ಬಿಎಸ್​ಎಸ್​ಕೆ ಕಾರ್ಖಾನೆ ಆರಂಭಿಸಿ

ಹುಮನಾಬಾದ್​: ಬೀದರ್​ ಜಿಲ್ಲೆಯ ರೈತರ ಜೀವನಾಡಿಯಾದ ಬಿಎಸ್​ಎಸ್​ಕೆ ಕಾರ್ಖಾನೆಯನ್ನು ಪ್ರಸಕ್ತ ಸಾಲಿನಲ್ಲಿ ಯಾವುದೇ ರೀತಿಯಿಂದಾರೂ ಆರಂಭಿಸಲು ಸರ್ಕಾರ ಮುಂದಾಗಬೇಕೆಂದು ಶಾಸಕ ಡಾ.ಸಿದ್ದಲಿಂಗಪ್ಪ ಪಾಟೀಲ್​ ಆಗ್ರಹಿಸಿದರು.

ಪಟ್ಟಣದ ತಹಸಿಲ್​ ಕಚೇರಿಯಲ್ಲಿ ತಾಲೂಕು ಆಡಳಿತದಿಂದ ಶನಿವಾರ ಆಯೋಜಿಸಿದ್ದ 80ನೇ ಸ್ವಾತಂತ್ರ್ಯ ದಿನಾಚರಣೆ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ನಾನು ಸೇರಿ ಜಿಲ್ಲೆ ಜನಪ್ರತಿನಿಧಿಗಳು ಜಿಲ್ಲೆಯ ರೈತರ ಹಾಗೂ ಕಾರ್ಮಿಕರ ಹಿತದೃಷ್ಟಿಯಿಂದ ಬೀದರ್​ ಸಹಕಾರ ಸಕ್ಕರೆ ಕಾರ್ಖಾನೆ ಆರಂಭಿಸಬೇಕೆಂದು ಹಲವಾರು ಬಾರಿ ಒತ್ತಾಯಿಸಿದ್ದೇವೆ. ಸರ್ಕಾರದ ಮಟ್ಟದಲ್ಲಿ ಹರಾಜು ಮಾಡಬೇಕೆಂದು ನಡೆಯುತ್ತಿದ್ದರೆ, ಸಾಲ ನೀಡಿರುವ ಡಿಸಿಸಿ ಬ್ಯಾಂಕ್​ನವರು ಒಂದು ಕಡೆ ಮಾರಾಟ ಮಾಡಲು ಅನುಮತಿ ಕೋರಿದ್ದಾರೆ ಎನ್ನಲಾಗುತ್ತಿದೆ. ಈ ಗೊಂದಲ ನಿವಾರಣೆ ಮಾಡಿ ಕಾರ್ಖಾನೆ ಆರಂಭಿಸಬೇಕು. ಇಲ್ಲದಿದ್ದಲ್ಲಿ ಎಲ್ಲ ಜನಪ್ರತಿನಿಧಿಗಳು ಒಟ್ಟಾಗಿ ಚರ್ಚಿಸಿ ಡಿಸಿಸಿ ಬ್ಯಾಂಕ್​ ಹಾಗೂ ಜಿಲ್ಲಾಧಿಕಾರಿ ಕಚೇರಿ ಎದುರು ರೈತರೊಂದಿಗೆ ಹೋರಾಟ ನಡೆಸಬೇಕಾಗುತ್ತದೆ ಎಂದು ಎಚ್ಚರಿಸಿದರು.

ಪಟ್ಟಣದ ಹೊರವಲಯದ ಕೈಗಾರಿಕಾ ಪ್ರದೇಶದಲ್ಲಿನ ಕೆಮಿಕಲ್​ ಕಾರ್ಖಾನೆಗಳ ವಿರುದ್ಧ ಪಕ್ಷಾತಿತವಾಗಿ ಹೋರಾಟ ಮಾಡಿದ್ದರಿಂದ ನಾಲ್ಕು ಕಾರ್ಖಾನೆಗಳು ಬಂದ್​ ಆಗಿವೆ. ಒಗ್ಗಟಿನಲ್ಲಿ ಬಲವಿದೆ ಎಂದರು.

ಪಟ್ಟಣ ಸೇರಿ ತಾಲೂಕಿನಲ್ಲಿ ಅಭಿವೃದ್ದಿ ಕಾರ್ಯ ಪ್ರಮಾಣಿಕತೆಯಿಂದ ಕೈಗೊಳ್ಳಲಾಗುತ್ತಿದೆ. ಪಟ್ಟಣದಲ್ಲಿ ಎರಡನೇ ಹಂತದ ಯುಜಿಡಿ ಯೋಜನೆಗೆ 30ಕೋಟಿ ಅನುದಾನ ಬಂದಿದೆ ಎಂದರು.ಸ್ವಾತಂತ್ರ್ಯ ಹೋರಾಟಗಾರರ ತ್ಯಾಗ ಮತ್ತು ಬಲಿದಾನದ ಫಲವಾಗಿ ದೇಶಕ್ಕೆ ಸ್ವಾತಂತ್ರ್ಯ ದೊರೆತಿದ್ದು, ಅದರ ಮೌಲ್ಯವನ್ನು ಯುವಜನತೆ ಅರಿತು ದೇಶ ಪ್ರೇಮ ಅಭಿಮಾನ ಮೈಗೂಡಿಸಿಕೊಳ್ಳಬೇಕೆಂದು ಹೇಳಿದರು.

ವಿಧಾನ ಪರಿಷತ್​ ಸದಸ್ಯ ಡಾ.ಚಂದ್ರಶೇಖರ ಪಾಟೀಲ್​ ಮಾತನಾಡಿ, ಬಿಎಸ್​ಎಸ್​ಕೆ ಕಾರ್ಖಾನೆ ರಾಜ್ಯದ ಅತ್ಯಂತ ಹಳೇ ಕಾರ್ಖಾನೆ. ಇದರ ಮೇಲೆ ಜಿಲ್ಲೆಯ ರೈತರು, ಕೂಲಿಕಾರ್ಮಿಕರು, ಸಿಬ್ಬಂದಿಗಳ ಸಾವಿರಾರೂ ಕುಟುಂಬ ಅವಲಂಬಿತವಾಗಿವೆ. ಈ ವರ್ಷ ಆರಂಭಗೊಳಿಸಲು ನಾವೆಲ್ಲರೂ ಸೇರಿ ಪ್ರಥಮಾಧ್ಯತೆ ನೀಡಬೇಕು ಎಂದರು.

ಧ್ವಜಾರೋಹಣ ನೆರವೇರಿಸಿದ ತಹಸೀಲ್ದಾರ್​ ಜಗದೀಶ್​ ಚೌರ ಪ್ರಾಸ್ತಾವಿಕ ಮಾತನಾಡಿದರು. ತಾಪಂ ಇಒ ದೀಪಿಕಾ ನಾಯ್ಕರ್​, ಪುರಸಭೆ ಮುಖ್ಯಾಧಿಕಾರಿ ವನಿತಾಬಾಯಿ, ಅಧಿಕಾರಿಗಳಾದ ಡಾ.ಗೋವಿಂದ್​, ವೆಂಕಟೇಶ ಗುಡಾಳ, ಶರಣಕುಮಾರ ಕಲ್ಯಾಣಿ, ಮೌನೇಶ ಸ್ವಾಮಿ, ರಾಹುಲ್​ ಇತರರಿದ್ದರು. ಉಪನ್ಯಾಸಕ ಹಣಮಂತ ಗೌಡಗಾಂವಕರ್​ ಉಪನ್ಯಾಸ ನೀಡಿದರು. ಮೋಳಕೇರದಲ್ಲಿ ಸಂಭವಿಸಿದ್ದ ಕೆಮಿಕಲ್​ ಸ್ಪೋಟದಿಂದ ಗಾಯಗೊಂಡ 6 ಜನರಿಗೆ ಮುಖ್ಯಮಂತ್ರಿಗಳ ಪರಿಹಾರ ನಿಧಿಯಿಂದ ತಲಾ ಒಂದು ಲಕ್ಷ ಮೊತ್ತದ ಚೆಕ್​ ವಿತರಿಸಲಾಯಿತು ಹಾಗೂ ಪ್ರತಿಭಾವಂತ ವಿದ್ಯಾರ್ಥಿಗಳು, ರೈತರು, ಮಾಜಿ ಸೈನಿಕರನ್ನು ಸನ್ಮಾನಿಸಲಾಯಿತು. ಶಾಲಾ ಮಕ್ಕಳಿಂದ ಸಾಂಸ ಕಾರ್ಯಕ್ರಮ ಜರುಗಿದವು.