಕತ್ತಲಲ್ಲೇ ಅಲೆದಾಡುವಂತಾಗಿದೆ. ಇತ್ತೀಚಿನ ದಿನಗಳಲ್ಲಿ ಹೆಚ್ಚುತ್ತಿರುವ ಕಳವು ಪ್ರಕರಣಗಳು ಸ್ಥಳಿಯರಲ್ಲಿ ಆತಂಕ ಮೂಡಿಸಿದೆ.

2022ರ ಮೇ 27ರಂದು ಅಂದಿನ ಕಂದಾಯ ಸಚಿವ ಆರ್​. ಅಶೋಕ್​ ಅವರು ವಡಗಾಂವ(ದೇ)ದಲ್ಲಿ ವಾಸ್ತವ್ಯ ಮಾಡಿ ಗ್ರಾಮದ ಅಭಿವೃದ್ಧಿಗಾಗಿ ನೀಡಿದ್ದ ಒಂದು ಕೋಟಿ ಅನುದಾನದಲ್ಲಿ ರಸ್ತೆ ಸುಧಾರಣೆ ಜತೆ ದೀಪಗಳನ್ನು ಅಳವಡಿಸಲಾಗಿತ್ತು. ಇದೀಗ ಗ್ರಾಪಂ ಅಧಿಕಾರಿಗಳ ನಿಷ್ಕಾಳಜಿಯಿಂದ ಇಡೀ ಗ್ರಾಮದಲ್ಲಿ ಕತ್ತಲೆ ಆವರಿಸಿದೆ.

ಮೂಲಸೌಕರ್ಯ ಒದಗಿಸುವುದು ಗ್ರಾಪಂನ ಪ್ರಮುಖ ಜವಾಬ್ದಾರಿ. ಸಾರ್ವಜನಿಕರ ಸುಗಮ ಸಂಚಾರಕ್ಕೆ ಬೀದಿದೀಪಗಳ ಅಗತ್ಯ ಬಹಳಷ್ಟಿದೆ. ಆದರೆ ಹೈಮಾಸ್ಟ್​ ದೀಪಗಳ ರಿಪೇರಿಗೆ ಮುಂದಾಗದಿರುವುದು ಜಿಡ್ಡುಗಟ್ಟಿದ ಆಡಳಿತಕ್ಕೆ ಸಾಯಾಗಿದೆ.

ಊರಲ್ಲಿ ಪ್ರತಿ ಬುಧವಾರ ವಾರದ ಸಂತೆ ನಡೆಯುತ್ತದೆ. ಪ್ರಮುಖ ವ್ಯಾಪಾರ ಮಳಿಗೆಗಳಲ್ಲಿ ಸಂಜೆಯಿಂದ ರಾತ್ರಿ 10ರವರೆಗೆ ವ್ಯಾಪಾರ ವಹಿವಾಟು ಜರುಗುತ್ತದೆ. ಸಂತೆಯಲ್ಲಿ ಸಾರ್ವಜನಿಕರು ದಿನಸಿ ವಸ್ತುಗಳ ಖರೀದಿಗೆ ಇದೇ ಪ್ರಮುಖ ಸ್ಥಾನವಾಗಿದೆ. ಆದರೆ ಎಲ್ಲೆಡೆ ಕತ್ತಲೆ ಆವರಿಸಿದ್ದರಿಂದ ಸಾರ್ವಜನಿಕರು, ವ್ಯಾಪಾರಿಗಳು, ರಸ್ತೆ ಬದಿ ಅಂಗಡಿಯವರು ಕಷ್ಟ ಅನುಭವಿಸುತ್ತಿದ್ದಾರೆ. ಗ್ರಾಪಂ ಅಧಿಕಾರಿಗಳು ಈಗಲಾದರೂ ಗಮನಹರಿಸಿ ಹೈಮಾಸ್ಟ್​ ದೀಪಗಳ ದುರಸ್ತಿಗೆ ಮುಂದಾಗಬೇಕು ಎಂಬುದು ಸ್ಥಳಿಯರ ಒತ್ತಾಯವಾಗಿದೆ.

"

ಗ್ರಾಪಂ ಅಧಿಕಾರಿಗಳ ಆಡಳಿತ ವೈಖರಿ ತೀವ್ರ ಬೇಸರ ತಂದಿದೆ. ಕೂಡಲೇ ಹೈಮಾಸ್ಟ್​ ದೀಪಗಳ ದುರಸ್ತಿಗೆ ಮುಂದಾಗಿ ಸಾರ್ವಜನಿಕರು ಎದುರಿಸುತ್ತಿರುವ ಸಮಸ್ಯೆಗೆ ಸ್ಪಂದಿಸಬೇಕು.

— > ಮಲ್ಲಪ್ಪ ನೇಳಗೆ ವಡಗಾಂವ(ದೇ) ನಿವಾಸಿ