ಖರ್ಗೆ ವಿರುದ್ಧ ಚಲುವಾದಿ ಹೇಳಿಕೆಗೆ ಕಿಡಿ

ಕಲಬುರಗಿ: ರಾಜ್ಯಸಭೆ ವಿಪಕ್ಷ ನಾಯಕ ಮಲ್ಲಿಕಾರ್ಜುನ ಖರ್ಗೆ ಕುರಿತು ವಿಧಾನ ಪರಿಷತ್​ ಪ್ರತಿಪಕ್ಷ ನಾಯಕ ಚಲುವಾದಿ ನಾರಾಯಣಸ್ವಾಮಿ ಸೇರಿ ಬಿಜೆಪಿ ಮುಖಂಡರು ಹಗುರವಾಗಿ ಮಾತನಾಡಿರುವುದನ್ನು ವೈದ್ಯಕಿಯ ಶಿಕ್ಷಣ ಸಚಿವ ಡಾ.ಶರಣಪ್ರಕಾಶ ಪಾಟೀಲ್​ ಖಂಡಿಸಿದ್ದಾರೆ.

ಸುದೀರ್ ರಾಜಕೀಯ ಜೀವನದಲ್ಲಿ ನತೆ, ಗೌರವ ಕಾಪಾಡಿಕೊಂಡು ಬಂದಿರುವ ಖರ್ಗೆ ಅವರು, ಬಿಜೆಪಿ, ಆರ್​ಎಸ್​ಎಸ್​ ವಿಷಕಾರಿ ಹಾವುಗಳಿದ್ದಂತೆ. ಬೆಳೆಯಲು ಬಿಡಬಾರದು ಎಂದು ಹೇಳಿದ್ದಾರೆ. ಚುನಾವಣೆ ಸಂದರ್ಭದಲ್ಲಿ ಆಡಳಿತ ಮತ್ತು ಪ್ರತಿಪಕ್ಷದ ಮಧ್ಯೆ ಹೇಳಿಕೆಗಳು ಸಾಮಾನ್ಯ. ಕಾಂಗ್ರೆಸಿಗರು ದೇಶದ್ರೋಹಿಗಳು, ದೇಶವನ್ನು ಲೂಟಿ ಮಾಡಿದ್ದಲ್ಲದೆ ಅರ್ಬನ್​ ನಕ್ಸಲೈಟ್ಸ್​ ಎಂದೂ ಪ್ರಧಾನಿ ನರೇಂದ್ರ ಮೋದಿ ಆರೋಪಿಸಿದ್ದಾರೆ. ಹಾಗಂತ ನಾವು ಮೋದಿ ವಿರುದ್ಧ ಬಾಯಿಗೆ ಬಂದಂತೆ ಮಾತನಾಡಿದ್ದೇವಾ ಎಂದು ಅವರು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಖಾರವಾಗಿ ಪ್ರಶ್ನಿಸಿದರು.

ಕಾಂಗ್ರೆಸ್​ ಸಿದ್ಧಾಂತದ ಮೇಲೆ ರಾಜಕಾರಣ ಮಾಡಿರುವ ಖರ್ಗೆ ಸಮಾಜದಲ್ಲಿ ಯಾವತ್ತೂ ಬೆಂಕಿ ಹಚ್ಚುವ ಕೆಲಸ ಮಾಡಿಲ್ಲ. ಇಂಥವರ ವಿರುದ್ಧ ಕೇಸ್​ ಹಾಕುವುದು ಹಾಸ್ಯಾಸ್ಪದ. ವಿವೇಕ ಇದ್ದವರು ಮಾಡಲ್ಲ. ಚುನಾವಣೆಯಲ್ಲಿ ಸೋಲು-ಗೆಲುವು ಸಾಮಾನ್ಯ. ಬಿಜೆಪಿಯವರು ಖರ್ಗೆ ಹೇಳಿಕೆಗೆ ಬಣ್ಣ ಬಳಿದು ದೊಡ್ಡದು ಮಾಡಿ ಅಪಾರ್ಥ ಕಲ್ಪಿಸುತ್ತಿದ್ದಾರೆ. ಆದರೆ ಈಗಾಗಲೇ ಖರ್ಗೆ ವಿಷಾದ ವ್ಯಕ್ತಪಡಿಸಿದ್ದಾರೆ ಎಂದರು.

ವಾರ್​ ಎಫೆಕ್ಟ್​: ಇರಾನ್-ಇಸ್ರೇಲ್​ ಯುದ್ಧದಿಂದಾಗಿ ಆರೋಗ್ಯ ಕ್ಷೇತ್ರದ ಮೇಲೂ ಕರಿನೆರಳು ಬಿದ್ದಿದೆ. ಆಮದು ಮಾಡಿಕೊಳ್ಳುವ ಉಪಕರಣಗಳ ಕೊರತೆ, ದುಬಾರಿ ಬೆಲೆ ಜತೆ ಫಾರ್ಮಾ ಕೈಗಾರಿಕೆ ಮೇಲೂ ಪರಿಣಾಮವನ್ನುಂಟು ಮಾಡಿದೆ. ದೇಶದ ವಿದೇಶಿ ನೀತಿ ಸರಿ ಇಲ್ಲದಿದ್ದರೆ ಇಂಥ ಪರಿಸ್ಥಿತಿ ತಲೆದೋರುತ್ತದೆ. ಯುದ್ಧದ ಸಂದರ್ಭದಲ್ಲಿ ಮೋದಿ ಇಸ್ರೇಲ್​ ಹೋಗುವ ಅಗತ್ಯವೇನಿತ್ತು ಎಂದು ಡಾ.ಶರಣಪ್ರಕಾಶ ಪ್ರಶ್ನಿಸಿದರು.

ರಾಜ್ಯದ ಆಸ್ಪತ್ರೆಗಳಲ್ಲಿ ಔಷಧಿ ಕೊರತೆ ಕುರಿತು ಗಮನ ಸೆಳೆದಾಗ ಹೌದು, ಕೆಲ ಹಂತದಲ್ಲಿ ಸಮಸ್ಯೆ ಆಗಿತ್ತು. ಆದರೆ ಇತ್ತೀಚೆಗೆ ಆರೋಗ್ಯ ಸಚಿವರು ರಾಜ್ಯಮಟ್ಟದಲ್ಲಿ ಔಷಧ ಖರೀದಿಗೆ ಟೆಂಡರ್​ ಕರೆದಿದ್ದು, ಶ್ರೀದಲ್ಲಿ ಆಸ್ಪತ್ರೆಗಳಿಗೆ ಔಷಧ ಸರಬರಾಜು ಆಗಲಿದೆ ಎಂದಿದ್ದು, ಆತಂಕಪಡುವ ಅಗತ್ಯವಿಲ್ಲ ಎಂದರು.

ಈ ಸಲ ವೈದ್ಯಕಿಯ ಯುಜಿ ಮತ್ತು ಪಿಜಿ ಸೀಟು ಹೆಚ್ಚಳಕ್ಕೆ ಪ್ರಸ್ತಾವನೆ ಸಲ್ಲಿಸಿದ್ದು, ಬಾಗಲಕೋಟೆ, ರಾಮನಗರದಲ್ಲಿ ಹೊಸ ಮೆಡಿಕಲ್​ ಕಾಲೇಜು ಸ್ಥಾಪಿಸಲಾಗುತ್ತಿದೆ. ಕುಮಟಾದಲ್ಲಿ ಆಗಿದೆ. ಕನಕಪುರದಲ್ಲಿ ಪ್ರಸ್ತಾವನೆ ಇದೆ ಎಂದು ತಿಳಿಸಿದರು.

ಸಂವಿಧಾನದ 371(ಜೆ) ವಿಧಿ ಜಾರಿಯಿಂದಾಗಿ ಕಲ್ಯಾಣ ಕರ್ನಾಟಕ ಅಭ್ಯರ್ಥಿಗಳಿಗೆ ಭಾರಿ ಅನುಕೂಲ ಆಗಿದೆ. 80 ಸಾವಿರ ಜನರಿಗೆ ಉದ್ಯೋಗ, 10 ಸಾವಿರ ಮೆಡಿಕಲ್​ ಸೀಟು ಸಿಕ್ಕಿವೆ. ಬಡ್ತಿಗೆ ಸಂಬಂಧಿಸಿದ ಸಮಸ್ಯೆ ಶ್ರೀ ಪರಿಹಾರವಾಗಲಿದೆ. ಗೋವಿಂದರಾವ್​ ಸಮಿತಿ ಸರ್ಕಾರಕ್ಕೆ ವರದಿ ಸಲ್ಲಿಸಿದ್ದು, ಕಕ ಶೇ.72 ಹಿಂದುಳಿದಿದೆ ಎಂದಿದೆ. ನಮ್ಮ ಸರ್ಕಾರ ಹಿಂದುಳಿದ ಭಾಗದ ಅಭಿವೃದ್ಧಿಗೆ ಬದ್ಧತೆ ಪ್ರದರ್ಶಿಸಲಿದೆ. ಯಾವ ಕಾರಣಕ್ಕೂ ಈ ಭಾಗಕ್ಕೆ ಅನ್ಯಾಯವಾಗಲು ಬಿಡಲ್ಲ ಎಂದು ಸಚಿವ ಡಾ.ಶರಣಪ್ರಕಾಶ ಹೇಳಿದರು.