ವಿದ್ಯುತ್​ ಖಾಸಗೀಕರಣಗೊಳಿಸುವುದು ಕೈಬಿಡಿ

ಹುಣಸಗಿ: ವಿದ್ಯುತ್​ ವಿತರಣೆಯನ್ನು ಖಾಸಗೀಕರಣಗೊಳಿಸುತ್ತಿರುವುದನ್ನು ಕೂಡಲೇ ಕೈಬಿಡಬೇಕು ಎಂದು ರಾಜ್ಯ ರೈತ ಸಂಘ ಹಾಗೂ ಹಸಿರು ಸೇನೆ ತಾಲೂಕು ಅಧ್ಯಕ್ಷ ಮಲ್ಲನಗೌಡ ನಗನೂರು ಆಗ್ರಹಿಸಿದ್ದಾರೆ.

ಈ ಕುರಿತು ಜೆಸ್ಕಾಂ ಎಂಡಿಗೆ ಬರೆದ ಮನವಿಯನ್ನು ಎಇಇ ಅವರಿಗೆ ಸಲ್ಲಿಸಿ ಮಾತನಾಡಿದ ಅವರು, ವಿದ್ಯುತ್​ ವಿತರಣೆಯನ್ನು ಟಾಟಾ ಪವರ್​ನಂತಹ ಕಂಪನಿಗೆ ನೀಡುವ ಸರ್ಕಾರದ ಧೋರಣೆಗೆ ಅವರು ಆಕ್ರೋಶ ವ್ಯಕ್ತಪಡಿಸಿದರು.

ಖಾಸಗೀಕರಣ ಮಾಡುವದರಿಂದ ರೈತರು ತೀವ್ರ ಸಂಕಷ್ಟಕ್ಕೆ ಸಿಲುಕಲಿದ್ದಾರೆ. ಸಂಸ್ಥೆಗಳು ತಮ್ಮ ಲಾಭಕ್ಕಾಗಿ ವಿದ್ಯುತ್​ ದರ ಹೆಚ್ಚಿಸಬಹುದು, ಇದು ಸಾಮಾನ್ಯ ಗ್ರಾಹಕರಿಗೆ, ರೈತರಿಗೆ ಹೊರೆಯಾಗುತ್ತದೆ. ಸರ್ಕಾರದಿಂದ ಬಡವರಿಗೆ ಸಿಗುವ ಉಚಿತ ವಿದ್ಯುತ್​ (ಗೃಹಜ್ಯೋತಿ) ಮತ್ತು ರೈತರಿಗೆ ನೀಡುವ ಸಬ್ಸಿಡಿ ಸೌಲಭ್ಯ ಕೂಡ ಸ್ಥಗಿತಗೊಳ್ಳಲಿವೆ ಎಂದು ಅವರು ಆತಂಕ ವ್ಯಕ್ತಪಡಿಸಿದರು.

ಈ ಕುರಿತು ಸರ್ಕಾರ ಗಂಭೀತ ಚಿಂತನೆ ಮಾಡಿ ಕೈಬಿಡಬೇಕು. ಹಾಗೊಂದು ವೇಳೆ ಮುಂದುವರಿಸಿದ್ದಲ್ಲಿ ನಮ್ಮ ಸಂಘಟನೆಯಿಂಣದ ಉಗ್ರ ಹೋರಾಟ ಮಾಡುವುದಾಗಿ ಎಚ್ಚರಿಕೆ ನೀಡಿದರು. ಈ ವೇಳೆ ರಾಮನಗೌಡ ಸಿದ್ದಾಪುರ, ಬಾಪುಗೌಡ ಬಿರಾದಾರ, ಹನುಮಂತ್ರಾಯ ಕೆಂಭಾವಿ, ಸುಭಾಷ, ಸಂತೋಷ ತಳವಾರ, ಯಂಕೋಬ ಶುಕ್ಲಾ, ಮಂಜುನಾಥ ಬೊಮ್ಮನಹಳ್ಳಿ ಇತರರು ಇದ್ದರು.